Mulwol ni Ngan Thapeg ko biney e Pul nifan e Liahona, ko June 2022

Mang e Pi Nʼen ni ma Buch ulan e Moʼolung ko Galasia ko rofen ni Madnom?

Gidiiʼ ko Fare Galasia ku Yesus Kristus ni Fan ko Gidiiʼen Got ko Tin Tomur e Rran e yad ma mukun ni gubin e Madnom ni ngar liyor gad ngak Got mi yad fil ngorad fare gospel rokʼ Yesus Kristus. Gubin e gidiiʼ ma rayag ni ngar bad ngar uned, ma chonggin gidiiʼen e galasia e yadra meybil, mi yad non, mi yad machib nag fapi nʼen ni ngan fil ni faʼanra yad baʼadag. Pi moʼolung ney e ma ayuweg gidiiʼen e galasia ni ngar gel gad u taʼabang ko mich rorad “ma nge taʼareb gumʼirchaʼraed u taʼabang ngo fithikʼ e tʼufeg roraed ngoraed” (Mosiah 18:21).

Mo’olung ko Sakrament

Gidiiʼen fare ward fa branch e ma mukun ni gubin e Madnom nifen fare moʼolung ko sakrament. (Gidiiʼ ni dani taʼareb rogon e mich rodad e krayag ni ngar bad ngar uned ngay.) Fare sakrament e yima piiʼ ngak gidiiʼen e galasia ko ngiyalʼ e biney e moʼolung ni nge ayuwegrad ni ngar pugoren ngorad Yesus Kristus (mu guy ko fare April 2022 Gospel Basics article ko boch morngaʼagen e sakrament). Biney e moʼolung ab muʼun e meybil ngay, tang nib thothup, nge numon ni ma piiʼ gidiiʼen e galasia ni morngaʼagen e gospel rokʼ Yesus Kristus.

Reb e pi Moʼolung

Tomuren e moʼolung ko sakrament, me wear e gidiiʼ nra beeʼ ma bay e bin klass nge ulung ni nge yan ngay. Bitir ni 18 fana puul nge madaʼ ko 11 e duw e yad ma yan nga Primary. Bin sommʼon nge bin dalip e Madnom ulan fare puul, e gubin gidiiʼen e galasia ni yad ma un ko Sunday School. Ma bin lʼagruw nge bin aningeg e Madnom, e yad ma un fapi mo’olung ko Relief Society, Young Women, fa ulung ko priesthood.

Fapi Meybil

Fapi meybil ko moʼolung ko Galasia e ma piiʼ gidiiʼen e galasia. Pi meybil ney ab ngoch ma mayib ni be thogthog nag fare Kan ni Thothup. Gidiiʼen e galasia e yad ma meybil ni yad ma yog e thin ni be dag e tuʼufeg ni be tayfan e Chitamangiy nu Tharmiy. Biney ab muʼun fapi thin ngay ni Thee, Thy, Thine, nge Thou ko ngiyalʼ ni yibe meybil ngak.

Fapi Numon

Reb fapi gidiiʼen e bishofric fa branch presidency e ma fith reb fapi gidiiʼen e galasia ni nge non ulan fare moʼolung ko sakrament. Tiney e numon e ma weliy morngaʼagen e gospel rokʼ Yesus Kristus. Pi gidiiʼ ney nra non e yad ma fanay e thin nib thothup nge thin ko tiyugangʼ ko Galasia ko napan ni yad be falʼag rogon e numon rorad. Ma ki yad ma micheg fapi tawaʼath ko yalen e gospel ulan e yafos rorad.

Fapi Lesson

Tomuren e moʼolung ko sakrament, gidiiʼen e galasia e yad ma fil morngaʼagen e gospel ulan e klass nib achichig. Fapi lesson e bay ni morngaʼagen fapi chep nib thothup, machib ko general conference, fa morngaʼagen boch banʼen. Sensey e ma machib nag e biney e klass, machane gathi kemus ni fare sensey e be machib. Gubin gidiiʼen fare klass e rayag ni ngar weliyed e tin ni be yib ko tafney rorad ko nʼen ni yibe weliy morngaʼagen.

Michuwaen’uy

Taʼabiyay ulan fare puul, ab muʼun e moʼolung ko testimony ngay ko ngiyalʼ e moʼolung ko sakrament. Biney e bagaʼ ni ma buch ko bin sommʼon e Madnom ulan fare puul. Napan e biney e moʼolung, gidiiʼen e galasia e rayag ni ngar weliyed e michaenʼ rorad ngak Yesus Kristus nge fare gospel rokʼ. Ra ngan weliy e tin nib michuwunʼuy ngay e be yipʼ fan ni ngan weliy fapi nʼen nib riyulʼ ko gospel ni be thogthog nag fare Kan ni Thothup.

Fal’eg Rogoy

Gidiiʼen e galasia e yad ma falʼeg rogon rad ko fare moʼolung ko Madnom ni yad ma meybil, fil fapi chep nib thothup, min par ni falʼ rograd ni ngar thapaged fapi yiʼiy ni ma yib u dakaen e Kan ni Thothup. Faʼanra kan fithem ni ngam non fa ngam machib nag fapi lesson, meybil ko rogon nrayag ni ngam machib nag yalen fare gospel. Fanay fapi chep nib thothup. Micheg e tin nib riyulʼ. Pi tiyugangʼ ko Galasia rom e rayag ni ngar piiʼed e ayuw ngom, ni faʼanra btuʼuf.

Faʼanra bay e duwer rom ni morngaʼagen e sakrament, rayag ni ngam non ngak e en ni ma machib ngom ni pumoʼon fa bpin, ward rom fa tiyugangʼ ko branch rom, fa boech e pi missionary.

Yib ko pi Chep nib Thothup

Thothup e ma gagiyeg nag fapi moʼolung ko Galasia (mu guy ko Moroni 6:9).

Gidiiʼen e Galasia e yad ma machib nag fare gospel ngorad (mu guy ko Doctrine and Covenants 88:77–78).

Fapi sensey e yad ma fanay fapi chep nib thothup ni ngar machib niged fapi yalen e gospel (mu guy ko Doctrine and Covenants 42:12).

Fapi Ulung ko Ward

Primary: Bitir ni 18 fana puul nge madaʼ ko 11 e duw e yad ma yan nga Primary.

Klass ko Young Women: Fan e piʼin ni bpin nib falʼyangren ni 12 e duw rorad nge madaʼ ko 18.

Aaronic Priesthood quorums: Fan e pagal nib falʼyangren ni 12 e dow rorad nge madaʼ ko 18.

Relief Society: Fan e piʼin ni bpin, 18 e duw ngalang.

Elders quorums: Fan e pumoʼon, 18 e duw ngalang.

© 2022 ko Intellectual Reserve, Inc. Gubin ma bay mat’won. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Ni pilyeg ko Mulwol ni Ngan Thapeg ko biney e Pul nifan e Liahona, June 2022. Yapese. 18315 905