Zaj Lus hauv Liyahaunas Txhua Hli, Peb Hlis Ntuj 2022

Ua Hauj Lwm Pab hauv lub Koom Txoos

Lub Koom Txoos cov thawj coj hais kom cov mej zeej ua tej hauj lwm tshwj xeeb hu ua “tej kev hu.” Tej kev hu pub kom mej zeej muaj lub cib fim pab lwm tus thiab txav ze dua rau Vajtswv.

txiv neej nyob rau hauv lub rooj zaum muaj log qhia ib chav kawm tim lub Koom Txoos

Daim duab los ntawm David Bowen Newton

Thaum peb ua tej yam Vajtswv hu peb ua, peb pab ua Vajtswv txoj hauj lwm kom tiav. Peb qhia lwm tus txog Leej Txiv Saum Ntuj Ceeb Tsheej thiab Yexus Khetos thiab pab cov uas peb qhia kom lawv txav mus ze Nkawd. Peb kuj txais tau cov koob hmoov thaum peb muaj kev ntseeg pab.

Txais Tej Kev Hu

tub hluas sawv ua ntej ib pawg ntseeg ntawm lub Koom Txoos

Cov uas pab hauv lub Koom Txoos los Vajtswv hu lawv ua li ntawd. Lub Koom Txoos cov thawj coj thov Vajtswv kom txais kev tshwm sim kom paub yuav tsum hu leej twg ua hauj lwm pab. Ces ib tug thawj coj mam li thov ib tug mej zeej thiab qhia txog tej dej num ntawm qhov uas hu lawv ua. Thaum ib pawg ntseeg los sis ceg ntseeg sib ntsib ua ke tim lub Koom Txoos, lawv tsa tes txhawb nqa pom zoo rau cov mej zeej. Qhov no txhais tau tias lawv kam txhawb nqa tus neeg uas Vajtswv hu kom ua txoj hauj lwm ntawd. Tus mej zeej mam li txais koob hmoov los ntawm ib tug thawj coj pov thawj hwj. Qhov no hu ua kev tsa. Tus mej zeej mam li txais lub hwj chim ua raws li Vajtswv hu thiab lwm yam koob hmoob pab nws ua hauj lwm pab.

Cov Npisov

Ib tug npisov yog tus thawj coj ntawm ib pawg ntseeg. (Nyob hauv ib ceg ntseeg, tus thawj tswj hwm yeej zoo li tus npisov.) Ceg txheem ntseeg tus thawj tswj hwm pom zoo kom ib tug tuav lub pov thawj hwj tsim nyog hu los ua tus npisov. Thawj Pawg Thawj Tswj Hwm pom zoo rau kev hu ib tug npisov. Ces tus npisov mam li txais kev txhawb nqa thiab kev tsa mus ua hauj lwm pab. Nws mam li txais cov yawm sij ntawm lub pov thawj hwj, uas txhais tias nws muaj lub hwj chim coj pawg ntseeg. Tus npisov pab thiab coj txhua tus mej zeem ntawm pawg ntseeg.

Tej Pawg Thawj Tswj Hwm

Tej pawg thawj tswj hwm thiab lub Koom Haum Niam Tsev, Koom Haum Ntxhais Hluas, Koom Haum Me Nyuam Yaus, thiab Hnub Caiv Kev Kawm Vaj Lug Kub los muaj ib pawg thawj tswj hwm coj tej pawg no, feem ntau yog ib tug thawj tswj hwm thiab ob tug pab cuam. Ceg txheem ntseeg pawg thawj tswj hwm hu thiab tsa pawg txwj laug tej pawg thawj tswj hwm. Pawg npisov thov thiab tsa mej zeej los ua hauj lwm pab hauv tej pawg thawj tswj hwm hauv pawg ntseeg. Tag nrho cov thawj coj pab cov mej zeej hauv lawv pawg los sis lub koom haum. Lawv txhawb pab cov mej zeej raws li cov mej zeej xav tau thiab pab lawv paub txog Vajtswv txoj kev hlub.

poj niam nqa mov rau ib leej niam puag me nyuam

Lwm Yam txoj Kev Hu

Lwm yam uas Vajtswv hu kom peb ua los muaj tej yam xws li kev qhia, pab nrog kev hu nkauj, khaws cov ntaub ntawv, npaj kev ua si rau cov hluas los me nyuam, thiab muaj lwm txoj kev pab ntxiv. Txhua yam hauj lwm hauv lub Koom Txoos yeej tseem ceeb thiab muab cij fim rau cov mej zeej pab lwm tus thiab ua hauj lwm rau Vajtswv. Thaum peb ua hauj lwm ua ke ua kom ua hauj lwm raws li Vajtswv tau hu peb ua, peb muaj peev xwm ntxiv dag zog rau lwm tus thiab pab kom lub Koom Txoos loj hlob tuaj.

Los ntawm cov Vaj Lug Kub

Tej kev hu kom pab hauv lub Koom Txoos yog los ntawm Vajtswv (saib Tej Nqe Kev Ntseeg 1:5).

Cov thawj coj hu thiab tsa peb ua ntej peb ua hauj lwm pab (saib Lus Qhuab Qhia thiab Kev Khi Lus 42:11).

Thaum peb ua hauj lwm pab raws li tau hu peb ua, peb pab txhawb nqa lub Koom Txoos (saib Lus Qhuab Qhia thiab Kev Khi Lus 84:109–10).

Kev Kawm Ua Koj txoj Hauj Lwm Pab

Muaj ib txoj hauj lwm uas Vajtswv tau hu koj ua yog ib lub cib fim pab lwm tus. Txhua txoj hauj lwm uas Vajtswv hu peb ua nyias muaj nyias tes num, yog li ntawd qhov uas koj kawm tej tes num ntawd thaum koj pib ua hauj lwm pab yeej yog ib qho tseem ceeb. Nov yog tej yam uas pab tau koj:

• Cia li sib tham nrog tus thawj coj ua hu koj los ua txoj hauj lwm ntawd. Nug seb koj txais tau kev cob qhia dab tsi.

• Nrhiav koj txoj kev hu hauv lub Koom Txoos phau General Handbook , uas nyob ntawm ChurchofJesusChrist.org. Phau no muaj tshooj txog lub Koom Haum Niam Tsev, Pawg Txwj Laug, Koom Haum Me Nyuam Yaus, thiab li ntawd.

• Thov Vajtswv kom txais kev tshwm sim, thiab kawm vaj lug kub thiab tej zaj lus los ntawm lub tuam rooj sab laj thaum koj xav txog txoj hauj lwm uas Vajtswv tau hu kom koj ua. Leej Txiv Saum Ntuj Ceeb Tsheej yuav foom koom hmoov rau koj kom koj muaj peev xwm ua hauj lwm zoo pab Nws cov me nyuam.

© 2022 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, March 2022. Hmong. 18296 295