?Wanem Ia Haos Naet? Liahona, Ogis 2022.
Liahona Mesej blong Evri Manis Ogis 2022
?Wanem Ia Haos Naet?
Haos naet hem i wan taem we oli putumaot seperet long wik blong famli blong yu i kam tugeta. Long taem ia, yu save “lanem gospel, blong mekem ol testemoni oli kam strong moa, blong oli bildim yuniti, mo stap glad long wanwan long olgeta.” (Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 2.2.4, ChurchofJesusChrist.org). Samtaem, haos naet hem i defren long wanwan famli. Be gol, hem i blong yusum taem ia blong kam kolosap tugeta mo kolosap long Sevya.
Fasin blong Stap Rere
Tingbaot wan aktiviti we famli blong yu i laekem tumas mo wan gospel topik we bae yu laekem blong tokbaot mo lanem abaot tugeta. Mo tu, jusum wan dei mo taem long wanwan wik taem kolosap o evri memba famli i save mit. Jos i leftemap tingting blong ol memba blong holem haos naet long ol Mandei naet. Be ol famli i save mit taem i wokaot stret blong olgeta
Prea
Plante famli i statem mo endem haos naet wetem prea. Hemia i invaetem Tabu Spirit i kam insaed long hom blong olgeta. Haos naet hem i stret taem blong ol pikinini mo ol bigman blong lanem prea wetem wan smol grup.
Miusik
Fulap famli tu oli openem mo klosem wetem wan singsing. Oli stap jusum wan singsing aot long hymbuk o buk blong singsing blong Praemeri. Jos i gat rekoding blong ol hym long music.ChurchofJesusChrist.org Yu save wajem ol vidio blong Tabenakol Kwaea long Tempol Skwea. Singsing long taem blong haos naet i helpem ol memba blong lanem ol hym we oli singsing long jos.
Lesen
Jos i gat fulap risos we i save help wetem haos naet. Yu maet wantem tekem sam minit blong rid mo toktok raon longwan atikol long Liahona, Fren, o Blong Ol Yut Oli Kam Strong.. Hemia tu i save kam wan taem blong wajem mo toktok raon long ol vidio blong Jos. O yu save ridim wan toktok blong jeneral konfrens, ridim ol skripja, o toktok raon long ol riding blong wik ia long Kam, Folem Mi.
Wan pikja blong ol pikinini oli stap mekem ol biskit we i kam long Michelle Loynes
Wanem Famli I Mekem
Ol pikinini oli save tekpat long haos naet. Oli save help blo planem ol aktiviti, prea, o jusum mo lidim ol singsing. Oli save tijim ol lesen tu. Bifo haos naet, yu save helpem pikinini blong yu blong ridim wan stori long Fren magasin o fevret stori blong olgeta long skripja. Pikinini ia i save talemaot stori ia long famli olsem wan lesen. Fulap pikinini oli laekem blong aktem aot ol stori long skripja long haos naet. Letem ol bigfala pikinini oli planem lesen o jusum wan toktok blong jeneral konfrens we oli laekem blong ridim. Mo afta lego olgeta oli toktok raon long hem.
Ol Aktiviti
Fulap famli oli laekem mekem ol aktiviti olsem pat blong haos naet. Ol aktiviti insaed i save gat ol gem blong pleplei, mekem ol pepa o stap kuk tugeta.
Blong ol aktiviti aotsaed yu go save wokabaot, go long wan famli haek, o plei wan spot aotsaed tugeta. Faenem wan aktiviti we evri memba blong famli oli save mekem, mo gat fan tugeta. Traem blong no mekem kompetisen taem we i save ronemaot Spirit.
Seves
Haos naet i wan gudfala taem blong ol famli oli givim seves long ol narawan. Eksampol yu save helpem sam long ol olfala neba, sevem kaekae long wan hom les selta, raet i go long ol misinari, o pikimap toti.
© 2022 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Monthly Liahona Message, August 2022. Bislama. 18316 852