“Famli Histri I Helpem Ol Bubu Blong Yumi,” Liahona, Disemba 2021
Liahona Mesej blong Evri Manis, Disemba 2021
Famli Histri I Helpem Ol Bubu blong Yumi
Famli histri i blong faenemaot mo stap lanem abaot ol memba blong famli blong yumi. Yumi karem tugeta tu ol infomesen abaot ol bubu blong yumi blong yumi save mekem tempol wok blong olgeta.
Ol Famli oli stamba long plan blong hapines blong Papa long Heven. Hem i rere wan rod blong ol famli oli save gohed blong stap blong taem we i no save finis. Taem yumi stap mekem famli histri blong yumi mo tempol wok, yumi stap help blong karem ol memba blong famli blong yumi we oli stap laef mo olgeta we oli ded finis i kam tugeta. (“Tempol wok” i minim blong kasem ol odinens long tempol blong yumi wan, olsem yu sil wetem man o woman blong yu, mo tu yu mekem ol odinens long tempol blong ol bubu blong yu.)
Famli Histri mo Tempol Wok
Evri man we i bin laef o we bae i laef long wol ia, i nidim ol odinens blong gospel. Sapos ol bubu blong yumi oli no bin gat janis ia, yumi save mekem ol odinens ia blong olgeta insaed long tempol. Wan long ol odinens ia i blong sil wetem ol memba blong famli. Blong “sil” i minim se bae yumi save laef blong taem we i no save finis sapos ol famli blong yumi oli stret mo gud. Yumi save sil i go long ol famli blong yumi insaed long tempol nomo.
Ol Blesing blong Famli Histri Wok
Famli histri i save helpem yumi bildimap rilesensip blong yumi wetem ol famli memba blong yumi we oli stap laef. Taem yumi serem ol stori, ol foto, mo ol narafala memori wetem wanwan long yumi, yumi stanemap koneksen wetem famli. Yumi bildimap tu lav we yumi gat wetem wan wan long yumi. Ol Profet oli promes se taem yumi stap wok long famli histri blong yumi, bae i karem yumi i kam kolosap long Jisas Kraes.
Faenemaot Ol Bubu Blong Yumi
Papa long Heven i wantem yumi blong sil wetem ol famli blong yumi we oli stap laef naoia mo wetem ol bubu blong yumi. Bifo yumi save sil wetem ol bubu blong yumi, yumi nid blong faenem mo sevem ol infomesen abaot olgeta. Be famli histri i moa bitim blong lukaotem nomo ol nem, ol deit, mo ol ples. Taem yumi stap lanem abaot ol bubu blong yumi, bae yumi filim se yumi stap konek moa wetem olgeta.
© 2021 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem translesen: 6/19. Translesen blong Monthly Liahona Message, December 2021. Bislama. 17476 852