Ang Templo kag ang Inyo Espiritwal nga Pundasyon

Ni Pangulong Russell M. Nelson

Pangulo sang Ang Simbahan ni Jesucristo sang mga Santos sa Ulihing mga Adlaw

Kon may bisan ano nga pagtay-og nga nagakatabo sa inyo kabuhi, ang lugar nga pinakamalayo sa disgrasya sa espirituhanon amo ang pagtiner sa sulod sang inyo mga kasugtanan sa templo!

Mahal kong mga kauturan, nalipay ako nga makaupod kamo sini nga aga agud ipaambit ang akon mga nabatyagan.

Sa nahibal-an na ninyo, nagahimo kita karon sang mayor nga mga pagkay-o sa makasaysayan nga Templo sang Salt Lake. Ining dako nga proyekto nagalakip sang mayor nga pagpabakod sang orihinal sini nga pundasyon, nga nagserbisyo na sing maayo sa masobra isa na ka siglo. Pero ining templo kinahanglan nga magtindog sing mas malawig pa. Sang katapusan sang Mayo, gintan-aw ko ang progreso sining dako nga proyekto. Siling ko basi manamian man kamo nga makita ang nakita namon sang akon asawa nga si Wendy. Sa banta ko makita ninyo kon ngaa ang himno nga “Kamong mga Santos [How Firm a Foundation]”¹ nakaangkon sang bag-o nga kahulugan para sa aton.

2:4

Video gikan sa lugar sang ginakay-o nga Templo sang Salt Lake: “Ginatan-aw naton karon ang orihinal nga pundasyon sang Templo sang Salt Lake. Nagatindog ako sa lugar sa idalom sang sadto Kuwarto nga Hardin (Garden Room). Sang akon gin-usisa ang pag-obra sining bilog nga bilding, nakadayaw gid ako sa nahuman sang mga pionero. Dako gid ang akon pagdayaw sang mahunahuna ko nga ginpatukod nila ining matahum nga templo gamit lamang ang mga kasangkapan kag pamaagi nga ara sa ila masobra isa ka siglo na ang nagligad.

“Ugaling, sa pagligad sang madamo na nga dekada, kon aton gid himutaran ang pundasyon, makita na naton ang epekto sang pag-ab-ab sang duta, mga litik sa orihinal nga sementasyon, kag lainlain nga lebel sang kabakod sang mga pader.

“Karon sang nakita ko kon ano ang masarangan himuon sang moderno nga mga enhinyero, arkitekto, kag mga eksperto sa konstruksyon agud pabakuron inang orihinal nga pundasyon, lubos gid ang akon kahayanghag. Tumalagsahon ang ila trabaho!

“Ang pundasyon sang bisan ano nga bilding, ilabi na gid ang pareho sini kadako, kinahanglan nga mabakod kag makabato sa mga linog, pag-ab-ab sang duta, mabaskog nga hangin, kag ang indi malikawan nga pag-usmod nga nagaapekto sa tanan nga mga bilding. Ang mabudlay nga trabaho sang pagpabakod nga ginahimo sa karon magahatag sining sagrado nga templo sing pundasyon nga sarang kag mahimo magpadayon sa pagligad sang panahon.”

Ginasiguro gid naton nga mahatagan ining respetado nga templo, nga nangin padayon ang amat-amat nga pagluya, sang isa ka pundasyon nga makabato sa pwersa sang kinaugali tubtob sa Milenya. Sa amo man, tion na karon nga aton ipatuman ang pinasahi nga mga tikang—siguro mga tikang nga wala pa naton nahimo sadto—agud pabakuron ang aton personal nga espiritwal nga mga pundasyon. Ang indi-matupungan nga mga hangkat nagapangayo sang indi-matupungan nga mga aksyon.

Pinalangga kong mga kauturan, ini ang ulihing mga adlaw. Kon buot ninyo kag nakon nga mapakigbatuan ang nagaalabot nga mga katalagman kag kabudlayan, kinahanglan gid nga ang tagsa sa aton may mabakod nga espiritwal nga pundason nga natukod sa bato sang aton Manunubos, nga si Jesucristo.²

Gani ginapamangkot ko ang tagsa sa inyo, ano bala kabakod ang inyo pundasyon? Kag ano nga mga pagpabakod sa inyo testimonya kag pag-intiendi sang ebanghelyo ang kinahanglanon?

