“The Fall Was Part of God’s Plan,” Liahona, January 2022
ຂ່າວສານປະຈຳເດືອນ Liahona, ເດືອນມັງກອນ 2022
ການຕົກແມ່ນພາກສ່ວນໜຶ່ງໃນແຜນຂອງພຣະເຈົ້າ
ຍ້ອນການຕົກ, ເຮົາຈຶ່ງໄດ້ມາສູ່ໂລກນີ້ ແລະ ສາມາດກັບຄືນໄປຢູ່ກັບພຣະບິດາຜູ້ສະຖິດໃນສະຫວັນຂອງເຮົາອີກຄັ້ງ.
Adam and Eve in the Gorden of Eden [ອາດາມ ແລະ ເອວາຢູ່ໃນສວນເອເດນ], ໂດຍ ຣໍເບີດ ທີ ບາແຣັດ
ໃນສວນເອເດນ, ພຣະເຈົ້າໄດ້ບັນຊາອາດາມ ແລະ ເອວາ ບໍ່ໃຫ້ກິນໝາກໄມ້ຈາກຕົ້ນໄມ້ແຫ່ງຄວາມຮູ້ດີ ແລະ ຮູ້ຊົ່ວ. ແລ້ວພຣະອົງໄດ້ບອກເຂົາເຈົ້າອີກວ່າ, “ເຈົ້າສາມາດເລືອກເພື່ອຕົວເອງ, … ແຕ່, ຈຳໄວ້ວ່າເຮົາຫ້າມເຈົ້າ” (ໂມເຊ 3:17). ຊາຕານໄດ້ລໍ້ລວງເອວາໃຫ້ກິນໝາກໄມ້ຂອງຕົ້ນນັ້ນ. ມັນໄດ້ບອກນາງວ່າ, “ພວກເຈົ້າຈະກາຍເປັນເໝືອນດັ່ງພຣະເຈົ້າ, ຮູ້ຈັກດີ ແລະ ຮູ້ຈັກຊົ່ວ” (ໂມເຊ 4:11). ນາງໄດ້ກິນໝາກໄມ້ນັ້ນ ແລະ ແລ້ວໄດ້ເອົາໄປໃຫ້ອາດາມກິນ. ພຣະເຈົ້າໄດ້ສົ່ງເຂົາເຈົ້າອອກໄປຢູ່ນອກສວນເອເດນ.
ການຕົກ
That Ye Do Always Remember Me [ວ່າເຈົ້າລະນຶກເຖິງເຮົາຢູ່ຕະຫລອດເວລາ], ໂດຍ ແກຣີ ແອວ ແຄບ, ຫ້າມຄັດລອກ
ເມື່ອອາດາມ ແລະ ເອວາໄດ້ອອກຈາກສວນເອເດນ, ເຂົາເຈົ້າບໍ່ໄດ້ຢູ່ໃນທີ່ປະທັບຂອງພຣະເຈົ້າອີກຕໍ່ໄປ. ການພັດພາກຈາກພຣະເຈົ້ານີ້ເອີ້ນວ່າຄວາມຕາຍທາງວິນຍານ. ການອອກໄປຈາກສວນເອເດນນັ້ນກໍຍັງມີຄວາມໝາຍວ່າອາດາມ ແລະ ເອວາກາຍເປັນມະຕະ ແລະ ດ້ວຍເຫດນີ້ຈຶ່ງສາມາດຕາຍໄດ້. ເຖິງແມ່ນວ່າອາດາມ ແລະ ເອວາຈະບໍ່ໄດ້ຢູ່ກັບພຣະເຈົ້າອີກແລ້ວ ແລະ ບັດນີ້ໄດ້ກາຍເປັນມະຕະ, ແຕ່ເຂົາເຈົ້າໄດ້ມີຄວາມສຸກ ແລະ ເຕັມໄປດ້ວຍຄວາມຫວັງເມື່ອເຂົາເຈົ້າໄດ້ເຫັນວ່າເຂົາເຈົ້າຈະກ້າວໜ້າຕໍ່ໄປ (ເບິ່ງ ໂມເຊ 5:10–11). “ອາດາມຕົກເພື່ອມະນຸດຈະໄດ້ເປັນຢູ່; ແລະ ມະນຸດເປັນຢູ່ກໍເພື່ອພວກເຂົາຈະໄດ້ມີຄວາມສຸກ” (2 ນີໄຟ 2:25).
