Bulanan nga Mensahe sa Liahona, Hunyo 2022

Ano ang Nagakatabo sa mga Miting sa Simbahan kon Domingo?

duha ka babayi nga nagahaksanay

Ang mga miyembro sang Ang Simbahan ni Jesucristo sang mga Santos sa Ulihing mga Adlaw nagatipon kada Domingo para magsimba sa Dios kag tudloan ang kada isa sang ebanghelyo ni Jesucristo. Ang tanan pwede nga magkadto, kag ang mga miyembro may tsansa nga magpangamuyo, maghatag sang pamulong-pulong, kag magtudlo sang mga leksyon kon gusto nila. Ining mga miting nagabulig sa mga miyembro nga pabakuron ang kada isa sa pagtuo kag nagatugot “nga ang ila mga tagipusuon [mabugkos] sing tingob sa paghiliusa kag sa gugma” (Mosias 18:21).

bata nga lalaki nga nagapanagtag sang sakramento sakay sa wheelchair

Sakramento nga Miting

Ang mga miyembro sang ward ukon branch nagatipon kada Domingo para sa sakramento nga miting. (Ang mga indi miyembro pwede man magtambong.) Ang sakramento ginahatag sa mga miyembro sa tion sining miting para buligan sila nga madumduman si Jesucristo (tan-awa sa artikulo parte sa Abril 2022 nga mga Pundasyon sang Ebanghelyo para sa dugang nga impormasyon parte sa sakramento). Ang miting nagalakip man sang mga pangamuyo, musika sang pagsimba, kag mga pamulong-pulong nga ginahatag sang mga miyembro parte sa ebanghelyo ni Jesucristo.

duha ka mga dalagita nga nagayuhum sa simbahan

Iban pa nga mga Miting

Pagkatapos sang sakramento nga miting, ang mga miyembro nagaseparar sa mga klase kag mga korum. Ang mga kabataan nga nagaedad 18 ka bulan pa-11 ka tuig nagasulod sa Primary. Sa una kag ikatatlo nga Domingo kada bulan, ang iban pa nga mga miyembro nagasulod sa Sunday School. Sa ikaduha kag ikaapat nga Domingo, nagasulod sila sa Relief Society, Young Women, ukon mga miting sang korum sang priesthood.

Mga Pangamuyo

Ang mga pangamuyo sa mga miting sang Simbahan ginahatag sang mga miyembro. Ang mga pangamuyo simple lang kag suno sa direksyon sang Balaan nga Espiritu. Ang mga miyembro nagapangamuyo gamit ang mga tinaga nga nagapahayag sang pagpalangga kag respeto sa Amay nga Langitnon. Nagalakip ini sang mga pronoun nga Thee, Thy, Thine, kag Thou kon magpangamuyo sa Iya.

Mga Ginpanghambal

Isa ka miyembro sang bishopric ukon pangulohan sang branch mahimo nga magpangabay sa mga miyembro nga maghambal sa sakramento nga miting. Ining mga pamulong-pulong nagatutok sa ebanghelyo ni Jesucristo. Ang mga manughambal nagagamit sang balaan nga mga kasulatan kag sang mga pulong sang mga lider sang Simbahan mientras nagahanda sila sang ila mga inughambal. Nagapamatuod man sila parte sa mga bugay sang mga prinsipyo sang ebanghelyo sa ila mga kabuhi.

Mga Leksyon

Pagkatapos sang sakramento nga miting, ang mga miyembro nagatuon parte sa ebanghelyo sa mas magagmay nga mga klase. Ang mga leksyon mahimo nga parte sa balaan nga mga kasulatan, mga pinanudlo sa pangkabilogan nga komperensya, ukon iban pa nga mga topiko. Bisan pa nga ang titser ang magapanguna sa leksyon, indi ini wali. Ang tanan nga ara sa klase pwede maghambal sang ila mga pamensaron parte sa topiko.

lalaki nga nagahambal sa pulpito sa simbahan

Testimonya

Kis-a kada bulan, ang sakramento nga miting nagalakip sang tion sang pagtestimonya. Masami ini ginahiwat sa una nga Domingo sang bulan. Sa sining miting, ang mga miyembro pwede nga magpaambit sang ila mga testimonya parte kay Jesucristo kag sa Iya ebanghelyo. Ang pagpaambit sang testimonya nagakahulugan sang pagpahayag sang mga kamatuoran sang ebanghelyo suno sa inspirasyon sang Balaan nga Espiritu.

Pagpanghanda

Ang mga miyembro nagahanda para sa mga miting kon Domingo paagi sa pagpangamuyo, pagtuon sang balaan nga mga kasulatan, kag paghanda sa pagbaton sang inspirasyon halin sa Balaan nga Espiritu. Kon ginapangabay ka nga maghatag sang pamulong-pulong ukon magtudlo sang leksyon, pamensara sing mapinangamuyon kon paano ka magtudlo sang mga prinsipyo sang ebanghelyo. Gamita ang balaan nga mga kasulatan. Magpaambit sang testimonya parte sa kamatuoran. Ang imo mga lider sa Simbahan makabulig sa imo nga maghanda, kon kinahanglanon.

Kon may mga pamangkot ka parte sa mga miting sang Simbahan, pwede mo istoryahon ang imo mga ministering brother ukon sister, ang mga lider sang inyo ward ukon branch, ukon ang mga misyonero.

Gikan sa Balaan nga mga Kasulatan

Ang mga miting sang Simbahan ginagiyahan sang Espiritu (tan-awa sa Moroni 6:9).

Ang mga miyembro sang Simbahan nagatudloanay sang kada isa sang ebanghelyo (tan-awa sa Doktrina kag mga Kasugtanan 88:77–78).

Ang mga titser nagagamit sang balaan nga mga kasulatan sa pagtudlo sang mga prinsipyo sang ebanghelyo (tan-awa sa Doktrina kag mga Kasugtanan 42:12).

Mga Organisasyon sa Ward

Primary: Para sa kabataan nga nagaedad 18 ka bulan pa-11 ka tuig.

Mga klase sa Young Women: Para sa lamharon nga mga babayi nga nagaedad 12 tubtob 18.

Mga korum sa Aaronic Priesthood: Para sa mga pamatan-on nga nagaedad 12 tubtob 18.

Relief Society: Para sa hamtong nga mga babayi, halin sa edad nga 18.

Korum sang mga Elder: Para sa hamtong nga mga lalaki, halin sa edad 18.

© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, June 2022. Hiligaynon. 18315 861