Ang templo ara sa sentro sang pagpabakod sang aton pagtuo kag espiritwal nga kapag-on tungod ang Manluluwas kag ang Iya doktrina amo ang sentro sang templo. Ang tanan nga ginatudlo sa templo, paagi sa panulin kag paagi sa Espiritu, nagapadugang sang aton paghangop kay Jesucristo. Ang Iya importante gid nga mga ordinansa nagabugkos sa aton sa Iya paagi sa sagrado nga mga kasugtanan sang priesthood. Dayon, samtang aton ginatipigan ang aton mga kasugtanan, ginabugayan Niya kita sang Iya nagapang-ayo, nagapabakod nga gahum.³ Kag o, daw ano naton kakinahanglan ang Iya gahum sa mga adlaw nga maabot.

Ginpromisa sa aton nga “kon [kita] handa indi [kita] magakahadlok.”⁴ Ining pasalig may madalom nga epekto sa karon nga panahon. Ang Ginuo nagsiling nga wala sapayan sang indi matupungan nga mga hangkat sa karon nga panahon, ang mga nagatukod sang ila mga pundasyon kay Jesucristo, kag nagtuon sa paglab-ot sa Iya gahum, indi kinahanglan nga madala sa pinasahi nga mga kabalaka sang sining panahon.

Ang mga ordinansa kag mga kasugtanan sa templo dumaan na. Ginbilinan sang Ginuo sanday Adan kag Eva nga magpangamuyo, maghimo sang mga kasugtanan, kag maghalad.⁵ Matuod gid, “kon sa diin ang Ginuo may katawhan sa duta nga magatuman sang Iya pulong, ginsugo sila nga magpatindog sang mga templo.”⁶ Ang balaan nga mga kasulatan puno sang mga balasahon parte sa mga pinanudlo sa templo, biste, lenggwahe, kag madamo pa.⁷ Tanan nga aton ginapatihan kag tanan nga promisa nga ginhimo sang Dios sa Iya katawhan sa kasugtanan nagaangot sa templo. Sa tagsa ka panahon, ang templo nagasulit sang malahalon nga kamatuoran nga ang mga nagahimo sang mga kasugtanan upod sa Ginuo kag nagatuman sang mga ini mga anak sang kasugtanan.

Gani, sa balay sang Ginuo, sarang kita maghimo sang pareho nga mga kasugtanan upod sa Dios nga ginhimo nanday Abraham, Isaac, kag Jacob. Kag makabaton man kita sang pareho nga mga bugay!

Ang mga templo nangin bahin sining dispensasyon halin sang mag-umpisa ini.⁸ Gintugyan ni Elias ang mga yabi sang awtoridad sa paghugpong kay Joseph Smith sa Templo sang Kirtland. Ang kabug-osan sang priesthood ginpanumbalik sa Templo sang Nauvoo.⁹

Tubtob sa iya kamatayon, si Joseph Smith padayon nga nagabaton sang mga rebelasyon nga nagdugang sa pagpanumbalik sang mga ordinansa sang endowment kag paghugpong.¹⁰ Ugaling nahibal-an niya, nga kinahanglanon ang padayon nga pagpanami sini. Pagkatapos nga ginhikot ang endowment ni Brigham Young sang Mayo 1842, nagsiling si Joseph kay Brigham, “Wala pa ini maplastar sing maayo, pero nahimo naton ang pinakamaayo naton nga masarangan sa sirkumstansya nga nahamtangan naton, kag luyag ko nga imo ini atipanon kag ipahamtang kag butangan sing sistema ining tanan nga mga seremonya.”¹¹

Pagkatapos sang kamatayon sang Propeta, ginpangunahan ni Pangulong Young ang pagtapos sang Templo sang Nauvoo¹² kag sang ulihi nagpatindog sang mga templo sa Teritoryo sang Utah. Sa dedikasyon sang idalom nga mga panalgan sang Templo sang St. George, mapagsik nga gindeklarar ni Brigham Young ang kakinahanglanon gilayon sang buluhaton sa templo para sa minatay sang sia nagsiling, “Kon mahunahuna ko ining topiko, daw luyag ko nga makaangkon sang tingug sang daw pito ka daguob agud pukawon ang katawhan.”¹³

