Bulanan nga Mensahe sa Liahona, Abril 2022

Ang Sakramento: Isa ka Paagi sa Pagdumdom sa Manluluwas

The Last Supper [Ang Katapusan nga Panyapon], ni Simon Dewey

Sang gab-i antes Sia ginlansang sa krus, nakigkita si Jesucristo sa Iya mga Apostoles sa Katapusan nga Panyapon. Didto ginhatag Niya sa ila ang sakramento sa primero nga beses. Ginpaathag Niya nga isa ato ka paagi para madumduman nila Sia. Ang sakramento isa ka ordinansa sa diin nagaambit kita sang tinapay kag tubig para madumduman ang Pagbayad-Sala ni Cristo. Ang tinapay nagarepresentar sang lawas ni Cristo, kag ang tubig nagarepresentar sang Iya dugo.

Nagaambit kita sang sakramento kada Domingo sa tion sang pang-sakramento nga miting. Nagakanta kita sang himno samtang ang mga nagakapot sang priesthood nagasipad-sipad sang tinapay sa magagmay nga parte.

Ang mga nagakapot sang priesthood nga nagsipad-sipad sang tinapay nagasambit sang espesyal nga mga pangamuyo. Ining pang-sakramento nga mga pangamuyo makit-an sa Doktrina kag mga Kasugtanan 20:77, 79. Ang mga pangamuyo nagapadumdom sa aton sang aton ginpromisa sa Amay nga Langitnon kag sang Iya ginpromisa sa aton.

Ang iban pa nga mga nagakapot sang priesthood nagapanagtag sang sakramento sa mga miyembro sang ward ukon branch. Samtang nagaambit kita sang sakramento, ginadumdom naton ang Manluluwas kag ang Iya sakripisyo para sa aton. Ginapromisa man naton liwat nga tumanon ang mga kasugtanan (mga promisa) nga aton ginhimo sa Amay nga Langitnon.

Nagapakita kita sang pagtahod (paagi sa paghipos kag pagpahimuyong) samtang ginabendisyunan kag ginapanagtag ang sakramento. Isa ini ka tion para panumdumon naton ang kabuhi, mga pinanudlo, kag Pagbayad-Sala ni Jesucristo. Pwede man naton panumdumon kon paano naton sundon ang Iya halimbawa.

Mga Tinaga nga Dapat Mahibal-an

Ordinansa: Sagrado, pormal nga buluhaton nga ginahikot paagi sa awtoridad sang priesthood.

Mga nagakapot sang priesthood: Kaangay-angay nga mga lalaki kag mga lamharon nga lalaki nga ginhatagan sang awtoridad para mag-akto sa ngalan ni Jesucristo.

Ang Pagbayad-Sala ni Jesucristo: Ang Iya pag-antos para sa aton mga sala, kamatayon sa krus, kag Pagkabanhaw, nga nagatugot sa aton nga makabalik sa pagpuyo upod sa Dios.

Hibaloa sing Dugang

Kon may mga pamangkot ka parte sa sakramento, pwede mo istoryahon ang imo mga ministering brother ukon sister, ang mga lider sang inyo ward ukon branch, ukon ang mga misyonero.

© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, April 2022. Hiligaynon. 18314 861