Lokol Pej
Ol Enjel Oli Singsing wetem Mifala
Long Sandei Moning blong Oklan Papatoetoe Stek Epril 2021 Konfrens, taem japel i emti yet i stap, ol memba blong Masi Pak Wod oli kam oli fulumap ol jea biaen long pulpit blong rere from las kwaea praktis. Bae long teti minit taem, bae oli singsing ol fasfala singsing, blong invaetem Tabu Spirit, mo blong givim stret tiun blong las sesen blong konfrens.
Long piano, mi wet blong mi stat. Kondakta blong mifala, Brata Moronae Westerlund, i mekem olgeta blong singsing oli rere, nao i sakem han blong fas not blong kwaea. . . Hat blong mi i pam. Mifala i praktis blong plante manis, be yet, singsing ia i no gud yet long wei we i sapos blong saon.
Ova long miusik blong piano, mi save harem plante voes we oli seksek. Mi harem sam pat oli go lus long sam seksen, mo mekem man i nomo gat tras, mo insaed long maen blong mi, mi prea: “Be Papa long Heven. . . Mifala i rili traehad.”
Taem mifala i stap jek wan las taem, mi tingtingbak long evri samting mifala i mekem rere from dei ia. Bisop blong mifala i glad blong akseptem stek kwaea asaenmen ia, wetem ful fet long wod blong hem. Miusik kodineta blong mifala, Sista Benjy Maugatai, i jusum huia bae i kondakta mo huia i stap long piano, mo afta, i oganaesem miusik, mo i singaotem ol dei blong praktis. Mifala i jusum miusik we i go wetem we i naes be i simpol, from se mifala i save se wan smol namba nomo i save ridim ol not, mo plante oli neva singsing long wan kwaea.
Be oli kamkamaot. Nomata oli gat ol nara komitmen, kwaea blong mifala i kam bigwan, we kolosap i no gat inaf ples antap long stan. . . Mo mifala i praktis fulap.
I klia stat long stat finis se bae mifala i no wan gudfala kwaea, be long Brata Westerlund, sapos olgeta we oli singsing oli hapi mo oli traem bes blong olgeta, bae hem i talem: ‘letem olgeta nomo oli singsing.’
Mifala i komplitim ol praktis blong mifala we i no gat hop long hem, mo mi luk Brata Westerlund. Hem i jes smael, mo i toktok long kwaea wan moa taem.
“Yumi stap singsing long miusik ia, i no blong soem ol skil blong yumi,” hem i talem, “be blong serem testemoni blong mifala. Taem yu stap singsing, tingbaot se wan insaed long kongregesen i nidim blong filim spirit mo fet blong yu. Hemia nao tru asaenmen blong mifala long ples ia tedei.”
I no longtaem afta, japel i fulap i go kasem bak blong japel. Taem ol lida blong stek mo eria oli go sidaon, Brata Westerlund i mekem saen blong kwaea i stanap.
Mi statem ol fas not blong piano blong singsing ol fas hym, mo taem fas not blong kwaea i kamaot, mi no save bilivim wanem mi stap harem. !Hem i wan ful, klia, naesfala saon! Mi nomo luk miusik pepa blong mi, mi lukluk i go wetem sapraes. “?Huia i stap singsing?”
I tru, i sem grup ia nomo we i saen, ol fetful memba blong wod, be klia olsem saen blong san we i kamtru long ol keten blong japel long tetaem ia, mi bin harem tu wan grup blong ol pipol we mi no save luk, ol gudfala singga, we oli sapotem kwaea. Fasfala miusik blong mifala i naes tumas. Tufala nekis singsing, oli bin naes tumas, mo i semmak long swit spirit we i kam kavremap ful miting blong mifala.
I no miwan nomo we i luksave merikel ia long dei ia. Desmond Maugatai—wan we i sing tena—i bin talem afta” “mi save testifae . . . Se taem yumi stat blong singsing, mi bin harem tu niufala voes, wan kolosap long lef solda blong mi, mo wan long raet saed blong mi, mo tufala i no eniwan we mi mi save we i stap long kwaea blong yumi.”
Kayla Tagavaitau, we i gat twelef yia, i tokbaot semfala eksperiens long mama blong hem. Hem i bin fas taem blong hem blong sing long kwaea, mo afta long konfrens, hem i talem: “Mama. . . Mi filim se taem yumi bin stap singsing, ol enjel oli bin stap singsing wetem yumi.”
Mi bin pat blong plante kwaea ova long plante yia, be kwaea ia, i bin konfemem wan paten we mi bin luk. Taem yumi mekem bes blong yumi blong lanem miusik, taem yumi traehad evriwan blong komitim yumi long ol praktis, taem we yumi no givap, iven taem yumi gobak arier mo yumi no glad smol, taem we yumi “wok strong wetem strong tingting, “I nomata long ol wiknes blong yumi, mo “afta long evri samting we yumi save mekem,” (2 Nifae 25:23), Papa long Heven bae i fulumap ol ples we yumi no strong long ol, “blong mekem se tru long gladhat blong hem, bae yumi save kam stret evriwan long Kraes” (Moronae 10:32).
Hem i iven save sendem ol enjel blong Hem oli kam singsing wetem yumi.