Bosoom bosoom Liahona Amandzɛɛbɔ, Ebɔw 2022

Erosom wɔ Asɔr Ɔfrɛ horow mu

Asɔr baanodzifo bisa asɔrmba dɛ wɔnsom wɔ dwuma pɔkyee mu a wɔfrɛ no “ɔfrɛ horow.” Ɔfrɛ horow ma asɔrmba kwan ma wɔsom binom na wɔbɛn Nyankopɔn yie.

David Bowen Newton yɛɛ Mfonyin no

Ber a yɛsom wɔ hɛn ɔfrɛ horow mu no, yɛboa hyɛ Nyankopɔn n’edwuma mã. Yɛkyerɛkyerɛ binom fa Ɔsor Egya na Jesus Christ ho na yɛboa hɔn a yɛkyerɛkyerɛ hɔn no ma wɔbɛn Hɔn yie. Yenya nhyira so ber a yɛsom nokwar mu ara no.

Eregye Ɔfrɛ horow

Hɔn a wɔsom wɔ Asɔr no mu no Nyankopɔn na Ɔafrɛ hɔn. Asɔr baanodzifo bɔ mpaa bisa nkenyan dɛ wobohu nyia wɔnfrɛ no ma ɔnsom wɔ ɔfrɛ biara mu. Afei baanodzinyi no bisa asɔrba no dɛ ɔnsom na ɔkyerɛkyerɛ no asodzi a ɔwɔ ɔfrɛ no mu. Wɔma asɔrmba tsipia wɔ Asɔr nhyiamu ase a ward anaa nkorbata no mu mba no ma tsipia ambatow. Iyi kyerɛ dɛ wɔayɛ krado dɛ wɔbɔboa nyia wɔrefrɛ no no. Nkyii asɔfodzi baanodzinyi bɛma asɔrba no nhyira. Wɔfrɛ iyi woriyi no esi hɔ. Wɔdze tumdzi bɛma asɔrba no dɛ odzi dwuma wɔ ɔfrɛ no mu nye nhyira binom a ɔbɔboa no ma oetum asom.

Bishopfo

Bishop yɛ ward baanodzinyi. (Wɔ nkorbata mu no, nkorbata president no tse dɛ bishop.) Stake president susu bi a okitsa asofodzi a odzi mu dɛ wɔnfrɛ no dɛ bishop. President a Odzi Kan na n’Apamfo fua ɔfrɛ no do. Afei wɔma bishop no tsipia na woyi no si hɔ dɛ ɔnsom. Ɔsan so nya asɔfodzi nsaafee, a ɔkyerɛ dɛ ɔwɔ tumdzi dɛ odzi ward no kan. Dɛ bishop no, ɔsom na odzi ward mba no nyinaa kan.

Presidentfo na hɔn apamfo

Asɔfodzi quorum horow na Relief Society, Young Women, Primary, na Kwesida Skuul ekuwekuw no, presidentfo na hɔn apamfo a, ɔtaa yɛ president na apamfo ebien no na wodzi hɔn kan. Elderfo hɔn quorum presidentfo na hɔn apamfo no stake president na n’apamfo na wɔfrɛ hɔn na woyi hɔn si hɔ. Bishop na n’apamfo bisa asɔrmba ma wɔsom wɔ president na n’apamfo mu wɔ ward mu na woyi hɔn si hɔ. Baanodzifo nyinara som asɔrmba a wɔwɔ hɔn quorum anaa ekuwekuw mu. Wɔhwɛ asɔrmba hɔn ehiadze na wɔboa hɔn ma wɔtse Nyankopɔn no dɔ nkã.

Ɔfrɛ horow Binom so

Erekyerɛ adze, eroboa wɔ ndwom mu, irisie nkyerɛwee, erehyehyɛ dwumadzi ama mbabun anaa mbofra, na erosom wɔ akwan horow mu, ka Asɔr ɔfrɛ horow binom no ho. Asɔr no mu ɔfrɛ kor biara hia na ɔma asɔrmba kwan ma wɔsom binom na wɔsom Nyankopɔn. Ber a hɛn nyina yɛ edwuma bɔ mu dze hyɛ hɛn ɔfrɛ horow mã no, yɛboa hyɛ binom dzen na yɛboa ma Asɔr no nyin.

Fi Kyerɛwsɛm no mu

Ɔfrɛ dɛ yɛnsom wɔ Asɔr no mu no fi Nyankopɔn hɔ (hwɛ Gyedzi ho Nsɛmpɔw 1:5).

Wɔfrɛ hɛn na woyi hɛn si hɔ ansaana yɛasom wɔ ɔfrɛ bi mu (hwɛ Nkyerɛkyerɛ na Ahyɛmudzi 42:11).

Ber a yɛsom wɔ hɛn ɔfrɛ horow mu no, yɛboa kyekyer Asɔr no (hwɛ Nkyerɛkyerɛ na Ahyɛmudzi 84:109-10).

Irusũa Mbrɛ Ibesi Ayɛ Wo Ɔfrɛdwuma

Ewɔ ɔfrɛ no yɛ kwan kɛse a edze som binom. Ɔfrɛ biara wɔ noho asodzi, ntsi ohia dɛ isũa ber a ehyɛ ase som no. Mboa ndzɛmba binom a obotum aboa wo nye yi:

• Enye baanodzinyi a ɔdze ɔfrɛ no ma wo no nkasa. Bisa no ntsetsee a ibotum agye.

• Hwehwɛ wo ɔfrɛ noho asɛm wɔ Asɔr no ne General Handbookmu, a ɔwɔ ChurchofJesusChrist.org. Ɔwɔ etsir ma Relief Society, elderfo quorum, Primary, nna dza ɔkekã ho.

• Bɔ mpaa nya nkenyan, na sũa kyerɛwsɛm na wiadze mfɛndzanan ehyiadzi nsɛm ber a edwen wo ɔfrɛ noho. Ɔsor Egya behyira wo ma asom Ne mba yie.

© 2022 odzi wɔ Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, March 2022 ne Nkyerɛasee. Fante. 18296 502