“What Is Home Evening?” Liahona, Aug. 2022.
ຂ່າວສານປະຈຳເດືອນ Liahona, ເດືອນສິງຫາ 2022
ການສັງສັນໃນຕອນແລງແມ່ນຫຍັງ?
ການສັງສັນໃນຕອນແລງເປັນເວລາທີ່ຖືກຈັດໄວ້ໃນລະຫວ່າງອາທິດເພື່ອໃຫ້ຄອບຄົວຂອງທ່ານໄດ້ມາໂຮມກັນ. ໃນຊ່ວງເວລານີ້, ທ່ານສາມາດ “ຮຽນຮູ້ພຣະກິດຕິຄຸນ, ເສີມສ້າງປະຈັກພະຍານ, ສ້າງຄວາມສາມັກຄີ, ແລະ ຊື່ນຊົມນຳກັນແລະກັນ” (General Handbook: Serving in The Church of Jesus Christ of Latter-day Saints, 2.2.4, ChurchofJesusChrist.org). ການສັງສັນໃນຕອນແລງເບິ່ງແຕກຕ່າງກັນໄປໃນແຕ່ລະຄອບຄົວ. ແຕ່ວ່າເປົ້າໝາຍຄື ເພື່ອໃຊ້ເວລານີ້ໃຫ້ໄດ້ໃກ້ຊິດກັນຫລາຍຂຶ້ນ ແລະ ໃກ້ຊິດພຣະຜູ້ຊ່ວຍໃຫ້ລອດຫລາຍຂຶ້ນ.
ການກະກຽມ
ຄິດກ່ຽວກັບກິດຈະກຳທີ່ຄອບຄົວຂອງທ່ານມັກ ແລະ ຫົວຂໍ້ພຣະກິດຕິຄຸນທີ່ທ່ານຕ້ອງການສົນທະນາ ແລະ ຮຽນຮູ້ດ້ວຍກັນ. ພ້ອມກັນນັ້ນ, ເລືອກວັນ ແລະ ເວລາໃນແຕ່ລະອາທິດທີ່ສະມາຊິກໃນຄອບຄົວສ່ວນໃຫຍ່ ຫລື ທຸກຄົນສາມາດພົບປະກັນໄດ້. ສາດສະໜາຈັກສະໜັບສະໜູນໃຫ້ສະມາຊິກຈັດການສັງສັນໃນຕອນແລງ ໃນແລງວັນຈັນ. ແຕ່ຄອບຄົວສາມາດພົບປະກັນໃນເວລາທີ່ສະດວກທີ່ສຸດສຳລັບເຂົາເຈົ້າ.
ການອະທິຖານ
ຫລາຍຄອບຄົວໄດ້ເລີ່ມຕົ້ນ ແລະ ປິດການສັງສັນໃນຕອນແລງດ້ວຍການອະທິຖານ. ສິ່ງນີ້ຊ່ວຍເຊື້ອເຊີນພຣະວິນຍານບໍລິສຸດໃຫ້ມາສະຖິດຢູ່ໃນບ້ານຂອງເຂົາເຈົ້າ. ການສັງສັນໃນຕອນແລງເປັນເວລາທີ່ເໝາະສົມທີ່ສຸດສຳລັບເດັກນ້ອຍ ແລະ ຜູ້ໃຫຍ່ໃນການຮຽນຮູ້ກ່ຽວກັບການອະທິຖານໃນກຸ່ມນ້ອຍ.
ເພງ
ຫລາຍຄອບຄົວກໍຍັງມີການຮ້ອງເພງເປີດ ແລະ ປິດເຊັ່ນກັນ. ເຂົາເຈົ້າມັກຈະເລືອກເພງຈາກປຶ້ມເພງສວດ ຫລື ປຶ້ມເພງປະຖົມໄວ. ສາດສະໜາຈັກມີບັນທຶກແຟມສຽງປີອາໂນຂອງເພງສວດທີ່ music.ChurchofJesusChrist.org. ທ່ານຍັງສາມາດເບິ່ງວິດີໂອຂອງກຸ່ມນັກຮ້ອງແທັບເບິແນັກໂກທີ່ບໍລິເວນພຣະວິຫານໄດ້ເຊັ່ນກັນ. ການຮ້ອງເພງໃນລະຫວ່າງການສັງສັນໃນຕອນແລງຊ່ວຍໃຫ້ສະມາຊິກໄດ້ຮຽນຮູ້ເພງສວດທີ່ໄດ້ຮ້ອງຢູ່ທີ່ໂບດ.