Halin sadto nga tion, ang mga ordinansa sa templo amat-amat nga ginpanami. Si Pangulong Harold B. Lee nagpaathag kon ngaa ang mga proseso, polisiya, kag bisan gani ang paghikot sang mga ordinansa sang templo padayon nga nagabag-o sa sulod sang ginpanumbalik nga Simbahan sang Manluluwas. Si Pangulong Lee nagsiling: Ang mga prinsipyo sang ebanghelyo ni Jesucristo diosnon. Wala sang nagaliwat sang mga prinsipyo kag [doktrina] sang Simbahan magluwas sa Ginuo paagi sa rebelasyon. Pero ang mga pamaagi nagaliwat samtang nagaabot ang diosnon nga direksyon sa mga nagapangulo sa sina nga tion.”¹⁴

Pamensara kon paano nagliwat ang paghikot sang sakramento sa sulod sang tinuig. Sang primero, ang tubig sa sakramento ginapanagtag sa kongregasyon sa isa ka dako nga suludlan. Ang tanan nagainom halin didto. Karon nagagamit na kita sang indibidwal nga kaisa-lang-gamiton nga mga baso. Ang proseso nagliwat, pero ang mga kasugtanan nagapabilin nga amo sa gihapon.

Binagbinaga ining tatlo ka kamatuoran:

Ang Pagpanumbalik isa ka proseso, indi isa ka hitabo, kag magapadayon tubtob magbalik ang Ginuo.
Ang pinakamataas nga katuyuan sang pagtipon sang Israel¹⁵ amo nga dalhon ang mga bugay sang templo sa matinuohon nga mga anak sang Dios.
Samtang ginatinguhaan naton nga tumanon ina nga katuyuan sing mas maayo, ang Ginuo nagapahayag sang dugang nga ihibalo. Ang nagapadayon nga Pagpanumbalik nagakinahanglan sang nagapadayon nga rebelasyon.

Ang Unang Pangulohan kag Korum sang Dose ka Apostoles masami nagapamangkot sa Ginuo kon may mas maayo pa bala nga pamaagi agud dalhon ang mga bugay sang templo sa Iya matinuohon nga mga anak. Regular kita nga nagapangayo sang giya kon paano siguruhon ang bug-os-kalibutan nga kahusto kag pagsinanto sang instruksyon sa templo, mga kasugtanan, kag mga ordinansa wala sapayan sang kinalain sa lenggwahe kag kultura.

Sa idalom sang direksyon sang Ginuo kag bilang sabat sa aton mga pangamuyo, ginhimo ang mga pagliwat sa proseso sining karon lang. Sia Amo ang may gusto nga maintiendihan ninyo sing may dako nga kaathag kon ano ang ginakasugtan ninyo nga himuon. Sia Amo ang may gusto nga maeksperiyensyahan ninyo sing lubos ang Iya sagrado nga mga ordinansa. Gusto Niya nga mahangpan ninyo ang inyo mga pribelihiyo, mga promisa, kag mga responsibilidad. Gusto Niya nga makabaton kamo sing espirituhanon nga mga paghangop kag kaalam nga wala pa ninyo mabaton sadto. Ini ang Iya handum para sa tanan nga nagatambong sa templo, bisan diin man sila nagapuyo.

Ang mga pagbag-o sa karon sa mga proseso sa templo, kag sa iban pa nga magasunod, padayon nga ebidensya nga ang Ginuo aktibo nga nagapamuno sa Iya Simbahan. Nagahatag Sia sing mga oportunidad agud mapabakod sang tagsa sa aton ang aton espiritwal nga mga pundasyon sing mas maayo paagi sa pagsentro sang aton mga kabuhi sa Iya kag sa mga ordinansa kag kasugtanan sa Iya templo. Kon dalhon ninyo ang inyo temple recommend, ang mahinulsulon nga tagipusuon, kag ang pamensaron nga nagahandum nga magtuon sa balay sang Ginuo, Sia magatudlo sa inyo.

Kon ang kalayuon, kabudlayan sa ikaayong-lawas, ukon iban pa nga sablag ang nagapugong sa inyo nga magtambong sa templo sa isa ka tion, ginaagda ko kamo nga magpahamtang sang regular nga tion sa pagsulit sa inyo kaisipan sang mga kasugtanan nga inyo ginhimo.

Kon wala pa kamo nanamian magtambong sa templo, magkadto didto pirme—imbes nga panalagsa. Tugoti ang Ginuo, paagi sa Iya Espiritu, nga tudloan kag tandugon kamo didto. Ginapromisa ko sa inyo nga sa kadugayan, ang templo mangin isa ka lugar sang kahilwayan sa katalagman, kaumpawan, kag rebelasyon.

