“Ang Pagtuo nga Magpangayo kag Dayon Mag-akto,” Liahona, Nob. 2021.
Bulanan nga Mensahe sa Liahona, Nobyembre 2021
Ang Pagtuo nga Magpangayo kag Dayon Mag-akto
Mga Bahin (Excerpts)
Ang paagi sang pagbaton sang rebelasyon halin sa Dios wala nagbag-o halin pa sa panahon ni Adan kag Eva. Pareho lang ini gihapon sa tanan nga gintawag nga mga alagad sang Ginuo halin sa ginsuguran asta subong. Pareho man ini para sa inyo kag sa akon. Matigayon ini pirme paagi sa pagpakita sang pagtuo. …
… May mga pamangkot kamo nga ginapangitaan ninyo sang sabat. Sa pinakakubos, may bastante kamo nga pagtuo nga maglaum nga makabaton sang sabat halin sa Ginuo paagi sa Iya mga alagad. Wala kamo sing tsansa nga mamangkot sing matunog agud sabton sang mga humalambal, pero makapamangkot kamo sa inyo mahigugmaon nga Amay sa pangamuyo.
Nahibal-an ko halin sa inagihan nga ang mga sabat mabaton nga sibu gid sa inyo mga panginahanglan kag inyo espirituhanon nga paghanda. …
Kon ang inyo pagtuo kay Jesucristo nagresulta sa mapainubuson nga tagipusuon bilang epekto sang Iya Pagbayad-Sala, mas mabatyagan ninyo ang impluwensya sang Espiritu bilang sabat sa inyo mga pangamuyo. …
Bangod ang aton pagtuo kay Jesucristo magatuytoy sa aton nga mangayo sa Amay sang mga sabat, inang pagtuo magadala man sang impluwensya sang Manluluwas nga igo agud mabatian naton ang Iya direksyon kag mangin desidido kag malipayon sa pagtuman. …
Akon panaksihon nga ang bato nga aton ginatindogan amo ang aton saksi nga si Jesus ang Cristo, nga Iya ini Simbahan nga personal Niya nga ginapangunahan, kag si Pangulong Russel M. Nelson ang Iya buhi nga propeta subong. …
Pangamuyo ko nga makaangkon kamo sang amo man nga saksi.
Drowing sang Templo sang Córdoba Argentina