Bulanan nga Mensahe sa Para sa Kusog sang mga Lamharon, Abril 2022

Ang Nagaantos nga Manluluwas

Ginatos ka tuig antes mag-abot si Jesucristo, nakita na ni Isaias ang Iya pag-antos para sa aton mga sala.

Isaias 53:3–5

3 Gintamay sia kag ginsikway sang mga tawo; isa ka tawo sang mga kasubo, kag nakakilala sang kalisud; kag ginlipdan naton ang aton mga nawong gikan sa iya; gintamay sia, kag wala naton sia pagtalupangda.

4 Sa pagkamatuod ginpas-an niya ang aton mga kalisud, kag gindala ang aton mga kasubo; apang ginkabig naton sia nga ginhampak, ginbunal sang Dios, kag ginsakit.

5 Apang ginpilas sia tungod sang aton mga kalapasan, ginhanog sia tungod sang aton mga kalautan: ang silot sang aton paghidaet yara sa iya; kag paagi sa iya mga labod ginpaayo kita.

gintamay kag ginsikway

Sang nagkari si Jesucristo sa kalibutan, pila ka mga tawo ang nagtuo sa Iya, pero kalabanan wala. Ginpakanubo pa gani nila Sia, kag madamo ang nagdumot sa Iya. Sang ulihi, ginpili sang mga tawo nga pasakitan Sia kag patyon. (Tan-awa sa 1 Nefi 19:9.)

ginpas-an Niya ang aton mga kalisud

Gindala ni Jesucristo sa Iya Kaugalingon ang aton mga sala, mga kasakit, kag mga kahuyang. Ginhimo Niya ini para makaangkon Sia sing kaluoy sa aton kag mahibal-an kon paano kita buligan. (Tan-awa sa Alma 7:11–13.)

ginpilas Sia tungod sang aton mga kalapasan

Si Jesucristo nag-antos para sa aton mga sala. Ginhimo Niya ini para mahimo kita nga mapatawad kon maghinulsol kita. (Tan-awa sa Doktrina kag mga Kasugtanan 18:11; 19:15–19.)

paagi sa iya mga labod ginpaayo kita

“Ang Iya mga labod” amo ang Iya mga pilas. Nagarepresentar ang mga ini sang tanan nga pag-antos nga Iya gin-agwanta para sa aton, lakip na ang pag-agay sang Iya dugo kag ang Iya kamatayon. Tungod nag-antos si Jesucristo para sa aton; mahimo kita nga mag-ayo liwat. Ginhimo sang Iya sakripisyo nga posible nga mapatawad ang aton mga sala. Samtang nagahinulsol kita kag nagatinguha nga tumanon ang aton mga kasugtanan, ginapaayo Niya kita kag ginabag-o. (Tan-awa sa Mosias 3:7–11; Mga Artikulo sang Pagtuo 1:3.)

© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, April 2022. Hiligaynon. 18314 861