“Ol Kavenan I Konektem Yumi wetem God,” Liahona, Febwari 2022
Liahona Mesej blong Evri Manis, Febwari 2022
Ol Kavenan I Konektem Yumi wetem God
Blong stap mekem mo kipim ol kavenan i karem ol blesing i kam.
Wan kavenan hem i wan promes bitwin Papa long Heven mo ol pikinini blong Hem. Hem i putum ol kondisen blong ol kavenan we yumi mekem wetem Hem. Taem yumi mekem wanem we Hem i askem, yumi kasem fulap blesing. Mo yumi no jes karem ol blesing long wol ia nomo—taem yumi mekem mo kipim ol kavenan, bae yumi gobak stap wetem God mo ol famli blong yumi long heven wan dei.
Ol Kavenan mo Ol Odinens
Yumi mekem ol kavenan long taem blong samfala odinens. Yumi nid blong kasem ol odinens ia mo obei long ol kavenan ia blong save gobak stap wetem God. Ol odinens ia oli mekem tru long atoriti blong prishud. Ol odinens ia i tekem tu, baptaes mo konfemesen, kasem Melkesedek Prishud (blong ol man), mo ol odinens we yumi kasem insaed long tempol. Long taem blong sakramen, ol memba blong Jos oli riniu ol promes we oli bin mekem wetem God (luk long Doktrin mo Ol Kavenan 20:77, 79).
Ol Kavenan I Helpem Yumi blong Laef Stret mo Gud
Long taem blong baptaes, yumi promes blong folem Jisas Kraes, stap tingbaot Hem blong oltaem, mo kipim ol komanmen (luk long Doktrin mo Ol Kavenan 20:37). God i promes se Tabu Spirit bae i save stap wetem yumi oltaem.
Taem ol man oli kasem prishud, oli promes blong stap laef klin blong save holem prishud paoa blong God. God i promes blong blesem olgeta. (Luk long Doktrin mo Ol Kavenan 84:33–40.)
Pikja droing blong Resife Brasil Tempol, i kam long James Porter
Ol kavenan We Yumi Mekem insaed long Tempol
Taem ol memba blong Jos oli kasem ol endaomen blong olgeta insaed long tempol, oli promes blong laef stret mo gud mo sakrifaes from gospel. Olgeta i kasem promes blong kasem paoa long God (luk long Doktrin mo Ol Kavenan 38:32; 109:22).
Long taem blong tempol siling, wan hasban mo waef i mared blong taem we i no save finis mo tufala i promes blong stap fetful long wan wan long tufala mo wetem God. God i promesem se tufala i save gobak long Hem mo laef olsem famli blong taem we i no save finis. (Luk long Doktrin mo Ol Kavenan 132:19–20.)
Yumi Ol Kavenan Pipol
Olgeta we oli joenem Jos Ia blong Jisas Kraes blong Ol Lata-dei Sent oli kam ol kavenan pipol blong God. Bambae olgeta i save kasem ol blesing mo diuti long laen blong kavenan blong Ebraham (luk long Galesia 3:27–29). Blong stap olsem pat blong kavenan pipol blong God, i minim blong helpem wanwan long yumi taem yumi stap kam kolosap moa long Kraes. I minim tu se yumi wok blong stap mekem Jos blong God long wol i kam moa strong. Taem yumi stap kipim ol kavenan blong yumi, yumi save faenem paoa mo strong tinting we i kam long God.
© 2022 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem translesen: 6/19. Translesen blong Monthly Liahona Message, February 2022. Bislama. 18313 852