Binulan a Mensahe iti Liahona , Hunio 2022

Ania ti Mapasamak kadagiti Miting iti Simbaan iti Domingo?

Agguummong dagiti miembro ti Ti Simbaan ni Jesucristo dagiti Santo iti Ud-udina nga Aldaw iti tunggal Domingo tapno agdaydayaw iti Dios ken agsisinnuro iti ebanghelio ni Jesucristo. Mapasangbay ti amin a dumar-ay, ken addaan dagiti miembro iti gundaway nga agkararag, mangted iti sarita, ken mangisuro kadagiti lesson no tarigagayanda. Dagitoy a miting ti mangtulong a mangpapigsa kadagiti miembro iti tunggal maysa iti pammati ken addaan “panagrereppeng ti puspusoda iti panagkaykaysa ken ayat” (Mosiah 18:21).

Miting iti Sakramento

Agguummong dagiti miembro ti ward wenno branch iti tunggal Domingo para iti miting ti sakramento. (Mapasangbay met a dumar-ay dagiti ditayo kapada iti pammati.) Maited ti sakramento kadagiti miembro kabayatan daytoy a miting a mangtulong kadakuada a manglagip ken ni Jesucristo (kitaen iti April 2022 Gospel Basics article para iti ad-adu pay nga impormasion maipapan iti sakramento). Iraman pay ti miting dagiti panagkararag, musika a pagdaydayaw, ken panagsarita nga ited dagiti miembro maipapan iti ebanghelio ni Jesucristo.

Dadduma pay a Miting

Kalpasan ti miting ti sakramento, agsisina dagiti miembro iti klase ken korum. Dumar-ay iti Primary dagiti ubbing nga agtawen iti 18 a bulan agingga iti 11 a tawen. Kadagiti umuna ken maikatlo a Domingo ti tunggal bulan, dumar-ay iti Sunday school ti amin a dadduma pay a miembro. Kadagiti maikadua ken maikapat a Domingo, dumar-ayda kadagiti miting iti Relief Society, Young Women, wenno priesthood quorum.

Dagiti Kararag:

Ited dagiti miembro dagiti kararag kadagiti miting iti Simbaan. Simple dagiti kararag ken iturong ti Espiritu Santo. Agkararag dagiti miembro nga us-usarenda dagiti balikas a mangipeksa iti ayat ken panagraemda iti Nailangitan nga Ama. Iraman daytoy ti panangusar kadagiti pronombre [pronoun] a -Ka [Thee], -Mo [Thy], -Yo[Thine], ken Sika [Thou] no agkarkararag Kenkuana.

Dagiti Mensahe

Mabalin a kiddawen ti maysa a miembro ti bishopric wenno panguluen ti branch a mangted dagiti miembro iti mensahe iti miting iti sakramento. Maisentro dagitoy a mensahe iti ebanghelio ni Jesucristo. Agusar dagiti agsarita kadagiti nasantuan a kasuratan ken balikas dagiti lider ti Simbaan bayat ti panagsaganada kadagiti mensaheda. Mabalinda pay nga iburay ti pammaneknekda maipapan kadagiti bendision ti ebanghelio ti priesthood iti biagda.

Dagiti Adalen

Kalpasan ti miting ti sakramento, agsursuro dagiti miembro maipapan iti ebanghelio iti babbabassit a klase. Mabalin a dagiti lesson ket maipapan iti nasantuan a kasuratan, pannursuro manipud iti sapasap a komperensia, wenno dadduma pay a topiko. Nupay ti mannursuro ti mangidauluan iti lesson, saan a lektura daytoy. Mabalin nga iburay ti amin a miembro ti klase dagiti kapanunotanda maipapan iti topiko.

Pammaneknek

Maminsan iti makabulan, iraman ti miting iti sakramento ti maysa a miting ti panagpaneknek. Gagangay a maar-aramid daytoy iti umuna a Domingo ti bulan. Kabayatan daytoy a mitng, mabalin dagiti miembro ti mangiburay kadagiti pammaneknekda maipapan ken ni Jesucristo ken ti ebangheliona. Ti mangiburay iti pammaneknek kayatna a sawen ti mangipakdaar kadagiti kinapudno ti ebanghelio kas pinaregta ti Espiritu Santo.

Panagsagana

Agsagana dagiti miembro para kadagiti miting iti Domingo babaen ti panagkararag, panagadal iti nasantuan a kasuratan, ken panangsagana nga umawat iti inspirasion manipud iti Espiritu Santo. No maidawat kadakayo a mangted iti maysa a mensahe wenno mangisuro iti maysa a lesson, nainkararagan a panunotenyo maipapan iti no kasano a maisuroyo dagiti pagbatayan ti ebanghelio. Usarenyo dagiti nasantuan a kasuratan. Iburay ti pammaneknek maipapan iti kinapudno. Matulongannakayo dagiti lideryo iti Simbaan nga agsagana, no kasapulan.

No adda dagiti saludsodyo maipapan iti sakramento, mabalinyo a kasarita dagiti ministering brother wenno sisteryo, dagiti lideryo iti ward wenno branch, wenno dagiti missionary.

Manipud kadagiti Nasantuan a Kasuratan

Iturong ti Espiritu dagiti miting iti Simbaan (kitaen iti Moroni 6:9).

Isuro dagiti miembro ti Simbaan ti ebanghelio iti tunggal maysa (kitaen iti Doktrina ken Katulagan 88:77–78).

Usaren dagiti mannursuro dagiti nasantuan a kasuratan a mangisuro maipapan kadagiti pagbatayan ti ebanghelio (kitaen iti Doktrina ken Katulagan 42:12).

Dagiti Organisasion iti Ward

Primary: Para kadagiti ubbing nga agtawen iti 18 a bulan agingga iti 11 a tawen.

Dagiti klase iti Young Women: para kadagiti agtutubo a babbai nga agtawen iti 12 agingga iti 18.

Dagiti korum ti Aaronic Priesthood: para kadagiti agtutubo a lallaki nga agtawen iti 12 agingga iti 18.

Relief Society: para kadagiti nataengan a babbai, mangrugi iti tawen a 18.

Elders quorum: Para kadagiti nataengan a lallaki, mangrugi iti tawen a 18.

© 2022 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Binulan a Mensahe ti Liahona, Hunio 2022. Ilokano. 18315 864