Milwol ni Ngan Thapeg ko biney e Pul, nifan e Liahona ko September 2021

General Conference: Ba Mu’ulung nifen e Galasia u Dakean Ga’anginyang e Fayleng

Gadaedra motoyil ngak fapi profet nge fapi tiyugang’ ko Galasia ko ngiyal’ e general conference. Yaedra fil ngodaed e pi n’en ni ba’adag Got ni ngaed rung’aged.

Gubin e April nge October, e ma tay e Galasia bugi mu’ulung ni kanog e mu’ulung ko general conference ngay. Pi tiyugang’ e bayra filed miyaed micheg mornga’agen Yesus Kristus nge gospel Rok’. Mu’ulung ko general conference a yima tay u Salt Lake City, Utah, USA, ma yibe broadcast nag ya’an u ga’anginyang u fayleng ni bay 80 e thin riy nikan pilyeg. Uringin chonggin gidii’en e Galasia nge reb e gidii’ ni ba’adag ni nge motoyil e rayag ni nge un nge motoyil ko pi thin ney.

Fare Bin Somm’on e Mu’ulung ko Galasia

Fare Galasia ni fini mu’ i yarmiy rogon napan ba mu’ulung ko April 6, 1830 (mu guy ko Doctrine and Covenants 20). Ma bin somm’on e mu’ulung ko general conference e ntay ko June 9, 1830. Ma aram n’umngin napan, ni fare mu’ulung ko general conference e yima tay ni be yib u tan paa’ e President ko Galasia ko gin nrayag ni nge mukun chonggin gidii’en e Galasia ngay. Napan e 1840s, fapi tiyugang’ e kar tabab gaed i tay e biney e mu’ulung ni l’agruw yay ulan e duw.

Rogon e Conference nikan Yarmiy Rogon ko Daba’

Bin Somm’on e Presidency, fare Ulung ko fare Ragag nge L’agruwi Apostles, nge ku boch e tiyugang’ ko Galasia e yaedra non ko ngayal’ ere mu’ulung ney ko general conference. Fare Tabernacle Choir u Temple Square nge ku boch e choir ko Galasia e yaedra yon’ed e tang. Urngin e conference ma bay laal’ e mu’ulung riy: dalip ko Sabado ma l’agruw ko rofen ni Madnom. Ko April, bin dalip e pi mu’ulung ney ko Sabado e fan chonggin gidii’en e ulung ko Aaronic nge Melchizedek Priesthood. Ma October, e fan chonggin gidii’en e Relief Society nge Ppin i Fal’yangren.

Pi Machib ko pi Tiyugang’

Pul nga m’on ko conference, tiyugang’ ko Galasia e yaed ma maybil nag ko mang e ngar machib niged mornga’agen. Somoel e ma thogthog nag ngoraed e tin ni ngar weliyed mornga’agen. Yaed ma fil mornga’agen fare gospel nib riyul’ ma yaed piningdaed ni ngan fol ko fapi motochiyel rok’ Got. Ma ki yaed ma micheg mornga’agen Yesus Kristus mi yaed pii’ e athamgil ngodaed ni ngan Laek.

Tin ni yibe Fil ko Conference

U m’on ko general conference, ma rayag ni ngaed meybil niged e tin ba’adag Somoel ni ngaed filed mornga’agen. Ma napan ni ngad motoyilgaed ko fapi numon, ma fare Thothup e bayi fil ngodaed e tin nib tu’uf ni ngaed nanged. Tomuren e conference, ma fapi thin e bayi m’ug ya’an ko ChurchofJesusChrist.org, ulan fare app ko Gospel Library nge lang fare babyor ko Liahona. Rayag ni ngan meybil nag man fil fapi thin ni ngan fil boch mornga’agen Yesus Kristus nge fare gospel Rok’.

Yib ko pi Chep nib Thothup

Yesus Kristus ni fil ni nga un muʼulung gaed ni gubin e ngiyalʼ (mu guy ko 3 Nephi 18:22).

Ya gin nra gak l’agruw fa dalip ni’ ngay u fithingag, e aram e gu bay rorad ko gin’em (mu guy ko Matthew 18:20).

Somoel e ke motochiyel nag ngak gidiiʼen chonggin e Galasia rokʼ ni ngar ”ayuweged mi yaed machibgaed u taʼabang” (Doctrine and Covenants 43:8).

Napan ni baydag fapi gidiiʼen chonggin e Galasia e mich ngak Kristus, ma fare Thothup Rokʼ e bayi par roraed ko ngayalʼ nbay ra madaʼ gaed u taʼabang (mu guy ko Doctrine and Covenants 44:2).

© 2021 ko Intellectual Reserve, Inc. Gubin ma bay mat’won. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Pilyeg ko Milwol ni Ngan Thapeg ko biney e Pul nifan ko, September 2021. Yapese. 17473 905