“Scriptures: The Word of God,” Liahona, July 2022.
ຂ່າວສານປະຈຳເດືອນ Liahona, ເດືອນກໍລະກົດ 2022
ພຣະຄຳພີ: ພຣະຄຳຂອງພຣະເຈົ້າ
Old Testament Prophet [ສາດສະດາໃນພຣະຄຳພີເດີມ], ໂດຍ ຈູດິດ ເອ ເມີ
ພຣະຄຳພີແມ່ນປຶ້ມສັກສິດທີ່ສ່ວນຫລາຍໄດ້ຖືກຂຽນໂດຍບັນດາສາດສະດາ. ພຣະຄຳພີເປັນພະຍານເຖິງພຣະເຢຊູຄຣິດ ແລະ ສິດສອນກ່ຽວກັບພຣະກິດຕິຄຸນຂອງພຣະອົງ. ພຣະຄຳພີທີ່ເປັນທາງການຂອງສາດສະໜາຈັກມີ ພຣະຄຣິສຕະທຳຄຳພີ (ຊຶ່ງລວມທັງພຣະຄຳພີເດີມ ແລະ ພຣະຄຳພີໃໝ່), ພຣະຄຳພີມໍມອນ, ຄຳສອນ ແລະ ພັນທະສັນຍາ, ແລະ ໄຂ່ມຸກອັນລ້ຳຄ່າ.
ພຣະຄຳພີເດີມ
ພຣະຄຳພີເດີມເປັນບັນທຶກຂອງການພົວພັນຂອງພຣະເຈົ້າກັບຜູ້ຄົນແຫ່ງພັນທະສັນຍາຂອງພຣະອົງໃນສະໄໝບູຮານ. ມັນລວມທັງຄຳສອນຂອງບັນດາສາດສະດາທັງຫລາຍເຊັ່ນ ໂມເຊ, ໂຢຊວຍ, ເອຊາຢາ, ເຢເຣມີຢາ, ແລະ ດານີເອນ. ເຖິງແມ່ນວ່າມັນໄດ້ຖືກຂຽນເປັນເວລາຫລາຍຮ້ອຍປີກ່ອນການກຳເນີດຂອງພຣະເຢຊູຄຣິດ, ແຕ່ສາດສະດາຫລາຍທ່ານໃນພຣະຄຳພີເດີມໄດ້ຂຽນກ່ຽວກັບພຣະອົງ.
ພຣະຄຳພີໃໝ່
ພຣະຄຳພີໃໝ່ບັນທຶກການກຳເນີດ, ພຣະຊົນຊີບມະຕະ, ຄຳສອນ, ແລະ ການຊົດໃຊ້ຂອງພຣະເຢຊູຄຣິດ. ມັນຍັງລວມທັງຄຳສອນຂອງບັນດາອັກຄະສາວົກ ແລະ ບັນດາສານຸສິດຄົນອື່ນໆຂອງພຣະຄຣິດນຳອີກ. ພຣະຄຳພີໃໝ່ຊ່ວຍໃຫ້ເຮົາເຂົ້າໃຈວິທີດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດໃນທຸກວັນນີ້.
ພຣະຄຳພີມໍມອນ: ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ
ພຣະຄຳພີມໍມອນເປັນບັນທຶກເຖິງບັນດາຜູ້ຄົນຈຳນວນໜຶ່ງທີ່ໄດ້ອາໄສຢູ່ໃນອາເມຣິກາໃນສະໄໝບູຮານ. ມັນລວມທັງຄຳສອນຂອງບັນດາສາດສະດາ, ແລະ ຈຸດປະສົງຕົ້ນຕໍຂອງມັນແມ່ນເພື່ອໃຫ້ທຸກຄົນຍອມຮັບວ່າ ພຣະເຢຊູຄືພຣະຄຣິດ. ສາດສະດາໂຈເຊັບ ສະມິດ ໄດ້ແປມັນຈາກແຜ່ນຈາລຶກຄຳ ໂດຍຂອງປະທານ ແລະ ອຳນາດຂອງພຣະເຈົ້າ.
