“What Happens in Sunday Church Meetings?,” Liahona, June 2022.
ຂ່າວສານປະຈຳເດືອນ Liahona, ເດືອນມິຖຸນາ 2022
ການປະຊຸມຂອງສາດສະໜາຈັກໃນວັນອາທິດມີຫຍັງແດ່?
ສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເຕົ້າໂຮມກັນທຸກວັນອາທິດເພື່ອນະມັດສະການພຣະເຈົ້າ ແລະ ສິດສອນຊຶ່ງກັນແລະກັນເຖິງພຣະກິດຕິຄຸນຂອງພຣະເຢຊູຄຣິດ. ຍິນດີຕ້ອນຮັບໝົດທຸກຄົນທີ່ເຂົ້າຮ່ວມ, ແລະ ສະມາຊິກມີໂອກາດໃນການອະທິຖານ, ກ່າວຄຳປາໄສ, ແລະ ສິດສອນບົດຮຽນຕ່າງໆຖ້າເຂົາເຈົ້າຕ້ອງການ. ການປະຊຸມເຫລົ່ານີ້ຊ່ວຍສະມາຊິກເສີມສ້າງຄວາມເຂັ້ມແຂງໃນສັດທາໃຫ້ກັນແລະກັນ ແລະ ເຮັດໃຫ້ “ໃຈຂອງພວກເຂົາຜູກພັນກັນໄວ້ໃນຄວາມເປັນອັນໜຶ່ງດຽວກັນ ແລະ ໃນຄວາມຮັກທີ່ມີຕໍ່ກັນ” (ໂມໄຊຢາ 18:21).
ກອງປະຊຸມສິນລະລຶກ
ສະມາຊິກຂອງຫວອດ ຫລື ສາຂາ ເຕົ້າໂຮມກັນທຸກວັນອາທິດສຳລັບກອງປະຊຸມສິນລະລຶກ. (ຜູ້ທີ່ບໍ່ເຊື່ອຖືຄືກັນກັບເຮົາ ກໍຍິນດີຕ້ອນຮັບໃຫ້ເຂົ້າຮ່ວມເຊັ່ນກັນ.) ສິນລະລຶກທີ່ມອບໃຫ້ແກ່ສະມາຊິກລະຫວ່າງກອງປະຊຸມນີ້ແມ່ນເພື່ອຊ່ວຍໃຫ້ເຂົາເຈົ້າລະນຶກເຖິງພຣະເຢຊູຄຣິດ (ເບິ່ງ April 2022 Gospel Basics article ສຳລັບລາຍລະອຽດເພີ່ມເຕີມກ່ຽວກັບສິນລະລຶກ). ກອງປະຊຸມແມ່ນລວມທັງການອະທິຖານ, ເພງນະມັດສະການ, ແລະ ການກ່າວຄຳປາໄສໂດຍສະມາຊິກກ່ຽວກັບພຣະກິດຕິຄຸນຂອງພຣະເຢຊູຄຣິດ.
ການປະຊຸມອື່ນໆ
ຫລັງຈາກກອງປະຊຸມສິນລະລຶກ, ສະມາຊິກຈະແຍກຍ້າຍກັນໄປຫ້ອງຮຽນຕ່າງໆ ແລະ ກຸ່ມຖານະປະໂລຫິດ. ເດັກນ້ອຍທີ່ມີອາຍຸ 18 ເດືອນ ຫາ 11 ປີຈະເຂົ້າຮ່ວມຊັ້ນປະຖົມໄວ. ໃນວັນອາທິດທຳອິດ ແລະ ວັນອາທິດທີສາມຂອງແຕ່ລະເດືອນ, ສະມາຊິກຜູ້ອື່ນໆໝົດທຸກຄົນຈະເຂົ້າຮ່ວມໂຮງຮຽນວັນອາທິດ. ໃນວັນອາທິດທີສອງ ແລະ ວັນອາທິດທີສີ່, ເຂົາເຈົ້າຈະເຂົ້າຮ່ວມການປະຊຸມສະມາຄົມສະຕີສົງເຄາະ, ການປະຊຸມກຸ່ມຍິງໜຸ່ມ, ຫລື ການປະຊຸມກຸ່ມຖານະປະໂລຫິດ.
ການອະທິຖານ
ການອະທິຖານຢູ່ໃນການປະຊຸມຂອງສາດສະໜາຈັກຈະຖືກກ່າວໂດຍສະມາຊິກ. ການອະທິຖານແມ່ນລຽບງ່າຍ ແລະ ໄດ້ຮັບການຊົງນຳຈາກພຣະວິນຍານບໍລິສຸດ. ສະມາຊິກອະທິຖານໂດຍນຳໃຊ້ຖ້ອຍຄຳທີ່ສະແດງເຖິງຄວາມຮັກ ແລະ ຄວາມເຄົາລົບຕໍ່ພຣະບິດາເທິງສະຫວັນ. ໃນນີ້ລວມທັງການນຳໃຊ້ຄຳແທນນາມທີ່ວ່າ ພຣະອົງ, ຂອງພຣະອົງ, ຂອງພຣະອົງເອງ, ແລະ ພຣະອົງເຈົ້າ ເມື່ອອະທິຖານຫາພຣະອົງ.