ເວລາແຫ່ງການທົດສອບ
ເມື່ອເຮົາໄດ້ເກີດມາ, ເຮົາດຳລົງຊີວິດຢູ່ຫ່າງໄກຈາກພຣະເຈົ້າ, ເຊັ່ນດຽວກັນກັບອາດາມ ແລະ ເອວາຫລັງຈາກການຕົກ. ຊາຕານໄດ້ລໍ້ລວງເຮົາໃຫ້ເລືອກເຮັດສິ່ງທີ່ບໍ່ດີ. ການລໍ້ລວງເຫລົ່ານີ້ເຮັດໃຫ້ເຮົາໄດ້ຮັບການທົດສອບ ແລະ ເລືອກລະຫວ່າງສິ່ງທີ່ຖືກຕ້ອງ ແລະ ສິ່ງທີ່ຜິດ (ເບິ່ງ ແອວມາ 12:24). ແຕ່ລະຄັ້ງທີ່ເຮົາເຮັດບາບ ແລະ ບໍ່ກັບໃຈ, ເຮົາໄດ້ເລີ່ມຫ່າງໄກອອກໄປຈາກພຣະບິດາເທິງສະຫວັນ. ແຕ່ວ່າຖ້າເຮົາກັບໃຈ, ເຮົາກໍຫຍັບເຂົ້າໃກ້ພຣະບິດາຜູ້ສະຖິດໃນສະຫວັນຂອງເຮົາ.
ຄວາມຕາຍທາງຮ່າງກາຍ
ແຜ່ນດິນໂລກໄດ້ຖືກສ້າງຂຶ້ນມາເພື່ອເຮົາ (ເບິ່ງ 1 ນີໄຟ 17:36). ການຕົກໄດ້ເຮັດໃຫ້ມັນເປັນໄປໄດ້ສຳລັບອາດາມ ແລະ ເອວາເພື່ອປະຕິບັດຕາມພຣະບັນຍັດຂອງພຣະເຈົ້າໃນການມີລູກຫລານ, ຊ່ວຍໃຫ້ເຮົາມາສູ່ໂລກນີ້ໃນສະພາບທີ່ມີຮ່າງກາຍ. ຮ່າງກາຍຂອງເຮົາຈະຕາຍໃນມື້ໜຶ່ງ, ແຕ່ວ່າວິນຍານຂອງເຮົາຈະມີຊີວິດຢູ່ຕໍ່ໄປ. ຮ່າງກາຍ ແລະ ວິນຍານຂອງເຮົາຈະຮວມເຂົ້າກັນເມື່ອເຮົາຟື້ນຄືນຊີວິດ.
ຖືກຊ່ວຍໃຫ້ລອດໂດຍພຣະເຢຊູຄຣິດ
The Resurrection [ການຟື້ນຄືນພຣະຊົນ], ໂດຍ ແຮຣີ ແອນເດີເຊັນ
ໂດຍຜ່ານອຳນາດແຫ່ງການຊົດໃຊ້ຂອງພຣະເຢຊູຄຣິດ, ເຮົາຈຶ່ງສາມາດເອົາຊະນະຄວາມຕາຍທາງຮ່າງກາຍ ແລະ ທາງວິນຍານ. ຍ້ອນວ່າພຣະຄຣິດໄດ້ຟື້ນຄືນພຣະຊົນ, ທຸກຄົນຜູ້ທີ່ໄດ້ເກີດມາເທິງໂລກນີ້ຈະໄດ້ຟື້ນຄືນຊີວິດ ແລະ ມີຊີວິດຢູ່ຕະຫລອດໄປ. ແລະ ຍ້ອນວ່າພຣະຄຣິດໄດ້ທົນທຸກທໍລະມານແທນບາບຂອງເຮົາ, ເຮົາສາມາດກັບໃຈ ແລະ ໄດ້ຮັບການໃຫ້ອະໄພ ເພື່ອວ່າເຮົາຈະສາມາດຢູ່ກັບພຣະບິດາຜູ້ສະຖິດໃນສະຫວັນຂອງເຮົາໄດ້ອີກຄັ້ງ.
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, January 2022. Laotian. 18295 331