Binulan a Mensahe iti Liahona , Marso 2022

Panagserbi kadagiti Takem iti Simbaan

Kiddawen dagiti lider iti Simbaan kadagiti miembro nga agserbi kadagiti masinunuo a pagrebbengan a maawagan iti “takem [calling].” Dagiti takem ti mangted kadagiti miembro iti gundaway a makapagserbi iti dadduma ken mayas-asidegda iti Dios.

Ladawan nga innala ni David Bowen Newton

No agserbitayo kadagiti takem a nakaawagantayo, tumulongtayo a mangipatungpal iti aramid ti Apo. Suruantayo dagiti dadduma maipapan iti Nailangitan nga Ama ken ni Jesucristo ken tulongantayo dagiti suruantayo a mayas-asideg Kadakuada. Umawattayo pay kadagiti bendision no agserbitayo a sipupudno.

Panangawat kadagiti Takem

Inawagan ti Dios dagiti agserbi iti Simbaan. Agkararag dagiti lider iti Simbaan para iti inspirasion a mangammo no asino ti dawaten nga agserbi iti tunggal takem. Kalpasanna dawaten ti maysa a lider ti Simbaan iti maysa a miembro nga agserbi ken ilawlawagna dagiti pagrebbengan ti takem. Makanunongan dagiti miembro iti maysa a miting ti Simbaan a pangtedan dagiti miembro ti ward wenno branch iti pangkanunong a butos. Kayatna a sawen daytoy a siaayatda a mangsuporta iti tao a maaw-awagan. Kalpasanna itedto ti maysa a priesthood leader ti maysa a pammendision iti miembro. Maawagan daytoy iti pannakatuding wenno pannaka-set apart. Maikkanto ti miembro iti turay nga agtignay iti takem ken iti dadduma pay a bendision a mangtulong kenkuana nga agserbi.

Dagiti bishop

Ti maysa a bishop ti lider ti maysa a ward. (Iti maysa a branch, maipada ti maysa a branch president iti maysa a bishop.) Irekomenda ti stake president ti maysa a maikari a priesthood holder tapno maawagan a kas bishop. Anamongan ti Umuna a Panguluen ti panangawag. Kalpasanna makanunongan ti bishop ken ma-set apart nga agserbi. Awatenna pay dagiti tulbek ti priesthood, a kayatna a sawen nga addaan isuna iti turay a mangiturong iti ward. Kas bishop, pagserbian ken idauluanna ti amin a miembro ti ward.

Dagiti Panguluen

Dagiti korum iti priesthood ken dagiti organisasion ti Relief Society, Young Women, Primary, ken Sunday School ket idauluan dagiti panguluen, gagangay ti maysa a presidente ken dua a mamagbaga. Awagan ken i-set apart ti panguluen ti stake dagiti panguluen ti elders quorum. Dawaten ti bishopric kadagiti miembro nga agserbida iti dadduma pay a panguluen iti ward ken i-set apartna ida. Agserbi ti amin a lider kadagiti miembro kadagiti korum wenno organisasionda. Agministerda kadagiti kasapulan dagiti miembro ken tulonganda ida a mangrikna iti ayat ti Dios.

Dadduma pay a Takem

Mairaman ti dadduma pay a takem ti panangisuro, panangtulong iti musika, panagirekord, panangplano kadagiti aktibidad para kadagiti agtutubo ken ubbing, ken panagserbi iti sabali a wagas. Napateg ti tunggal takem iti Simbaan ken mangted kadagiti miembro iti gundaway nga agserbi iti dadduma ken agserbi iti Dios. Bayat ti panagtitinnulongtayo amin nga agtrabaho a mangipatungpal kadagiti takem a nakaawagantayo, mapapigsatayo dagiti dadduma ken matulongantayo ti Simbaan a dumur-as.

Manipud kadagiti Nasantuan a Kasuratan

Naggapu iti Dios dagiti takem nga agserbi iti Simbaan (kitaen iti Pagannurotan ti Pammati 1:5).

Maawagan ken mai-set aparttayo sakbay nga agserbitayo iti maysa a takem (kitaen iti Doktrina ken Katulagan 42:11).

Bayat ti panagserbitayo kadagiti takem a nakaawagantayo, makatulongtayo a mangbangon iti Simbaan (kitaen iti Doktrina ken Katulagan 84:109–10).

Panagsursuro No Kasano nga Aramidenyo ti Takemyo

Ti kaadda ti takem ket maysa a naindaklan a gundaway nga agserbi kadagiti dadduma. Addaan ti tunggal takem iti bukodna a naituding a pagrebbengan, isu a napateg a sursuruenyo ida bayat ti panangrugiyo nga agserbi. Dagitoy ti sumagmamano a resources a makatulong kadakayo a mangirugi:

• Kasaritayo ti lider a nangted kadakayo iti takem. Damagenyo no ania a training ti mabalinyo nga awaten.

• Sapulenyo ti takemyo iti General Handbook, iti Simbaan, nga adda a magun-od iti ChurchofJesusChrist.org. Addaan daytoy kadagiti kapitulo iti Relief Society, elders quorum, Primary, ken dadduma pay.

• Agkararagkayo para iti inspirasion, ken adalenyo dagiti nasantuan a kasuratan ken dagiti mensahe iti sapasap a komperensia a pampanunotenyo ti takemyo. Bendisionannakayonto ti Nailangitan nga Ama iti panagserbiyo a nasayaat kadagiti annakna.

© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, March 2022. Ilokano. 182696 864