“Serving in Church Callings,” Liahona, Mar. 2022.
ຂ່າວສານປະຈຳເດືອນ Liahona, ເດືອນມີນາ 2022
ການຮັບໃຊ້ການເອີ້ນໃນສາດສະໜາຈັກ
ຜູ້ນຳໃນສາດສະໜາຈັກໄດ້ຂໍໃຫ້ສະມາຊິກຮັບໃຊ້ໃນໜ້າທີ່ມອບໝາຍໃດໜຶ່ງທີ່ຮູ້ກັນວ່າ “ການເອີ້ນ.” ການເອີ້ນເປີດໂອກາດໃຫ້ສະມາຊິກໄດ້ຮັບໃຊ້ຄົນອື່ນ ແລະ ຫຍັບເຂົ້າໃກ້ພຣະເຈົ້າຫລາຍຂຶ້ນ.
ຮູບພາບຖ່າຍໂດຍ ເດວິດ ໂບເວນ ນິວຕັນ
ເມື່ອເຮົາຮັບໃຊ້ໃນການເອີ້ນຕ່າງໆຂອງເຮົາ, ເຮົາໄດ້ຊ່ວຍໃນການບັນລຸວຽກງານຂອງພຣະເຈົ້າ. ເຮົາສິດສອນຄົນອື່ນໆກ່ຽວກັບພຣະບິດາເທິງສະຫວັນ ແລະ ພຣະເຢຊູຄຣິດ ແລະ ຊ່ວຍຄົນທີ່ເຮົາສິດສອນໃຫ້ຫຍັບເຂົ້າໃກ້ພວກພຣະອົງຫລາຍຂຶ້ນ. ເຮົາຍັງໄດ້ຮັບພອນນຳອີກຂະນະທີ່ເຮົາຮັບໃຊ້ຢ່າງຊື່ສັດ.
ການໄດ້ຮັບການເອີ້ນ
ຄົນທີ່ຮັບໃຊ້ໃນສາດສະໜາຈັກໄດ້ຖືກເອີ້ນຈາກພຣະເຈົ້າ. ຜູ້ນຳໃນສາດສະໜາຈັກໄດ້ອະທິຖານສຳລັບການດົນໃຈເພື່ອໃຫ້ຮູ້ວ່າຄວນຂໍໃຫ້ໃຜຮັບໃຊ້ໃນການເອີ້ນແຕ່ລະຢ່າງ. ຈາກນັ້ນຜູ້ນຳກໍຂໍໃຫ້ສະມາຊິກຄົນໃດຄົນໜຶ່ງຮັບໃຊ້ ແລະ ອະທິບາຍໜ້າທີ່ຂອງການເອີ້ນນັ້ນ. ສະມາຊິກໄດ້ຮັບການສະໜັບສະໜູນໃນການປະຊຸມຂອງສາດສະໜາຈັກບ່ອນທີ່ສະມາຊິກຫວອດ ຫລື ສາຂາທຳການສະໜັບສະໜູນ. ນີ້ໝາຍຄວາມວ່າເຂົາເຈົ້າເຕັມໃຈສະໜັບສະໜູນບຸກຄົນທີ່ຖືກເອີ້ນ. ຕໍ່ຈາກນັ້ນສະມາຊິກຈະໄດ້ຮັບພອນໂດຍຜູ້ນຳຖານະປະໂລຫິດ. ສິ່ງນີ້ຖືກເອີ້ນວ່າການແຕ່ງຕັ້ງເປັນທາງການ. ສະມາຊິກຈະຖືກມອບສິດອຳນາດໃຫ້ ເພື່ອປະຕິບັດໃນການເອີ້ນ ແລະ ພອນອື່ນໆເພື່ອຊ່ວຍເຫລືອລາວໃນການຮັບໃຊ້.
