“Aramid iti Templo,” Liahona, Oktubre 2021
Binulan a Mensahe ti Liahona , Oktubre 2021
Aramid iti Templo
Balay ti Apo dagiti templo. Maawattayo dagiti ordinansa ken maaramidtayo dagiti katulagan Kenkuana kadagiti templo. Mabalintayo pay ti mangannong kadagiti ordinansa iti templo para kadagiti kapuonantayo.
Ladawan ti Barranquilla Colombia Temple ni Bruno Lima
Iti unos ti pakasaritaan, binilin ti Apo dagiti taona nga agbangon kadagiti templo. Nasantuan a lugar dagiti templo a pakariknaantayo iti ayat ti Dios, pakaawatantayo kadagiti ordinansa, ken pakaaramidantayo kadagiti kari Kenkuana. Agbangbangon ti Simbaan kadagiti templo iti aglawlaw ti lubong tapno ad-du pay a tattao ti maaddaan kadagitoy a bendision.
Ladawan ti babai iti sango ti Oquirrh Mountain Utah Temple da Nexeo ken Matthew Reier
Ti Endowment
Mapan iti templo dagiti miembro ti Simbaan nga agbibiag a nalinteg tapno umawat kadagiti ordinansa ken agaramid kadagiti katulagan, wenno kari, iti Dios. Maysa nga ordinansa nga awatentayo iti templo ket ti endowment. Ti balikas nga endowment kayatna a sawen ti “maysa a sagut.” Sagut a naggapu iti Dios ti endowment iti templo. Iti daytoy nga ordinansa masursurotayo maipapan iti plano ti Nailangitan nga Ama para iti pannakaisalakantayo, ken agaramidtayo kadagiti katulagan nga agtungpal kadagiti bilin ti Dios. No napudnotayo kadagiti katulagan nga aramidentayo, bendisionannatayonto ti Apo.
Ladawan ti agassawa a magmagna iti igid ti Manila Philippines Temple ni Cristina Smith
Panangilantip kadagiti Pamilia a Sangkamaysa
Maawagan pay ti maysa a kallaysa iti templo iti maysa a panaglantip. No mailantip ti maysa nga agassawa iti templo ken agtungpalda kadagiti katulaganda, maikallaysadanto iti agnanayon. No addaanda iti annak, mailantipto met dagita nga annak kadakuada. Dagiti nagannak a nailantip kalpasan a naaddaanda iti annak ket mabalinda nga ilantip kadakuada dagiti annakda. No agbiagda a nalinteg, agbalindanto a maysa a pamilia iti unos ti kinaagnanayon.
Ladawan ti Lisbon Portugal Temple baptistry ni Leslie Nilsson
Aramid iti Templo para iti Amin nga Annak ti Dios
Aramidentayo ti family history work tapno ammuen maipapan kadagiti kapuonantayo. Kalpasanna aramidentayo ti temple work a maipaay kadakuada. Annongentayo para kadakuada ti amin nga ordinansa a kasapulan dagiti sibibiag: panagbuniag, kumpirmasion, panangawat iti priesthood (para kadagiti lallaki), endowment, ken pannakailantip. Kalpasanna mabalinda a pilien no kayatda nga awaten dagitoy nga ordinansa. Iti kastoy a wagas mananam ti amin nga annak ti Dios dagiti bendision ti ebanghelio.
Ladawan ti pamilia iti sango ti Philadelphia Pennsylvania Temple ni Cody Bell
Dagiti Bendision ti Aramid iti Templo
No agtungpaltayo kadagiti katulagan nga aramidentayo iti templo, maparaburan, masaluadan, ken mapapigsatayonto. Maaddaantayonto iti bileg ti priesthood. Makapagdedennanto a sangkamaysa dagiti pamiliatayo iti agnanayon.
Ti templo ti maysa pay a lugar ti kappia ken paltiing. No aramidentayo ti temple work, maawattayo ti naespirituan a pannarabay ken mariknatayo ti ayat ti Dios.
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, Oktubre 2021. Ilokano. 17474 864