Bosoom Bosoom Liahona Amandzɛɛbɔ, Sanda 2022

Nna Asehwe no Kã Nyankopɔn Ne Nhyehyɛɛ ho

Osian Asehwe no ntsi, yeenya dɛ yɛba asaase do na dakor yebotum asan nye hɛn Egya a ɔwɔ Sor akɛtsena.

Adam na Eve a wɔwɔ Eden Ture no mu, Robert T. Barret yɛɛ nsaano mfonyin no

Eden Ture no mu no, Nyankopɔn hyɛɛ Adam na Eve mbra dɛ mma wonndzi papa na bɔn ho nyimdzee dua n’eduaba no bi. Na Ɔkãa kyerɛɛ hɔn dɛ, “Eso [hom] botum afa dza [homara] pɛ ama [homho], … mbom [hom] nkaa dɛ mabra” (Moses 3:17). Satan daadaa Eve dɛ ondzi dua no n’eduaba no bi. Ɔkãa kyerɛɛ no dɛ, “Hom bɛyɛ dɛ enyame, na hom ehu papa nye bɔn” (Moses 4:11). Odzii eduaba no na nkyii ɔmaa Adam bi. Nyankopɔn yii hɔn edzi fii Eden Ture no mu.

Asehwe

Adam na Eve a wɔapam hɔn efi Eden Ture no mu, Gary L. Kapp yɛɛ nsaano mfonyin no, onnyi dɛ wɔkɔpe

Ber a Adam na Eve fii Eden Ture no mu no, nna wonnyi Nyankopɔn N’enyim bio. Nyankopɔn ntamu mpaapaamu yi wɔfrɛ no sunsum mu owu. Worifi ture no mu no so kyerɛ dɛ Adam na Eve nnyɛ bɛkyebo na dɛm ntsi wobotum ewu. Nna Adam na Eve nnyi Nyankopɔn nkyɛn bio na afei wɔnnyɛ bɛkyebo dze, naaso nna hɔn enyi gye na wɔwɔ enyidado ber a wohun dɛ wobotum etu mpon (hwɛ Moses 5:10–11). “Adam hwee ase ama adasa aabɛtsena ase; na adasa tse ase, ama woeenya enyigye.’’ (2 Nephi 2:25).

Nsɔhwɛ Mber

Ber a wɔwoo hɛn no, nna yɛnnye Nyankopɔn nntse bio, tse dɛ Adam na Eve wɔ Asehwe no ekyir no. Satan sɔ hɛn hwɛ dɛ yɛbɛyɛ nsanmuyi bɔn. Nsɔhwɛ horow yinom ma kwan ma wɔsɔ hɛn hwɛ na yɛsan mu yi papa nye bɔn ntamu (hwɛ Alma 12:24). Ber biara a yɛyɛ bɔn na yennu hɛnho no, yefi Ɔsor Egya nkyɛn kɔ ekyir. Mbom sɛ yenu hɛnho a, yɛtwe bɛn hɛn Ɔsor Egya nkyɛn yie.

Honandua mu owu

Wɔbɔɔ asaase no maa hɛn (hwɛ 1 Nephi 17:36). Asehwe no maa kwan ma Adam na Eve etum edzi Nyankopɔn ne mbra do dɛ wɔnwo mba, a ɔma kwan ma yɛdze honandua ba asaase do. Dabi hɛn honandua no bowu, mbom hɛn esunsum bɔkɔ do atsena ase. Hɛn honandua na esunsum bɔbɔ mu bio ber a yenya wusoɛr no.

Jesus Christ Agye Hɛn Nkwa

Wusoɛr no, Harry Anderson yɛɛ nsaano mfonyin no

Ɔnam Jesus Christ no werdam bɔ no tum do no, yebotum edzi honandua na sunsum mu owu do konyim. Osiandɛ Christ soɛree fii ewufo mu no ntsi, obiara a wɔwoo no asaase yi do bɔsoɛr efi owu ma na ɔatsena ase afebɔɔ. Na osiandɛ Christ hun amandze wɔ hɛn bɔn ho ntsi, yebotum enu hɛnho na wɔdze hɛn bɔn akyɛ hɛn ama yeetum yɛnye hɛn Ɔsor Egya atsena bio.

© 2021 odzi wɔ Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, January 2022 ne Nkyerɛasee. Fante. 18295 502