« Te mau patereareha : ’O vai rātou ’e nō te aha e mea faufa’a te reira », Nō te Pūai o te Feiā ’Āpī, Fepuare 2022.
Parau poro’i tā’āva’e Nō te Pūai o te Feiā ’Āpī, Fepuare 2022
Te mau patereareha
’O vai rātou ’e nō te aha e mea faufa’a te reira
’Ua fa’aro’o paha ’outou i te parau nō Aberahama, Isaaka ’e Iakoba. Tē tai’o pinepine nei tātou nō ni’a ia rātou i roto i te Buka a Moromona ’e e mea pāpū e fa’aro’o atu ā ’outou nō ni’a ia rātou ’a tuatāpapa ai ’outou i te Faufa’a Tahito i teie matahiti. No te ’ū’ana te parau nō ni’a ia rātou, e riro ra e feiā ti’ara’a teitei tō rātou, e ’ere ānei ? Tē ui ra paha ’outou ia ’outou iho : « Nō te aha to’otoru pu’e ta’ata i ora na e rave rahi tauatini matahiti i mua ra, i riro ai ’ei mea faufa’a i teie ā mahana ? » ’Ua ’ite ’outou, te tāviri nō taua pāhonora’a ra tei roto ïa i te mau fafaura’a mure ’ore ’e te mau ha’amaita’ira’a i parauhia ra e te Atua ia rātou.
Aberahama
Fa’ahōho’ara’a nā Jarom Vogel
E peropheta rahi ’o Aberahama. E ta’ata parauti’a ’oia ’e te ha’apa’o i te mau fa’auera’a a te Atua.
’Ua bāpetizohia ’oia, ’ua fāri’i i te autahu’ara’a ’e ’ua tā’atihia i tāna vahine ia Sara ē a muri noa atu.
’Ua fafau te Atua ia Aberahama ē, e riro tōna hua’ai ’ei hua’ai rahi ’e e fāri’i ato’a ho’i i te mau ha’amaita’ira’a i fāri’ihia na e ana.
E hōpoi rātou i te ’īra’a o te ’evanelia a Iesu Mesia i roto i te mau nūna’a o te fenua nei.
Isaaka
’O Isaaka te tamaiti a Aberahama rāua ’o Sara.
’Ua ani te Atua ia Aberahama ’ia hōro’a ia Isaaka ’ei tusia. ’Ua here Aberahama ia Isaaka, ’ua mā’iti rā ’oia e ha’apa’o i te parau a te Atua. Nā mua noa a’e ’o Aberahama ’a rave tusia ai ia Isaaka, ’ua parau mai te hō’ē melahi ia Aberahama ’ia fa’aea. Te hina’aro tae o Aberahama rāua Isaaka ’ia ha’apa’o i te parau a te Atua, e fa’ahōho’ara’a ïa nō te tāra’ehara a te Tamaiti Fānau Tahi a te Atua.
’Ua fafauhia ia Isaaka taua ato’a mau ha’amaita’ira’a ra i tō Aberahama.
Iakoba
Mai tōna metua tāne ’e tōna tupuna tāne, e ta’ata ha’apa’o maita’i Iakoba i te parau a te Atua.
Nō tōna ha’apa’o maita’i, ’ua taui te Fatu i te i’oa o Iakoba ’ei ’Īserā’ela, ’oia ho’i « tei upo’oti’a i pīha’i iho i te Atua » ’aore rā « ’a vaiiho i te Atua ’ia upo’oti’a » (hi’o Bible Dictionary, « Israel »).
Hō’ē ’ahuru ma piti tamari’i tamaroa a Iakoba. ’Ua mātauhia teie mau tamari’i tamāroa ’e tō rātou mau ’utuāfare ’ei ’ōpū nō ’Īserā’ela.
Tā te Atua i fafau ia Aberahama, ’ua fa’a’āpihia ïa i roto ia Iakoba ’e tāna mau tamari’i.
Te mau patereareha ’e ’outou
’Ei melo nō te ’Ēkālesia, e tuha’a ’outou nō te hua’ai o Aberahama, Isaaka ’e Iakoba. Te fafaura’a tā rātou i rave i mua i te Atua, nō ’outou ato’a ïa !
Tei ni’a ia ’outou te ha’amaita’ira’a ’e te hōpoi’a nō te fa’a’ite i tō ’outou ’itera’a pāpū nō te Fa’aora ’e nō te fa’a’ite i te ’evanelia.
’Ua pi’i-ato’a-hia ’outou ’ia poro’i atu i te mau ta’ata ato’a ’ia fafau ’e ’ia ha’apa’o i te mau fafaura’a ’e ’ia fari’i i te mau ’ōro’a o te autahu’ara’a. ’Ua parau te peresideni Russell M. Nelson ē, e mau tuha’a ana’e te reira nō te ha’aputuputura’a o ’Īserā’ela, ’oia ho’i « te ’ohipa faufa’a roa a’e ïa e tupu i ni’a i te fenua nei i teie mahana » (« Ti’aturira’a nō ’Iserā’ela », [purera’a nā te feiā ‘āpī ’ati ti’a i te ao, 3 nō Tiunu 2018], 8, ChurchofJesusChrist.org).
© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly For the Strength of Youth Message, February 2022. Tahitian. 18344 895