Joseph Smith Jr. Receiving Revelation [ໂຈເຊັບ ສະມິດ ຜູ້ລູກ ກຳລັງຮັບການເປີດເຜີຍ], ໂດຍ ແດນໂຍ ເອ ຫລຸຍ
ຄຳສອນ ແລະ ພັນທະສັນຍາ
ຄຳສອນ ແລະ ພັນທະສັນຍາ ບັນຈຸການເປີດເຜີຍຕ່າງໆທີ່ມອບໃຫ້ໂຈເຊັບ ສະມິດ ແລະ ບັນດາສາດສະດາອື່ນໆໃນຍຸກສຸດທ້າຍ. ການເປີດເຜີຍບັນຍາຍເຖິງວິທີທີ່ສາດສະໜາຈັກຂອງພຣະຄຣິດໄດ້ຖືກຈັດຕັ້ງຂຶ້ນຢ່າງໃດ. ມັນຍັງບັນຈຸຄຳສອນພຣະກິດຕິຄຸນທີ່ສຳຄັນກ່ຽວກັບຖານະປະໂລຫິດ, ພິທີການຕ່າງໆແຫ່ງພຣະກິດຕິຄຸນ, ແລະ ສິ່ງທີ່ເກີດຂຶ້ນຫລັງຈາກຊີວິດນີ້ນຳອີກ.
ໄຂ່ມຸກອັນລ້ຳຄ່າ
ໄຂ່ມຸກອັນລ້ຳຄ່າ ລວມທັງໜັງສືຂອງໂມເຊ ແລະ ຂອງອັບຣາຮາມ, ປະຈັກພະຍານຂອງໂຈເຊັບ ສະມິດ, ແລະ ຫລັກແຫ່ງຄວາມເຊື່ອຂອງສາດສະໜາຈັກ. ມັນຍັງລວມທັງໂຈເຊັບ ສະມິດ—ມັດທາຍ, ຊຶ່ງເປັນສ່ວນໜຶ່ງຂອງການແປພຣະຄຳພີໃໝ່ຂອງໂຈເຊັບ ສະມິດ ນຳອີກ.
ການສຶກສາພຣະຄຳພີ
ບັນດາສາດສະດາໄດ້ສິດສອນເຮົາໃຫ້ສຶກສາພຣະຄຳພີທຸກວັນ. ການເຮັດເຊັ່ນນັ້ນຊ່ວຍໃຫ້ເຮົາມີສັດທາເພີ່ມຂຶ້ນ ແລະ ເຂົ້າໃກ້ພຣະບິດາເທິງສະຫວັນ ແລະ ພຣະເຢຊູຄຣິດຫລາຍຂຶ້ນ. ເມື່ອເຮົາສຶກສາພຣະຄຳພີດ້ວຍການອະທິຖານ, ພຣະວິນຍານບໍລິສຸດຈະຊ່ວຍໃຫ້ເຮົາພົບຄຳຕອບສຳລັບຄຳຖາມຂອງເຮົາ.
ສາດສະດາໃນຍຸກປະຈຸບັນ
ເມື່ອບັນດາສາດສະດາ ແລະ ອັກຄະສາວົກໃນປະຈຸບັນກ່າວດ້ວຍອຳນາດຂອງພຣະວິນຍານບໍລິສຸດ, ຖ້ອຍຄຳຂອງພວກເພິ່ນກໍເປັນດັ່ງພຣະຄຳພີ. ຕົວຢ່າງໜຶ່ງເຖິງສິ່ງນີ້ແມ່ນກອງປະຊຸມໃຫຍ່ສາມັນ. ເຮົາສາມາດສຶກສາຄຳສອນຕ່າງໆຈາກກອງປະຊຸມໃຫຍ່ໄດ້ໃນ Liahona ສະບັບເດືອນພຶດສະພາ ແລະ ເດືອນພະຈິກ.
Moses Overcomes Satan [ໂມເຊເອົາຊະນະຊາຕານ], ໂດຍ ໂຈເຊັບ ບຣິກກີ
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, July 2022. Laotian. 18298 331