“Ọgbakọ Zuruọha: Nzukọ nke Nzukọ nsọ Zuru ụwa ọnụ,” Liahona, Septemba 2021
Ozi Liahona Kwa ọnwa, Septemba 2021
Ọgbakọ Zuruọha: Nzukọ nke Nzukọ nsọ Zuru ụwa ọnụ
Anyị na-ege ndị amụma na ndị ndu ndị ọzọ nke Nzukọ nsọ ntị n’oge ọgbakọ zuruọha. Ha na-akụziri anyị ihe Chineke chọrọ ka anyị nụ.
Eprel na Ọktoba ọbụla, Nzukọ nsọ na-eme usoro nzukọ ndị a na-akpọ ọgbakọ zuruọha. Ndị ndu na-akụzi ma na-agba ama banyere Jizọs Kraịst na ozi ọma Ya. A na-eme ọgbakọ zuruoha na Salt Lake City, Utah, USA, ma a na-agbasa ya n’ikuku ihe karịrị asụsụ 80 gburugburu ụwa. A na-akpọku ndị otu niile na ndị ọzọ nwere mmasị ka ha gee ntị n’okwu ndị ahụ.
Ọgbakọ ndị nke Mbụ nke Nzukọ nsọ
A haziri Nzukọ nsọ nke ọma n’oge nzukọ na Eprel 6, 1830 (lee Ozizi na Ọgbụgba-ndụ niile 20). Ọgbakọ zuruọha nke mbụ ka emere na Jun 9, 1830. Kemgbe ahụ, ọgbakọ zuruọha ka a na-eme n’okpuru ntụziaka nke Onyeisi nke Nzukọ nsọ ebe ọbụla ndị otu nwere ike ịgbakọ. N’ime afọ 1840 niile, ndịisi malitere ime ọgbakọ ugboro abụọ n’afọ.
Otu Esi Ahazi Ọgbakọ Taa
Otu Ndịisi Mbụ, Kworum Ndị ozi Iri na Abụọ, na ndị ndu ndị ọzọ nke Nzukọ nsọ na-ekwu okwu n’oge ọgbakọ zuruọha. Otu Abụ Tabanakụl dị na Temple Square na otu abụ ọzọ nke Nzukọ nsọ na-enye egwu. Ọgbakọ ọbụla nwere nzukọ ise: atọ na Satọde na abụọ na Sọnde. Na April, nzukọ nke atọ na Satọde bụ maka ndị otu kworum nke Ọkwa nchụaja nke Erọn na Melkizedek. N’ọnwa Ọktoba, ọ bụ maka ndị otu nke Otu Enyemaka na Ndịinyom Nta.
Nkuzi niile nke Ndị ndu
N’ime ọnwa ole na ole tupu ọgbakọ, Ndị ndu Nzukọ nsọ na-ekpe ekpere banyere ihe a ga-akuzi. Onyenwe anyị na-akpali mmụọ ha ịmata ihe ha kwesịrị ikwu. Ha na akuzi eziokwu nke ozi ọma ma na-akpọku anyị idebe iwu nsọ niile nke Chineke. Ha na agbakwa ama Jizọs Kraịst ma gbaa anyị ume ka anyị soro Ya.
Mmụta site na Ọgbakọ
Tupu ọgbakọ zuruọha, anyị nwere ike ikpe ekpere ịnụrụ ihe Onyenwe anyị chọrọ ka anyị mụta. Dịka anyị na-ege okwu ndị ahụ, Mmụọ ahụ ga-akụziri anyị ihe anyị kwesịrị ịma. Ka emechara ọgbakọ, okwu ndị ahụ pụtara na ChurchofJesusChrist.org, na n’ime app Ọbá akwụkwọ Ozi ọma, na n’ime Liahona. Anyị nwere ike jiri ekpere mụọ okwu ndị ahụ ka anyị mụtakwuo banyere Jizọs Kraịst na ozi ọma Ya.
Site na Akwụkwọ nsọ
Jizọs Kraịst kụziri na anyị kwesịrị ị na-ezukọ mgbe na mgbe (lee 3 Nifaị 18:22).
Mgbe ndị otu Nzukọ nsọ na-efekọ ofufe ọnụ, Onyenwe anyi ga-anọnyere ha (lee Matiu 18:20).
Onyenwe anyi nyere ndị otu Nzukọ nsọ iwu ka ha “na-akụzi ma na-emezi onye ọbụla n’ibe ya” (Ozizi na Ọgbụgba-ndụ niile 43:8).
Ka ndị otu Nzukọ nsọ na-egosi okwukwe n’ime Kraịst, Mmụọ Ya ga-anọnyere ha mgbe ha na-ezukọ (lee Ozizi na Ọgbụgba-ndụ niile 44:2).
© 2021 by Intellectual Reserve, Inc. All rights reserved. Ebipụtara na USA. Nnabata n’asụsụ Bekee: 6/19. Nnabata ntụgharị-asụsụ: 6/19. Ntụgharị-asụsụ nke Ozi Liahona Kwa ọnwa, Septemba 2021. Igbo. 17473 000