Bosoom bosoom Ama Mbabun Enya Ahoɔdzen Amandzɛɛbɔ, Ebɔbira 2022

Agyenkwa no a Oruhu Amandze

Mfe ɔha pii ansaana Jesus Christ reba no, Isaiah hun N‘amandzehu ma hɛn bɔn.

Isaiah 53:3–5

3 Adasa buu no enyimtsia na wɔpoow no; awerɛhow nyimpa a yaw abra no; na wobuu no enyimtsia dɛ obi a adasa dze hɔn enyim ehuntsa no; na yeemmbu no hwee.

4 Ampaara ɔasɔw hɛn yaw, na ɔasoa hɛn awerɛhow, naaso yebuu no dɛ nyia wɔahwe no, Nyame abɔ no, na woehiahia no.

5 Na mbom wopiraa no wɔ hɛn mbrato ntsi, woposoow no wɔ hɛn emumuyɛ ntsi, wɔdze hɛn asomdwee ho ntsẽa too no do; na ne mbaa ano na wɔdze asa hɛn yarba.

Wobuu no enyimtsia na wɔpoow no

Ber a Jesus Christ baa wiadze no, binom gyee No dzii na beberee anngye No enndzi. Woemmbu no bi, na dodow taan No. Ewiei no, nyimpa saan mu yii dɛ wɔbɛtseetsee No na woeku No. (Hwɛ 1 Nephi 19:9.)

Ɔsoa hɛn amandzehu

Jesus Christ faa hɛn yaw, nyarba na mbrɛwyɛ nyinara too no ho do. Ɔyɛɛ dɛm ama Oehu hɛn mbɔbɔr na Oehu kwan a ɔbɛfa do aboa hɛn. (Hwɛ Alma 7:11–13.)

Wopiraa No ɔnam hɛn emumuyɛ ntsi

Jesus Christ hun amandzehu maa hɛn bɔn. Ɔyɛɛ iyi ama wɔdze hɛn bɔn akyɛ hɛn ber a yenu hɛnho. (Hwɛ Nkyerɛkyerɛ na Ahyɛmudzi 18:11; 19:15–19.)

na ne mbaa ano na wɔdze asa hɛn yarba

“Ne mbaa ano” nye N‘epirakur. Iyinom gyina hɔ ma amandzehu a Ɔfaa mu ɔnam hɛn ntsi, a No bɔgya a okyii maa hɛn na No wu kã ho. Osiandɛ Jesus Christ hun amandze maa hɛn ntsi, wobotum ama yeedzi mu bio. N’afɔrbɔ bue kwan ma wɔdze hɛn bɔn kyɛ hɛn. Ber a yenu hɛnho na yedzi N’ahyɛdze do no, Ɔsa hɛn yarba na Ɔsesa hɛn. (Hwɛ Mosiah 3:7–11; Gyedzi ho Nsɛmpɔw nkyerɛwee 1:3.)

© 2022 odzi wɔ Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly For the Strength of Youth Message, April 2022 ne nkyerɛasee. Fante. 18314 502