Bulanan nga Mensahe sa Liahona, Enero 2022

Ang Pagkahulog Bahin sang Plano sang Dios

Bangud sang Pagkahulog, nakakadto kita sa duta kag sa pila ka adlaw makabalik sa pagpuyo upod sa aton Amay sa Langit.

Adam and Eve in the Garden of Eden [Si Adan kag si Eva sa Hardin sang Eden], ni Robert T. Barrett

Sa Hardin sang Eden, ginsugo sang Dios sanday Adan kag Eva nga indi magkaon sang bunga sang kahoy sang ihibalo sang maayo kag malain. Dayon siling Niya sa ila, “Mahimo [kamo] magpili para sa [inyo] kaugalingon, … pero dumduma nga ginadilian ko ini” (Moises 3:17). Gintentar ni Satanas si Eva nga magkaon sang bunga sang kahoy. Siling niya sa iya, “Mangin pareho kamo sa mga dios, nga nakahibalo sang maayo kag malain” (Moises 4:11). Ginkaon niya ang prutas kag dayon ginhatagan man sini si Adan. Ginpa-gwa sila sang Dios sa Hardin sang Eden.

Ang Pagkahulog

Adam and Eve Cast Out of the Garden [Si Adan kag si Eva Gintabog Pa-gwa sa Hardin], ni Gary L. Kapp, indi mahimo nga kopyahon

Sang nagbiya sanday Adan kag Eva sa Hardin sang Eden, wala na sila sa presensya sang Dios. Ining pagseparar gikan sa Dios ginatawag nga espirituhanon nga kamatayon. Ang paghalin sa hardin nagakahulugan man nga sanday Adan kag Eva nangin mortal kag gani mahimo na nga mapatay. Bisan pa nga indi na kaupod nanday Adan kag Eva ang Dios kag mga mortal na sila, malipayon sila kag may paglaum sang makita nila nga sarang sila nga magprogreso (tan-awa sa Moises 5:10–11). “Si Adan napukan agud ang tawo mabuhi; kag ang tawo nagakabuhi, agud sila makaangkon sing kalipay” (2 Nefi 2:25).

Isa ka Tion sang Pagtilaw

Sang mabun-ag kita, nagapuyo kita nga malayo sa Dios, pareho sa ila ni Adan kag Eva pagkatapos sang Pagkahulog. Ginatentar kita ni Satanas nga maghimo sang malain nga mga pagpili. Ining mga tentasyon nagatugot sa aton nga matilawan kag magpili sa tunga sang husto kag sayop (tan-awa sa Alma 12:24). Tagsa nga makasala kita kag indi maghinulsol, nagapalayo pa gid kita sa Amay nga Langitnon. Pero kon maghinulsol kita, nagapalapit kita sa aton Amay sa Langit.

Pisikal nga Kamatayon

Ang duta gintuga para sa aton (tan-awa sa 1 Nefi 17:36). Ang Pagkahulog nagtugot kanday Adan kag Eva nga tumanon ang sugo sang Dios nga mag-angkon sang mga anak, nga nagatugot sa aton nga magkari sa duta nga may pisikal nga lawas. Ang aton mga lawas mapatay pila ka adlaw, pero ang aton mga espiritu padayon nga magakabuhi. Ang aton mga lawas kag mga espiritu magaupod liwat kon mabanhaw kita.

Ginluwas ni Jesucristo

The Resurrection [Ang Pagkabanhaw], ni Harry Andersen

Paagi sa nagabayad sala nga gahum ni Jesucristo, sarang naton dag-on ang pisikal kag espirituhanon nga kamatayon. Tungod nabanhaw si Cristo, ang tanan nga natawo sa sining duta mabanhaw kag magakabuhi sa katubtuban. Kag tungod nag-antos si Cristo para sa aton mga sala, sarang kita nga maghinulsol kag mapatawad agud makapuyo liwat upod sa aton Amay sa Langit.

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, January 2022. Hiligaynon. 18295 861