E nati te mau fafaura’a ia tātou i te Atua ra

Nā te ravera’a ’e te ha’apa’ora’a i te mau fafaura’a e hō mai i te mau ha’amaita’ira’a.

Te fafaura’a, ’o te hō’ē ïa parau i parauhia i rotopū i tō tātou Metua i te ao ra ’e tāna mau tamari’i. E ha’amau ’oia i te mau tītaura’a o te mau fafaura’a tā tātou e rave ’e ’ōna. ’Ia ha’apa’o tātou i tāna e ani mai, e fāri’i tātou e rave rahi ha’amaita’ira’a. ’E ’aita tātou e fāri’i i te mau ha’amaita’ira’a noa nō raro nei—’ia fafau ’e ’ia ha’apa’o tātou i te mau fafaura’a, e ho’i fa’ahou ïa tātou e ora i pīha’i iho i te Atua ’e i tō tātou mau ’utuāfare i te ra’i ra, ’ia tae i te hō’ē mahana.

Te mau fafaura’a ’e te mau ’ōro’a

E fafau tātou i roto i te tahi mau ’ōro’a. Tītauhia ia tātou ’ia fāri’i i te reira mau ’ōro’a ’e ’ia ha’apa’o i te reira mau fafaura’a nō te ho’i fa’ahou e ora i pīha’i iho i te Atua. E ravehia te mau ’ōro’a nā roto i te mana o te autahu’ara’a. Taua mau ’ōro’a ra, ’o te bāpetizora’a ïa ’e te ha’amaura’a, te fāri’ira’a i te Autahu’ara’a a Melehizedeka (nō te mau tāne), ’e te mau ’ōro’a tā tātou e fāri’i i roto i te hiero. I te taime nō te ’ōro’a mo’a, e fa’a’āpī te mau melo o te ’Ēkālesia i tā rātou mau fafaura’a i te Atua (hi’o Te Ha’api’ira’a Tumu ’e te mau Fafaura’a 20:77, 79).

E tauturu te mau fafaura’a ia tātou ’ia ora ma te parauti’a

I roto i te bāpetizora’a, e fafau tātou ’ia pe’e ia Iesu Mesia, ’ia ha’amana’o noa iāna, ’e ’ia ha’apa’o i te mau fa’auera’a (hi’o Te Ha’api’ira’a Tumu ’e te mau Fafaura’a 20:37). ’Ua fafau mai te Atua ē, e vai noa te Vārua Maita’i i roto ia tātou.

’Ia fāri’i ana’e te mau tāne i te autahu’ara’a, e fafau rātou ’ia ora ti’a mā i te mana autahu’ara’a o te Atua. ’Ua fafau te Atua i te ha’amaita’i ia rātou. (Hi’o Te Ha’api’ira’a Tumu ’e te mau Fafaura’a 84:33–40.)

Tā tātou mau fafaura’a i roto i te hiero

’Ia fāri’i ana’e te mau melo o te ’Ēkālesia i tō rātou ’ōro’a hiero, e fafau rātou ’ia ora parauti’a ’e ’ia fa’atusia nō te ’evanelia. E fafauhia ia rātou te mana nō ’ō mai i te Atua ra (hi’o Te Ha’api’ira’a Tumu ’e te mau Fafaura’a 38:32 ; 109:22).

I te taime nō te tā’atira’a hiero, e fa’aipoipohia te tāne ’e te vahine nō te tau mure ’ore ’e e fafau rāua i tō rāua motu ’ore i te tahi ’e te tahi ’e i te Atua. E fafau mai te Atua e nehenehe rāua e ho’i fa’ahou iāna ra ’e ’ia ora ’ei ’utuāfare mure ’ore. (Hi’o Te Haʼapiʼiraʼa Tumu ʼe te mau Fafaura’a 132:19–20.)

E nūna’a tātou nō te fafaura’a

Te feiā e ’ati mai i Te ’Ēkālesia a Iesu Mesia i te Feiā Mo’a i te mau Mahana Hope’a nei, e riro mai ïa rātou ’ei nūna’a nō te fafaura’a nō te Atua. E feiā ’āi’a ato’a rātou nō te mau ha’amaita’ira’a ’e te mau hōpoi’a i parauhia ia Aberahama (hi’o Galatia 3:27–29). Te rirora’a ’ei nūna’a fafauhia nō te Atua, ’o te tauturura’a ïa i te tahi ’e te tahi ’a ha’afātata noa atu ai tātou i te Mesia ra. ’O te ohipara’a ïa tātou nō te ha’apūai i te ’Ēkālesia a te Atua i ni’a i te fenua nei. ’Ia ha’apa’o ana’e tātou i tā tātou mau fafaura’a, e roa’a ia tātou te mana ’e te pūai nō ’ō mai i te Atua ra.

© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, February 2022. Tahitian. 18313 895