Kon posible lang sa akon nga maistorya sing tag-isa-isa ang kada lamharon nga hamtong, magapangabay ako sa inyo nga magpangita sang kaupod nga sarang kamo maselyohan sa templo. Siguro mamensar kamo kon ano nga kinalain ang mahimo sini sa inyo kabuhi. Ginapromisa ko dako ang mangin impluwensya sini! Kon magpakasal kamo sa templo kag magbalik-balik didto, pagapabakuron kamo kag pagagiyahan sa inyo mga desisyon.

Kon makahambal lang ako sa tagsa ka bana ukon asawa nga sa gihapon wala pa maselyohan sa templo, nagapangabay ako sa inyo nga himuon ang kinahanglanon nga mga tikang agud mabaton inang pinakaimportante, makapabag-o-sing-kabuhi nga ordinansa.¹⁶ May matuga bala ini nga kinalain? Lamang kon gusto ninyo nga magprogreso sa katubtuban kag mag-ululupod kamo sa katubtuban. Ang paghandum nga mag-ululupod kamo sa katubtuban indi magpahanabo sini. Wala na sing iban pa nga seremonya ukon kontrata nga magapatigayon sini.¹⁷

Kon makahambal ako sa tagsa ka lalaki ukon babayi nga nagahandum sang kasal pero wala pa makita ang ila mangin kaupod sa katubtuban, ginapaisog ko kamo nga indi na maghulat nga makasal antes ma-endow sa balay sang Ginuo. Sugdi na karon sa pagtuon kag pag-eksperiyensya kon ano ang kahulugan sang maarmasan sang gahum sang priesthood.

Kag sa kada isa sa inyo nga naghimo na sang mga kasugtanan sa templo, nagapangabay ako sa inyo nga tinguhaon—sing mainampuon kag tayuyon—nga intiendihon ang mga kasugtanan kag ordinansa sang templo.¹⁸ Ang espirituhanon nga mga pwertahan magabukas. Matun-an ninyo kon paano buksan ang belo sa tunga sang langit kag duta, kon paano pangayuon sa mga anghel sang Dios nga magbulig sa inyo, kag kon paano mas makabaton sing direksyon halin sa langit. Ang inyo matutom nga pagpaninguha sa paghimo sini magapalig-on kag magapabakod sang inyo espiritwal nga pundasyon.

Pinalangga kong mga kauturan, kon matapos na ang pagkay-o sang Templo sang Salt Lake, wala na sing mas hilway pa nga lugar sa tion sang linog sa Salt Lake Valley sangsa sa sulod sinang templo.

Sa amo man, kon may bisan ano nga pagtay-og nga nagakatabo sa inyo kabuhi, ang lugar nga pinakamalayo sa disgrasya sa espirituhanon amo ang pagtiner sa sulod sang inyo mga kasugtanan sa templo!

Palihog patiha ako kon magsiling ako nga kon ang inyo espiritwal nga pundasyon mabakod nga napasad kay Jesucristo, kamo indi kinahanglan nga mahadlok. Samtang tampad kamo sa inyo mga kasugtanan nga ginhimo sa templo, pagapabakuron kamo paagi sa Iya gahum. Dayon, kon matabo ang espirituhanon nga mga linog, magapabilin kamo nga mabakod tungod ang inyo espiritwal nga pundasyon mapag-on kag indi maisdog.

Palangga ko kamo, mahal kong kauturan. Ining mga kamatuoran nahibal-an ko: Ang Dios, nga aton Amay nga Langitnon, luyag nga inyo pilion nga magpauli sa Iya. Ang Iya plano sang wala katapusan nga pag-uswag indi komplikado, kag ginatahod sini ang inyo kahilwayan sa pagpili. Libre kamo nga pilion kon sin-o ang gusto ninyo nga mangin—kag kon sin-o ang inyo mangin kaupod—sa kalibutan nga maabot!

Buhi ang Dios! Si Jesus ang Cristo! Iya ini Simbahan, nga ginpanumbalik agud magbulig sa inyo nga malab-ot ang inyo diosnon nga kadangatan. Ginasaksi ko ini sa sagrado nga ngalan ni Jesucristo, amen.

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, November 2021. Hiligaynon. 17475 861