ສິນລະລຶກ: ວິທີທາງເພື່ອລະນຶກເຖິງພຣະຜູ້ຊ່ວຍໃຫ້ລອດ

ໃນຄືນກ່ອນທີ່ພຣະອົງຈະຖືກຄຶງ, ພຣະເຢຊູຄຣິດໄດ້ພົບກັບອັກຄະສາວົກຂອງພຣະອົງທີ່ຄາບເຂົ້າເທື່ອສຸດທ້າຍ. ຢູ່ທີ່ນັ້ນພຣະອົງໄດ້ມອບສິນລະລຶກໃຫ້ແກ່ພວກເພິ່ນເປັນເທື່ອທຳອິດ. ພຣະອົງໄດ້ອະທິບາຍວ່າ ມັນເປັນວິທີທີ່ຈະໃຫ້ພວກເພິ່ນລະນຶກເຖິງພຣະອົງ. ສິນລະລຶກແມ່ນ ພິທີການ ທີ່ເຮົາຮັບສ່ວນຂອງເຂົ້າຈີ່ ແລະ ນ້ຳເພື່ອລະນຶກເຖິງ ການຊົດໃຊ້ ຂອງພຣະຄຣິດ. ເຂົ້າຈີ່ເປັນຕົວແທນໃຫ້ແກ່ພຣະກາຍຂອງພຣະຄຣິດ, ແລະ ນ້ຳເປັນຕົວແທນໃຫ້ແກ່ໂລຫິດຂອງພຣະອົງ.

ເຮົາຮັບສິນລະລຶກທຸກວັນອາທິດໃນລະຫວ່າງກອງປະຊຸມສິນລະລຶກ. ເຮົາຮ້ອງເພງສວດ ໃນຂະນະທີ່ ຜູ້ດຳລົງຖານະປະໂລຫິດ ຫັກເຂົ້າຈີ່ເປັນຕ່ອນນ້ອຍໆ.

ຜູ້ດຳລົງຖານະປະໂລຫິດ ທີ່ຫັກເຂົ້າຈີ່ຈະກ່າວຄຳອະທິຖານພິເສດ. ຄຳອະທິຖານເຫລົ່ານີ້ມີຢູ່ໃນ ຄຳສອນ ແລະ ພັນທະສັນຍາ 20:77, 79. ຄຳອະທິຖານຊ່ວຍເຕືອນເຮົາເຖິງສິ່ງທີ່ເຮົາໄດ້ສັນຍາໄວ້ກັບພຣະບິດາເທິງສະຫວັນ ແລະ ສິ່ງທີ່ພຣະອົງໄດ້ສັນຍາໄວ້ກັບເຮົາ.

ຜູ້ດຳລົງຖານະປະໂລຫິດ ຄົນອື່ນໆຈະແຈກຢາຍສິນລະລຶກໃຫ້ກັບສະມາຊິກຫວອດ ຫລື ສາຂາ. ຂະນະທີ່ເຮົາຮັບສິນລະລຶກ, ເຮົາລະນຶກເຖິງພຣະຜູ້ຊ່ວຍໃຫ້ລອດ ແລະ ການເສຍສະລະຂອງພຣະອົງເພື່ອເຮົາ. ເຮົາຍັງໃຫ້ຄຳໝັ້ນສັນຍາອີກວ່າ ຈະຮັກສາພັນທະສັນຍາ (ຄຳສັນຍາ) ທີ່ເຮົາໄດ້ເຮັດໄວ້ກັບພຣະບິດາເທິງສະຫວັນ.

ເດັກຍິງກຳລັງຮັບສ່ວນເຂົ້າຈີ່ໃນກອງປະຊຸມສິນລະລຶກ

ເຮົາມີຄວາມຄາລະວະໃນຂະນະທີ່ສິນລະລຶກຖືກໃຫ້ພອນ ແລະ ຖືກຢາຍ. ມັນເປັນເວລາສຳລັບເຮົາທີ່ຈະຄິດກ່ຽວກັບພຣະຊົນຊີບ, ການສິດສອນ, ແລະ ການຊົດໃຊ້ ຂອງພຣະເຢຊູຄຣິດ. ເຮົາຍັງສາມາດຄິດເຊັ່ນກັນກ່ຽວກັບວິທີທີ່ເຮົາຈະສາມາດເຮັດຕາມຕົວຢ່າງຂອງພຣະອົງໄດ້ແນວໃດ.

ສັບທີ່ຄວນຮູ້

ພິທີການ: ການກະທຳທີ່ສັກສິດ ແລະ ເປັນທາງການ ຖືກດຳເນີນໂດຍສິດອຳນາດຂອງຖານະປະໂລຫິດ.

ຜູ້ດຳລົງຖານະປະໂລຫິດ: ຜູ້ຊາຍທີ່ເປັນຜູ້ໃຫຍ່ ແລະ ຊາຍໜຸ່ມທີ່ມີຄ່າຄວນ ຜູ້ທີ່ຖືກມອບສິດອຳນາດໃຫ້ກະທຳໃນພຣະນາມຂອງພຣະເຢຊູຄຣິດ.

ການຊົດໃຊ້ຂອງພຣະເຢຊູຄຣິດ: ຄວາມທຸກທໍລະມານຂອງພຣະອົງເພື່ອບາບຂອງເຮົາ, ສິ້ນພຣະຊົນເທິງໄມ້ກາງແຂນ, ແລະ ຟື້ນຄືນພຣະຊົນ, ຊຶ່ງເຮັດໃຫ້ເປັນໄປໄດ້ສຳລັບເຮົາທີ່ຈະກັບໄປຢູ່ກັບພຣະເຈົ້າ.

© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, April 2022. Laotian. 18314 331