“Family History Helps Our Ancestors,” Liahona, December 2021
ຂ່າວສານປະຈຳເດືອນ Liahona, ເດືອນທັນວາ 2021
ການສືບປະຫວັດຄອບຄົວຊ່ວຍເຫລືອບັນພະບຸລຸດຂອງເຮົາ
ການສືບປະຫວັດຄອບຄົວຄືການຄົ້ນພົບ ແລະ ຮຽນຮູ້ກ່ຽວກັບສະມາຊິກໃນຄອບຄົວຂອງເຮົາ. ເຊັ່ນດຽວກັນເຮົາໄດ້ຮວບຮວມຂໍ້ມູນກ່ຽວກັບບັນພະບຸລຸດຂອງເຮົາເພື່ອວ່າເຮົາຈະສາມາດເຮັດວຽກງານພຣະວິຫານແທນພວກເພິ່ນ.
ຄອບຄົວເປັນສູນກາງຂອງແຜນແຫ່ງຄວາມສຸກ ຂອງພຣະບິດາເທິງສະຫວັນ. ພຣະອົງໄດ້ກຽມທາງໃຫ້ຄອບຄົວດຳເນີນໄປຕະຫລອດການ. ຂະນະທີ່ເຮົາເຮັດວຽກງານການສືບປະຫວັດຄອບຄົວ ແລະ ວຽກງານພຣະວິຫານ, ເຮົາໄດ້ຊ່ວຍນຳເອົາສະມາຊິກໃນຄອບຄົວຂອງເຮົາ, ທັງທີ່ມີຊີວິດຢູ່ ແລະ ທີ່ຕາຍໄປແລ້ວ, ມາຮວມກັນ. (“ວຽກງານພຣະວິຫານ” ໝາຍເຖິງ ການຮັບພິທີການຕ່າງໆຂອງພຣະວິຫານ ໃຫ້ກັບຕົວເຮົາເອງ, ເຊັ່ນວ່າການຜະນຶກເຂົ້າກັບຄູ່ຄອງຂອງເຮົາ, ຕະຫລອດທັງການເຮັດພິທີການຕ່າງໆໃນພຣະວິຫານແທນບັນພະບຸລຸດຂອງເຮົາ.)
ການສືບປະຫວັດຄອບຄົວ ແລະ ວຽກງານພຣະວິຫານ
ທຸກຄົນຜູ້ທີ່ເຄີຍມີຊີວິດຢູ່ ຫລື ຜູ້ທີ່ຈະມີຊີວິດຢູ່ໃນໂລກຕ້ອງການພິທີການຕ່າງໆຂອງພຣະກິດຕິຄຸນ. ຖ້າບັນພະບຸລຸດຂອງເຮົາຍັງບໍ່ໄດ້ຮັບໂອກາດນັ້ນ, ເຮົາສາມາດປະຕິບັດພິທິການຕ່າງໆແທນພວກເພິ່ນໄດ້ໃນພຣະວິຫານ. ໜຶ່ງໃນພິທີການເຫລົ່ານັ້ນຄືການຜະນຶກເຂົ້າກັບສະມາຊິກໃນຄອບຄົວ. ການ “ຜະນຶກ” ໝາຍຄວາມວ່າ ເຮົາຈະສາມາດຢູ່ກັບຄອບຄົວຂອງເຮົາຕະຫລອດໄປ ຖ້າເຮົາເປັນຄົນຊອບທຳ. ເຮົາສາມາດຜະນຶກເຂົ້າກັບຄອບຄົວຂອງເຮົາໃນພຣະວິຫານເທົ່ານັ້ນ.
ພອນຕ່າງໆຂອງວຽກງານສືບປະຫວັດຄອບຄົວ
ການສືບປະຫວັດຄອບຄົວສາມາດຊ່ວຍເຮົາສ້າງຄວາມເຂັ້ມແຂງໃຫ້ກັບຄວາມສຳພັນຂອງເຮົາກັບສະມາຊິກໃນຄອບຄົວທີ່ມີຊີວິດຢູ່ຂອງເຮົາ. ຂະນະທີ່ເຮົາແບ່ງປັນເລື່ອງລາວ, ຮູບຖ່າຍ, ແລະ ຄວາມຊົງຈຳຕ່າງໆດ້ວຍກັນ, ເຮົາໄດ້ສ້າງຄວາມຜູກພັນໃນຄອບຄົວ. ເຮົາຍັງເສີມສ້າງຄວາມຮັກທີ່ເຮົາມີໃຫ້ກັນອີກດ້ວຍ. ສາດສະດາຫລາຍທ່ານໄດ້ສັນຍາເຊັ່ນດຽວກັນວ່າ ການເຮັດວຽກງານສືບປະຫວັດຄອບຄົວຂອງເຮົາຈະນຳເຮົາເຂົ້າໃກ້ພຣະເຢຊູຄຣິດຫລາຍຂຶ້ນ.
ການຊອກຫາບັນພະບຸລຸດຂອງເຮົາ
ພຣະບິດາເທິງສະຫວັນປະສົງໃຫ້ເຮົາຜະນຶກເຂົ້າກັບຄອບຄົວປະຈຸບັນຂອງເຮົາ ແລະ ກັບບັນພະບຸລຸດຂອງເຮົາ. ກ່ອນທີ່ເຮົາຈະສາມາດຜະນຶກເຂົ້າກັບບັນພະບຸລຸດຂອງເຮົາ, ເຮົາຕ້ອງຊອກຫາ ແລະ ເກັບກຳຂໍ້ມູນກ່ຽວກັບພວກເພິ່ນເສຍກ່ອນ. ແຕ່ການສືບປະຫວັດຄອບຄົວມີຄວາມໝາຍຫລາຍກວ່າການຄົ້ນຫາຊື່, ວັນທີ, ແລະ ສະຖານທີ່ຕ່າງໆ. ຂະນະທີ່ເຮົາຮຽນຮູ້ກ່ຽວກັບບັນພະບຸລຸດຂອງເຮົາ, ເຮົາຈະຮູ້ສຶກຜູກພັນກັບພວກເພິ່ນຫລາຍຂຶ້ນ.
© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, December 2021. Laotian. 17476 331