“Akon ang mga Ini kag Nakahibalo Ako sa mga Ini,” Para sa Kusog sang mga Lamharon, Ene. 2022.
Bulanan nga Mensahe sang Para sa Kusog sang mga Lamharon, Enero 2022
“Akon ang mga Ini kag Nakahibalo Ako sa mga Ini”
Litrato gikan sa Getty Images
Nakabatyag ka na bala nga daw wala ka sing importansya? Mahimo nga nakabatyag ka sini sang ginhunahuna mo kon pila kabilog ang tawo sa kalibutan ukon sang gintulok kon pila kabilog ang mga bituon sa langit. Nakapamangkot ka bala kon ang Dios nakakilala gid matuod sa imo kag nakahibalo kon daw ano ang imo kabuhi? Kon amo, may mensahe si Moises para sa imo.
Sa isa ka palanan-awon, ginpakita sang Dios kay Moises ang kada pintok sa duta kag ang tanan nga tawo nga magaistar didto. Ang mga ini “indi maisip pareho sang balas sa baybayon” (Moises 1:28). Dayon ginsiling sang Dios kay Moises nga nagtuga Sia sang “mga kalibutan nga di-maisip” (Moises 1:33)—nga ang Iya mga pinanuga nagalab-ot malayo pa sa sining duta.
Siguro daw indi makapati si Moises sang makita niya ini tanan. Siguro namensar sia: Sa diin ang akon lugar sa tunga sining tama kadamo nga pinanuga? Kag paano sang Dios madumduman ang amo sini kadamo?
Ang sabat sang Dios simple lang: “Ang tanan naisip ko.” Paano? “Akon ang mga ini kag nakahibalo Ako sa mga ini” (Moises 1:35). Kilala sang Dios kon sin-o si Moises, pareho nga kilala Niya ang tanan Niya nga kabataan, amo man ang tanan Niya nga gintuga. Ini tanan Iya—ang mga bituon, ang balas, kag labi na gid ang Iya mga anak sa duta. Sila ang bug-os nga rason nga Iya gintuga ang duta. Ang ila wala katapusan nga kaluwasan amo ang pinakaimportante nga buluhaton sang Dios.
“Kay tan-awa, ini ang akon buluhaton kag akon himaya—ang ipahanabo ang pagkawala’y kamatayon kag kabuhi nga wala’y katapusan sang tawo” (Moises 1:39).
Pareho nga natun-an ni Moises kon ano ang iya lugar sa plano sang Dios, ikaw man makasalig nga kilala ka sang Dios! Ang pagbulig sa imo nga makabalik sa Iya amo ang Iya buluhaton kag himaya. Ngaa? Kay Iya ka. Kag wala sang indi importante sa sina!
© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, December 2021. Hiligaynon. 18295 861