iTukutuku Vakavula ni Liaona, Jiune 2022

Na Cava e Dau Vakayacori ena Veisoqoni ni Lotu ena Sigatabu?

Na lewe ni Lotu i Jisu Karisito ni Yalododonu Edaidai era dau soqoni vata ena vei Sigatabu yadua me ra sokalou vua na Kalou ka veivakavulici vakai ira ena kosipeli i Jisu Karisito. E sa dola tu na katuba ki vei ira taucoko na tamata, ka sa tu na madidgi vei ira na lewenilotu me ra masu, vakaitavi ena vosa, ka vakavulica na lesoni kevaka era vinakata. Na veisoqoni oqo e dau vukei ira na lewenilotu me ra veivaqaqacotaki vakai ira ena vakabauta ka “me semati na yalodra ena duavata kei na veilomani” (Mosaia 18:21).

Soqoni ni Sakaramede

Era dau soqoni vata na lewe ni tabanalevu se tabana ena vei Sigatabu yadua me baleta na soqoni ni sakaramede. (E sa dola tale tale tu ga na katuba ki vei ira ka duidui na nodra vakabauta.) E dau soli na sakaramede vei ira na lewenilotu ena soqoni oqo me vukea na nodra nanumi Jisu Karisito (raica na itukutuku ni iVakavuvuli Taumada ni Kosipeli ni Epereli 2022 me baleta na ikuri ni ivakamacala ni sakaramede). Na soqoni oqo e oka talega kina na masu, sereivakatagi ni sokalou, kei na itavi vosa mai vei ira na lewenilotu me baleta na kosipeli i Jisu Karisito.

Soqoni Tale Eso

Ni oti na soqoni ni sakaramede, era dau dui tawase na lewenilotu ki na veikalasi kei na kuoramu eso. O ira na gonelalai mai na vula 18 ki na yabaki 11 era gole ki na kalasi ni Lalai. Ena imatai kei na ikatolu ni Sigatabu ni veivula, o ira kece na lewenilotu tale eso era na tiko ena Matawilivola ni Sigatabu. Ena ikarua kei na ikava ni Sigatabu, era na vakaitavi ena soqoni ni iSoqosoqo ni Veivukei, Goneyalewa, se kuoramu ni matabete.

Masu

Na masu ena veisoqoni ni Lotu era dau cabora na lewenilotu. Na masu e dau rawarawa ga ka dusimaki mai vua na Yalo Tabu. Era dau masu na lewenilotu ena nodra cavuta na vosa e vakaraitaka na loloma kei na veidokai vua na Tamada Vakalomalagi. Oqo e oka kina na kena vakayagataki na vosa Kemuni, Nomuni, kei na O ni ni masuti tiko o Koya.

iTavivosa

Era dau kerei o ira na lewenilotu mai vua e dua na lewe ni matabisopi se mataveiliutaki ni tabana me ra vosa ena soqoni ni sakaramede. Na vei itavivosa oqo e dau vakanamata ki na kosipeli i Jisu Karisito. Era dau vakayagataka o ira era vosa na ivolanikalou kei na nodra vosa na iliuliu ni Lotu ni ra vakarautaka na nodra itavivosa. Era dau wasea talega na ivakadinadina ni veivakalougatataki ni ivakavuvuli ni kosipeli ena nodra bula.

Lesoni

Ni oti na soqoni ni sakaramede, era dau vulica na lewenilotu na kosipeli ena nodra iwasewase lalai. Na lesoni e rawa ni baleta na ivolanikalou, ivakavuvuli mai na koniferedi raraba, se so tale na ulutaga. E dina ga ni dau liutaka na lesoni o qasenivuli, ia e sega ni veivunauci. E rawa ni ra wasea na lewe ni kalasi taucoko na nodra nanuma me baleta na ulutaga.

iVakadinadina

Vakadua e veivula, e dau okati ena soqoni ni sakaramede e dua na soqoni ni soli ivakadinadina. E dau vakayacori oqo ena imatai ni Sigatabu ni veivula. Ena soqoni oqo, sa rawa ni ra wasea na lewenilotu na nodra ivakadinadina me baleti Jisu Karisito kei na Nona kosipeli. Na wasei ni ivakadinadina e kena ibalebale me vakatusai na dina ni kosipeli ena veivakauqeti ni Yalo Tabu.

Vakavakarau

Era dau vakavakarau na lewenilotu ki na veisoqoni ni Sigatabu ena masu, vulici ni ivolanikalou, kei na nodra tuvakarau me ra ciqoma na veivakauqeti mai vua na Yalo Tabu. Kevaka o kerei mo vakaitavi ena vosa se vakavulica e dua na lesoni, vakasamataka ena masumasu na sala o rawa ni vakavulica kina na ivakavuvuli ni kosipeli. Vakayagataka na ivolanikalou. Wasea na ivakadinadina ni veika dina. E rawa ni ra vukei iko na nomu iliuliu ni Lotu ena nomu vakavakarau, kevaka e gadrevi.

Kevaka e tiko na nomu vakatataro me baleta na veisoqoni ni Lotu, e rawa ni o veitalanoa kei ira na nomu dauveiqaravi turaga se marama, nomu iliuliu ni tabanalevu se tabana, se o ira na daukaulotu.

Mai na iVolanikalou

Na veisoqoni ni Lotu e dau liutaki mai vua na Yalotabu (raica na Moronai 6:9).

Era dau veivakavulici vakai ira na lewe ni Lotu ena kosipeli (raica na Vunau kei na Veiyalayalati 88:77–78).

Era dau vakayagataka na qasenivuli na ivolanikalou me ra vakavulica kina na ivakavuvuli ni kosipeli (raica na Vunau kei na Veiyalayalati 42:12).

Mataisoqosoqo ni Tabanalevu

Na Lalai: E baleti ira na gone mai na vula 18 ki na yabaki 11.

Kalasi ni Goneyalewa: E baleti ira na goneyalewa mai na yabaki 12 ki na 18.

Kuoramu ni Matabete i Eroni: E baleti ira na cauravou mai na yabaki 12 ki na 18.

Na iSoqosoqo ni Veivukei: E baleti ira na marama uabula, tekivu ena yabaki 18.

Kuoramu ni Talatala Qase: E baleti ira na turaga uabula, tekivu ena yabaki 18.

© 2022 mai na Intellectual Reserve, Inc. Dodonu taucoko e taqomaki. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. iVakadewa ni iTukutuku Vakavula ni Liaona, Jiune 2022. Fijian. 17467 858