“Puhtatlac Sac Ipin Pacna Plwacn Luhn God” Liahona, Jacnweri 2022
Mahlwem nuhkwewa Liahona Sramsram, Jacnweri 2022
Puhtatlac Sac Ipin Pacna Plwacn Luhn God
Ke srihpen Puhtatlac Sac, kuht tuhkuh nuh facluh ac kuh in fohlohk sie pacl weluhl Pahpah Tuhmasr Inkuhsrao muhta.
Adam ac Eve ke Inimac Eden, by Robert T. Barrett
Ke Inimac Eden, God El sapkihn nuh sel Adam ac Eve in tiacna kang fukunsahk se ma oasr kahlwem la inmahsrlon ma wo ac koluk ah. Na El fahk nuh selos, “Kowos fah sulaclah nuh suwos sifacna, … tuhsruhktuh, esam lah Nga tiac lwelah” (Moses 3:17). Satan El srihfacl Eve in kanglah fukunsahk sac. El fahk nuh sel, “Kom fah oacna God, etuh ke ma wo ac koluk” (Moses 4:11). El kanglah fukunsahk sac ac na El akacsruhi nuhsel Adam. God El luhsuhltahlwack liki Inimac Eden.
Puhtatlac Sac
Adam ac Eve Lihsyucklac liki Inimac, sel Gary L. Kapp, sahp tiac enenuh in kapiyucki
Ke Adam ac Eve som liki Inimac Eden, elos wacngihnlac liki ye muhtuhn God. Fahsrelihk luhkwel God uh pahngpahng misac luhn nguhn. Som liki inimac sac oacyacpac kalmac pa Adam ac Eve eklac oasr mahno in ikoac ac sri ac ohinge elos kuh in misac. Finne Adam ac Eve tilac weluhl God ac ke pacl sacn moul in mahno, elos engan ac finsraki ke pacl se elos liye muh elos kuh in kapkapwack (liye Moses 5:10–11). “Adam el puhtatlac tuh mwet uh in kuh; ac enenuh in moul, tuh elos in kuh in engan” (2 Nephi 2:25).
Pacl in Srihkeyuck
Ke kuht isuslac uh, kuht muhta loes luhkwel Pahpah God, oacna ke Adam ac Eve oruh ke Puhtatlac sac. Satan El srihfwe kuht in oraclah sulaclah koluk. Mwe sruhf inge lwelah nuh sesr in srihkeyuck ac sulaclah inmahsrlon ma pwacye ac stuhuh (liye Alma 12:24). Kais sie pacl kuht oruh ma koluk, ac tiac auliyak, kuht loesaclihk nuh yurin Pahpah Lucng. Tuh kuht fin auliyak, kuht ac muh fototoyang nuh yurin Pahpah Tuhmasr Inkuhsrao.
Misac luhn Mahno
Facluh oreklac nuh sesr (liye 1 Nephi 17:36). Puhtatlac sac oruh fihsrwacsr nuh sel Adam ac Eve in tahfwelah masap luhn God in Orek tuhlihk, lwelah nuh sesr in tuhkuh nuh facluh ke sie mahno in ikoac ac sri. Mahnosr fah sie pacl misac, tuh nguhnasr fah tahfwelah in moul. Mahnosr ac nguhnasr fah sifil fohlohkweni ke kuht sifil moulyak uh.
Moullac sel Jisus Kraist
Sifil Moulyak, sel Harry Andersen
Ke kuh in iwaclah luhn Jisus Kraist, kuht kuh in kuhtanglah misac luhn mahno ac nguhn. Ke srihpen Kraist El sifil moulyak, mwet nuhkwewa suc ma isuslac fin facluh fah sifil moulyak ac muhta ma pahtpaht. Ac ke srihpen Kraist El kweoki ke ma koluk lasr, kuht kuh in auliyak ac eis nuhnakmuhnahs tuh lah kuht kuh in sifil wi Pahpah Tuhmasr Inkuhsrao muhta.
© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Monthly Liahona Message, January 2022. Kosraean. 18295 868