“Ol Petriak: Huia Olgeta mo From wanem Hem I Impoten,” Blong Ol Yut Oli Kam Strong, Feb. 2022.
Mesej Blong Ol Yut Oli Kam Strong blong Evri Manis, Febwari 2022
Ol Petriak
Huia Olgeta mo From Wanem Hem I Impoten
Ating yu bin harem abaot Ebraham, Aesak, mo Jekob. Yumi rid abaot olgeta fulap taem insaed long Buk blong Momon, mo bae yu harem moa abaot olgeta taem yu stap stadi long Ol Testeman long yia ia. Wetem plante lukluk long olgeta, ?i tru olgeta oli mas impoten ia? Be yu save askem long yuwan, “?From wanem trifala man we oli laef plante taosen yia i pas, oli impoten tedei?” Ki blong ansa long hemia i stap long ol kavenan we i no save finis mo promes blesing we God i givim long olgeta.
Ebraham
Ol pikja droing oli kam long Jarom Vogel
Ebraham i wan hae profet. Hem i stret mo gud, mo hem i obei long ol komanmen blong God.
Hem i kasem baptaes, kasem prishud, mo i sil wetem waef blong hem Sera blong taem we i no save finis.
God i mekem kavenan wetem Ebraham se laen blong hem bae oli kam bigwan mo bae oli gat semmak blesing we hem i kasem.
Bae olgeta oli tekem gospel we i fulwan blong Jisas Kraes i go long ol nesen long wol.
Aesak
Aesak i boe blong Ebraham mo Sera.
God i givim komanmen long Ebraham blong i givim Aesak olsem sakrifaes. Ebraham i lavem Aesak be i jusum blong obei long God. Bifo we Ebraham i wantem blong sakrifaesem Aesak, wan enjel blong Lod i stopem hem. Gladhat blong Ebraham mo Aesak blong obei long God i wan saen blong Atonmen blong wan boe ia nomo blong God we hem i lavem.
God i promesem Aesak ol semmak blesing olsem Ebraham.
Jekob
Olsem papa blong hem mo bubu man blong hem, Jekob i stap fetful long God.
From we hem i stap fetful, Lod i jenisim nem blong Jekob i go long Isrel, we i minim se “wan we i letem God i win” o “letem God i win” (Luk Bible Dictionary, “Israel”).
Jekob i gat 12 boe. Ol boe ia mo ol famli blong olgeta oli kam blong save olgeta olsem ol traeb blong Israel.
Kavenan ia we God i bin mekem wetem Ebraham, God i mekem bakegen wetem Jekob mo ol pikinini blong hem.
Ol Petriak mo Yu
Olsem wan memba blong Jos, yu yu pat blong laen blong Ebraham, Aesak, mo Jekob. !Kavenan we oli bin mekem wetem God i aplae long yu!
Yu gat blesing ia mo diuti blong talemaot testemoni blong yu abaot Sevya mo serem gospel.
Oli singaotem yu blong invaetem evriwan blong mekem mo kipim ol kavenan mo kasem ol prishud odinens. Presiden Russell M. Nelson i bin talem se hemia i pat blong kam tugeta blong Israel, we i “i wan moa impoten samting we i stap tekem ples long wol tedei” (“Hop blong Isrel,” [worldwide youth devotional, June 3, 2018], 8, ChurchofJesusChrist.org).
© 2022 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem translesen: 6/19. Translesen blong Monthly For the Strength of Youth Message, February 2022. Bislama. 18344 852