ບົດຮຽນ
ສາດສະໜາຈັກມີແຫລ່ງຊ່ວຍຫລາຍຢ່າງທີ່ສາມາດຊ່ວຍກ່ຽວກັບການສັງສັນໃນຕອນແລງ. ທ່ານອາດໃຊ້ເວລາສອງສາມນາທີໃນການອ່ານ ແລະ ສົນທະນາກ່ຽວກັບບົດຄວາມໃດໜຶ່ງຈາກ Liahona, Friend, ຫລື For the Strength of Youth. ນີ້ຍັງສາມາດເປັນເວລາເບິ່ງ ແລະ ສົນທະນາກ່ຽວກັບວິດີໂອຕ່າງໆຂອງສາດສະໜາຈັກເຊັ່ນກັນ. ຫລື ທ່ານສາມາດອ່ານຄຳປາໄສໃດໜຶ່ງຈາກກອງປະຊຸມໃຫຍ່ສາມັນ, ອ່ານພຣະຄຳພີ, ຫລື ສົນທະນາການອ່ານໃນອາທິດນັ້ນໃນ ຈົ່ງຕາມເຮົາມາ.
ຮູບຖ່າຍຂອງເດັກນ້ອຍກຳລັງເຮັດເຂົ້າໜົມ ໂດຍ ມິແຊວ ລອຍສ໌
ການມີສ່ວນຮ່ວມໃນຄອບຄົວ
ເດັກນ້ອຍສາມາດມີສ່ວນຮ່ວມໃນການສັງສັນໃນຕອນແລງ. ພວກເຂົາສາມາດຊ່ວຍໃນການວາງແຜນກິດຈະກຳຕ່າງໆ, ອະທິຖານ, ຫລື ເລືອກ ແລະ ນຳເພງຕ່າງໆ. ພວກເຂົາຍັງສາມາດສິດສອນບົດຮຽນ. ກ່ອນການສັງສັນໃນຕອນແລງ, ທ່ານສາມາດຊ່ວຍລູກຄົນໃດຄົນໜຶ່ງຂອງທ່ານອ່ານເລື່ອງໃນວາລະສານ Friend ຫລື ເລື່ອງທີ່ເຂົາມັກໃນພຣະຄຳພີ. ແລ້ວລູກຄົນນັ້ນສາມາດເລົ່າເລື່ອງນັ້ນໃຫ້ຄອບຄົວຟັງ ເພື່ອເປັນບົດຮຽນກໍໄດ້. ເດັກນ້ອຍຫລາຍຄົນມັກສະແດງເລື່ອງລາວຕ່າງໆໃນພຣະຄຳພີສຳລັບການສັງສັນໃນຕອນແລງເຊັ່ນກັນ. ໃຫ້ລູກຜູ້ໃຫຍ່ວາງແຜນບົດຮຽນ ຫລື ເລືອກເອົາຄຳປາໄສໃດໜຶ່ງຂອງກອງປະຊຸມໃຫຍ່ສາມັນທີ່ພວກເຂົາຢາກອ່ານ. ແລ້ວໃຫ້ພວກເຂົາເປັນຜູ້ນຳພາການສົນທະນາ.
ກິດຈະກຳ
ຫລາຍຄອບຄົວມີຄວາມສຸກກັບການເຮັດກິດຈະກຳເພື່ອເປັນສ່ວນໜຶ່ງຂອງການສັງສັນໃນຕອນແລງ. ກິດຈະກຳໃນບ້ານສາມາດລວມທັງການຫລິ້ນເກມຕ່າງໆ, ການເຮັດຫັດຖະກຳ, ຫລື ການແຕ່ງກິນດ້ວຍກັນ.
ສຳລັບກິດຈະກຳນອກບ້ານ ພວກທ່ານສາມາດອອກໄປຍ່າງຫລິ້ນ, ໄປເດີນປ່າກັບຄອບຄົວ, ຫລື ຫລິ້ນກິລາຢູ່ນອກນຳກັນ. ຊອກຫາກິດຈະກຳໃດໜຶ່ງທີ່ທຸກຄົນໃນຄອບຄົວສະມາດເຮັດໄດ້, ແລະ ມ່ວນຊື່ນນຳກັນ. ຫລີກລ້ຽງການແຂ່ງຂັນກັນທີ່ອາດຈະຂັບໄລ່ພຣະວິນຍານອອກໄປ.
ການຮັບໃຊ້
ການສັງສັນໃນຕອນແລງເປັນເວລາທີ່ດີທີ່ສຸດສຳລັບຄອບຄົວທີ່ຈະຮັບໃຊ້ຄົນອື່ນ. ພວກທ່ານສາມາດຊ່ວຍເຫລືອເພື່ອນບ້ານສູງອາຍຸ, ເສີບອາຫານໃນສະຖານທີ່ສຳລັບຄົນບໍ່ມີບ້ານ, ຂຽນຈົດໝາຍຫາຜູ້ສອນສາດສະໜາ, ຫລື ເກັບຂີ້ເຫຍື້ອ, ເປັນຕົ້ນ.
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, August 2022. Laotian. 18316 331