ອະທິການ
ອະທິການແມ່ນຜູ້ນຳຂອງຫວອດ. (ໃນສາຂາ, ປະທານສາຂາແມ່ນຄ້າຍຄືກັບອະທິການ.) ປະທານສະເຕກຈະເປັນຜູ້ແນະນຳຜູ້ດຳລົງຖານະປະໂລຫິດທີ່ມີຄ່າຄວນເພື່ອໃຫ້ເປັນອະທິການ. ຝ່າຍປະທານສູງສຸດຈະເປັນຜູ້ອະນຸມັດການເອີ້ນນັ້ນ. ຈາກນັ້ນອະທິການກໍຈະໄດ້ຮັບການສະໜັບສະໜູນ ແລະ ແຕ່ງຕັ້ງເປັນທາງການເພື່ອຮັບໃຊ້. ເພິ່ນກໍຍັງໄດ້ຮັບຂໍກະແຈຖານະປະໂລຫິດນຳອີກ, ຊຶ່ງໝາຍຄວາມວ່າເພິ່ນມີສິດອຳນາດໃນການຊີ້ນຳຫວອດ. ໃນຖານະອະທິການ, ເພິ່ນຈະຮັບໃຊ້ ແລະ ນຳພາສະມາຊິກທຸກຄົນໃນຫວອດ.
ຝ່າຍປະທານ
ອົງການ ກຸ່ມຖານະປະໂລຫິດ ແລະ ສະມາຄົມສະຕີສົງເຄາະ, ຍິງໜຸ່ມ, ປະຖົມໄວ, ແລະ ໂຮງຮຽນວັນອາທິດໄດ້ຖືກນຳພາໂດຍຝ່າຍປະທານ, ໂດຍທົ່ວໄປແລ້ວແມ່ນມີປະທານໜຶ່ງຄົນ ແລະ ທີ່ປຶກສາສອງຄົນ. ຝ່າຍປະທານກຸ່ມແອວເດີໄດ້ຮັບການເອີ້ນ ແລະ ແຕ່ງຕັ້ງເປັນທາງການໂດຍຝ່າຍປະທານສະເຕກ. ຝ່າຍອະທິການຈະຂໍໃຫ້ສະມາຊິກຮັບໃຊ້ໃນຝ່າຍປະທານຕ່າງໆໃນຫວອດ ແລະ ຈະແຕ່ງຕັ້ງພວກເພິ່ນ. ຜູ້ນຳທຸກຄົນຈະຮັບໃຊ້ສະມາຊິກໃນກຸ່ມ ຫລື ໃນອົງການຂອງຕົນ. ພວກເພິ່ນຈະປະຕິບັດສາດສະໜາກິດຕໍ່ຄວາມຕ້ອງການຂອງສະມາຊິກ ແລະ ຊ່ວຍໃຫ້ເຂົາເຈົ້າຮູ້ສຶກເຖິງຄວາມຮັກຂອງພຣະເຈົ້າ.
ການເອີ້ນອື່ນໆ
ການເອີ້ນອື່ນໆຂອງສາດສະໜາຈັກແມ່ນລວມທັງການສິດສອນ, ການຊ່ວຍເຫລືອກ່ຽວກັບດົນຕີ, ການຈົດບັນທຶກ, ການວາງແຜນກິດຈະກຳຂອງຊາວໜຸ່ມ ຫລື ເດັກນ້ອຍ, ແລະ ການຮັບໃຊ້ໃນວິທີອື່ນໆ. ການເອີ້ນແຕ່ລະຢ່າງໃນສາດສະໜາຈັກແມ່ນສຳຄັນ ແລະ ເປີດໂອກາດໃຫ້ສະມາຊິກໄດ້ຮັບໃຊ້ຄົນອື່ນ ແລະ ຮັບໃຊ້ພຣະເຈົ້າ. ຂະນະທີ່ເຮົາທຸກຄົນເຮັດວຽກຮ່ວມກັນເພື່ອເຮັດໃຫ້ການເອີ້ນຂອງເຮົາສຳເລັດ, ເຮົາໄດ້ເພີ່ມຄວາມເຂັ້ມແຂງໃຫ້ກັບຄົນອື່ນ ແລະ ຊ່ວຍໃຫ້ສາດສະໜາຈັກເຕີບໂຕ.
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, March 2022. Laotian. 18296 331