Umyalezo waNyanga zonke we Liyahona ngoMashi 2022

Ukusebenza oBizweni eBandleni

Abaholi bebandla bacela amalungu ukuthi asize emisebenzini ethile eyaziwa ngokuthi “ubizo.” Ubizo lunikeza amalungu ithuba lokusiza abanye futhi nokuthi basondelane noNkulunkulu.

Isithombe nguDavid Bowen Newton

Uma sisebenza obizweni lwethu, sisiza ekufezeni umsebenzi kaNkulunkulu. Sifundisa abanye ngoBaba oseZulwini kanye nangoJesu Kristu futhi sibasize labo esibafundisayo basondele Kubo. Sithola nezibusiso uma sisebenza ngokwethembeka.

Ukwamukela uBizo

Labo abasiza eBandleni babizwe nguNkulunkulu. Abaholi bebandla bathandazela intshisekelo ukuze bazi ukuthi ubani okumele asize kulolo bizo ngalunye. Umholi ube esecela ilungu ukuba lisize futhi alichazele imisebenzi yalolo bizo. Amalungu asekelwa emhlanganweni weBandla lapho amalungu ewadi noma egatsha enikeza ivoti elisekelayo. Lokhu kusho ukuthi bazimisele ukumeseka lowo obiziwe. Ilungu libe selinikezwa isibusiso ngumholi wobuphristi. Lokhu kubizwa ngokwahlukaniselwa. Lelo lungu lizonikwa igunya lokusebenza obizweni kanye nezinye izibusiso ezizolisiza likwazi ukusebenza.

Ababhishobhi

UMbhishobhi ungumholi wewadi. (Egatsheni, umongameli wegatsha ufana nombhishobhi.) Umongameli wesikhonkwane uphakamisa onobuphristi ofanelekile ukuba abizwe njengombhishobhi. UbuMongameli bokuQala yibo obuvumela lolo bizo. UMbhishobhi ube esesekelwa futhi ahlukaniselwe ukusiza kulolo bizo. Futhi uphinde anikwe okhiye bobuphristi, okusho ukuthi unegunya lokuqondisa iwadi. Njengombhishobhi, usiza futhi ahole wonke amalungu ewadi.

Omongameli

Imigwamanda yobuPhristi kanye neNhlangano yoSizo yabesiFazane, Amantombazane, abaNtwana, kanye nesiKole sangeSonto kuholwa ngomongameli, ngokujwayelekile umongameli kanye nabeluleki ababili. Omongameli bemigwamanda yamagosa babizwa futhi bahlukaniselwe wubumongameli besikhonkwane. Ababhishobhi bacela amalungu ukuba asize kwezinye izikhundla zobumongameli ewadini futhi bayawahlukanisela kulezo zikhundla. Bonke abaholi basebenzela amalungu emigwamanda noma ezinhlangano zabo. Basiza ngezidingo zamalungu futhi babasize ukuzwa uthando lukaNkulunkulu.

Ezinye Izikhundla zoBizo

Kwezinye izikhundla zobizo eBandleni kubalwa kuzo ukufundisa, ukusiza ngokomculo, ukugcina imibhalo, ukuhlela okwenziwa yintsha noma abantwana, kanye nokusiza ngezinye izindlela. Zonke izikhundla zobizo eBandleni zibalulekile futhi zinika amalunga ithuba lokusiza abanye kanye nokusebenzela uNkulunkulu. Ngesikhathi sonke sisebenza ndawonye ukufeza ubizo lwethu, siqinisa abanye futhi sisize iBandla ukuthi likhule.

Okuvela Emibhalweni Engcwele

Ubizo lokusiza eBandleni luvela kuNkulunkulu (bheka ImiBhalo yoKholo 1:5).

Siyabizwa siphinde sahlukaniselwe ubizo ngaphambi kokuba sisize obizweni (bheka IMfundiso neziVumelwano 42:11).

Ngesikhathi sisiza obizweni lwethu, sisiza ukwakha iBandla (bheka IMfundiso neziVumelwano 84:109–10).

Ukufunda Indlela Yokusiza Obizweni Lwakho

Ukuthola ubizo kuyithuba elikhulu lokusiza abanye. Ubizo ngalunye lunemisebenzi yalo, ngakho-ke kubalulekile ukuyifunda ngesikhathi usuqala ukusiza. Nanka amanye amasu okukusiza:

• Khuluma nomholi okunike ubizo. Buza ukuthi yikuphi ukuqeqeshwa ongakuthola.

• Funda ngobizo lwakho encwadini ebizwa ngokuthi yi General Handbook, yeBandla, etholakala ku ChurchofJesusChrist.org. Leyo ncwadi inolwazi ngeNhlangano yoSizo yabesiFazane, umgwamanda wamagosa, iNhlangano yabaNtwana, njalo njalo.

• Khulekela intshisekelo, futhi ufunde imibhalo engcwele kanye nezinkulumo zengqunqguthela yebandla lonke ucabanga ngobizo lwakho. UBaba oseZulwini uzokubusisa ukuze ubasize kahle abantwana Bakhe.

© 2022 ngabakwa Intellectual Reserve, Inc. All rights reserved. Ishicilelwe eMelika Usuku okuvunywe ngalo ukuba lesi sifundo sikhishwe ngesiNgisi: 6/19. Usuku okuvunywe ngalo ukuba lesi sifundo sihunyushwe: 6/19. Ukuhunyushwa kwe Monthly Liahona Message, March 2022. isiZulu. 18296 783