Te Kairiri ibukin te Raoiroi ni Kabuta te Aonnaba

Inanon aia tai n mwakuri burabeti ma abotoro, bannaia aika raraoi aikai a kakabwaiaaki iai maiuia aika rawata ao e karekea te nano ni kan mwakuri n ibuobuoki, te ikarekebai ao ai te kantaninga. Aikai tabeua mwakuri aika kakaongora inanon te onoua n namwakaina ae nako aio.

N tain te Tokyo Summer Olympics, e katokaa ana maroro Beretitenti Russell M. Nelson iaon bwaai n reitaki n te intanete ibukin kakeaan te itabaraaraa ao karekean tangiran te iraorao, te karinerine ao ai te ikarekebai.

Unimwaane Jeffrey R. Holland man te Kooram n Abotoro n te Tengaun ma Uoman e ira te maungatabu iaon te witeo ni kabuta te aonnaba are e boo i Windsor, England. Taan maroro n te maungatabu a taekin rotakin marurungin aia iango ma nanoia mirion aomata ake a mena n taabo ake a kamaekaaki iai naake a birinako mai abaia. Unimwane Holland e kanakoa ana kakao ibukin boutokaia taan birinako mai abaia bwa a na kona n kaoti aia aro n onimaki are ngaia ae e anganiia kinakiia.” Titita Sharon Eubank, te Moan Kauntira n te Beretitentii ni Kabuta n te Bootaki n Aine ao te beretitenti n te Latter-day Saints Charities e maroro naba n te maungatabu.

Unimwaane Quentin L. Cook man te Kooram n Abotoro n te Tengaun ma Uoman e maroro n te boowi teuana ibukin te ikarekebai n aaro aika kakaokoro are e boo i Notre Dame University i Indiana, USA. Unimwaane Cook e kakaewenakoia kain te boowi bwa “a na tei bwa banna n te onimaki ao ni bobonnano n te aonnaba ae e aki kakoauai bwaai aikai.”

Unimwaane Ronald A. Rasband man te Kooram n Abotoro n te Tengaun ma Uoman e maroro n te G20 Interfaith Forum are e boo i Bologna, Itare. (Aban te G20 a tei bwa 20 maibuakon aban te aonaaba are a bubura man korakora.) E taku Unimwaane Rasband, “Ngkana a karekea te inaomata aro bwa a na rikirake, taan kakoaua n taabo nako a na kona n karaoi mwakuri n ibuobuoki aika uarereke ao man kamimi. N te boowi naba anne, ao Titita Eubanks e taekin naba rotakia ataei ake a kainnano n te baki ao te aki baaranti ni kainaia. E taku naba neiei … te Bitaki e na ti kona n reke man te reitaki ae boboto iaon te onimaki.

Imwin ana urubwai mwaingingin Haiti, Unimwaane Ulisses Soares man te Kooram n Abotoro n te Tengaun ma Uoman e maroro n teuana te bootaki n rawerawe nakoia membwa ake a taetae n Buranti n te Carribean, n kauringiia ae te “onimaki e na kamwakura mwaakan te Atua inanon maiura.” Titita Reyna I. Aburto, te Kauoman ni Kauntira n te Bootaki n Aine n te Beretitentii ni Kabuta, e ira naba te bootaki aio ao e taetae rinanon te intanete nakoia membwa ake n taian boowi ibukia taan kairiri ao n taian maungatabu n titeiki. E taku naba neiei bwa, ti kona n tei n matoa e ngae ngkana e kaoti te ang ao e ruru te aba.” Unimwaane Soares e maroro naba n te bootaki n rawerawe ibukiia kairake n te Carribean, n kauringiia ae “ti kainnanoa ana kairiri te Tamnei ae Raoiroi inanon maiura.”