ຄຳປາໄສ
ຄົນໜຶ່ງໃນຝ່າຍອະທິການ ຫລື ໃນຝ່າຍປະທານສາຂາເປັນຜູ້ຂໍໃຫ້ສະມາຊິກກ່າວຄຳປາໄສໃນກອງປະຊຸມສິນລະລຶກ. ຄຳປາໄສເຫລົ່ານີ້ຈະເນັ້ນກ່ຽວກັບພຣະກິດຕິຄຸນຂອງພຣະເຢຊູຄຣິດ. ຜູ້ກ່າວຄຳປາໄສຈະນຳໃຊ້ພຣະຄຳພີ ແລະ ຂໍ້ຄວາມຂອງຜູ້ນຳຂອງສາດສະໜາຈັກຂະນະທີ່ເຂົາເຈົ້າກະກຽມຄຳປາໄສຂອງເຂົາເຈົ້າ. ເຂົາເຈົ້າຍັງແບ່ງປັນປະຈັກພະຍານເຖິງພອນຂອງຫລັກທຳພຣະກິດຕິຄຸນໃນຊີວິດຂອງເຂົາເຈົ້ານຳອີກ.
ບົດຮຽນຕ່າງໆ
ຫລັງຈາກກອງປະຊຸມສິນລະລຶກ, ສະມາຊິກກໍໄດ້ຮຽນຮູ້ກ່ຽວກັບພຣະກິດຕິຄຸນໃນຫ້ອງຮຽນທີ່ນ້ອຍກວ່າ. ບົດຮຽນຕ່າງໆອາດກ່ຽວກັບພຣະຄຳພີ, ຄຳສອນຈາກກອງປະຊຸມໃຫຍ່ສາມັນ, ຫລື ເລື່ອງອື່ນໆ. ເຖິງແມ່ນວ່າຄູສອນຈະເປັນຜູ້ນຳພາບົດຮຽນ, ແຕ່ມັນກໍບໍ່ແມ່ນການບັນຍາຍ. ສະມາຊິກທຸກຄົນໃນຫ້ອງຮຽນສາມາດແບ່ງປັນຄວາມຄິດຂອງເຂົາເຈົ້າກ່ຽວກັບຫົວຂໍ້ດັ່ງກ່າວ.
ປະຈັກພະຍານ
ເດືອນລະຄັ້ງ, ທີ່ກອງປະຊຸມສິນລະລຶກຈະມີການປະຊຸມສະແດງປະຈັກພະຍານນຳອີກ. ຕາມປົກກະຕິແລ້ວ ມັນຈະເປັນວັນອາທິດທຳອິດຂອງເດືອນ. ລະຫວ່າງການປະຊຸມນີ້, ສະມາຊິກສາມາດສະແດງປະຈັກພະຍານຂອງເຂົາເຈົ້າ ເຖິງພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ການສະແດງປະຈັກພະຍານໝາຍເຖິງການປະກາດຄວາມຈິງຂອງພຣະກິດຕິຄຸນຕາມການດົນໃຈຈາກພຣະວິນຍານບໍລິສຸດ.
ການກະກຽມ
ສະມາຊິກກຽມພ້ອມສຳລັບການປະຊຸມໃນວັນອາທິດໂດຍການອະທິຖານ, ການສຶກສາພຣະຄຳພີ, ແລະ ການກຽມພ້ອມທີ່ຈະຮັບການດົນໃຈຈາກພຣະວິນຍານບໍລິສຸດ. ຖ້າຫາກທ່ານຖືກຂໍໃຫ້ກ່າວຄຳປາໄສ ຫລື ສິດສອນບົດຮຽນ, ຈົ່ງຄິດກ່ຽວກັບສິ່ງທີ່ທ່ານສາມາດສິດສອນຫລັກທຳພຣະກິດຕິຄຸນດ້ວຍການອະທິຖານ. ນຳໃຊ້ພຣະຄຳພີ. ສະແດງປະຈັກພະຍານເຖິງຄວາມຈິງ. ຜູ້ນຳໃນສາດສະໜາຈັກຂອງທ່ານສາມາດຊ່ວຍທ່ານໃນການກະກຽມ, ຖ້າຕ້ອງການ.
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, June 2022. Laotian. 18315 331