“Led by Living Prophets,” Liahona, Sept. 2022.
ຂ່າວສານປະຈຳເດືອນ Liahona, ເດືອນກັນຍາ 2022
ຖືກນຳພາໂດຍສາດສະດາທີ່ມີຊີວິດຢູ່
ສາດສະດາຄືຜູ້ທີ່ໄດ້ຮັບການເອີ້ນຈາກພຣະບິດາເທິງສະຫວັນເພື່ອໃຫ້ກ່າວແທນພຣະອົງ. ພວກເພິ່ນ ເປັນພະຍານ ເຖິງພຣະເຢຊູຄຣິດ ແລະ ສິດສອນພຣະກິດຕິຄຸນຂອງພຣະອົງ. ສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເຊື່ອໃນສາດສະດາ ທັງໃນສະໄໝບູຮານ ແລະ ສະໄໝໃໝ່.
ພຣະເຈົ້າກ່າວຜ່ານທາງສາດສະດາ
ສາດສະດາຮັບການເປີດເຜີຍຈາກພຣະເຈົ້າ. ເມື່ອສາດສະດາໄດ້ຮັບການດົນໃຈໃຫ້ສິດສອນເຮົາ, ກໍຄືກັນກັບວ່າພຣະເຈົ້າກຳລັງກ່າວກັບເຮົາ (ເບິ່ງ ຄຳສອນ ແລະ ພັນທະສັນຍາ 1:38). ເຮົາສາມາດໄວ້ວາງໃຈໄດ້ວ່າ ພວກເພິ່ນບອກເຮົາເຖິງສິ່ງທີ່ພຣະເຈົ້າຢາກໃຫ້ເຮົາຮູ້.
Mormon Abridging the Plates [ມໍມອນກຳລັງຫຍໍ້ແຜ່ນຈາລຶກຄຳ], ໂດຍ ທອມ ໂລແວວ
ສາດສະດາສິດສອນເຖິງພຣະເຢຊູຄຣິດ
ສາດສະດາທັງໝົດ ເປັນພະຍານ ເຖິງພຣະເຢຊູຄຣິດ. ພວກເພິ່ນສິດສອນເຮົາວ່າ ພຣະອົງເປັນພຣະບຸດຂອງພຣະເຈົ້າ. ພວກເພິ່ນສິດສອນເຮົາກ່ຽວກັບພຣະຊົນຊີບ, ຕົວຢ່າງ, ແລະ ການຊົດໃຊ້ຂອງພຣະອົງ. ແລະ ພວກເພິ່ນສະແດງໃຫ້ເຮົາເຫັນເຖິງວິທີທີ່ຈະຕິດຕາມພຣະອົງ ແລະ ເຊື່ອຟັງພຣະບັນຍັດຂອງພຣະອົງ.
ໜ້າທີ່ຮັບຜິດຊອບຂອງສາດສະດາ
ສາດສະດາສິດສອນພຣະກິດຕິຄຸນຂອງພຣະເຢຊູຄຣິດ. ພວກເພິ່ນອະທິບາຍເຖິງພອນທີ່ເຮົາໄດ້ຮັບເມື່ອເຮົາເຊື່ອຟັງພຣະບັນຍັດ ແລະ ຜົນສະທ້ອນທີ່ເຮົາໄດ້ຮັບຖ້າເຮົາບໍ່ເຊື່ອຟັງ. ບາງຄັ້ງ, ພວກເພິ່ນກໍອາດໄດ້ຮັບການດົນໃຈໃຫ້ບອກເຮົາກ່ຽວກັບເຫດການຕ່າງໆໃນອະນາຄົດ.
Moses and the Tablets [ໂມເຊ ແລະ ແຜ່ນພຣະບັນຍັດ], ໂດຍ ແຈຣີ ຮາສະຕັນ
ສາດສະດາສະໄໝບູຮານ
ພຣະເຈົ້າໄດ້ສິດສອນຜູ້ຄົນຜ່ານທາງສາດສະດານັບຕັ້ງແຕ່ການເລີ່ມຕົ້ນ. ສາດສະດາຜູ້ທີ່ມີຊີວິດຢູ່ໃນສະໄໝພຣະຄຳພີເດີມແມ່ນລວມທັງ ອາດາມ, ໂນອາ, ອັບຣາຮາມ, ໂມເຊ, ເອຊາຢາ, ແລະ ທ່ານອື່ນໆ. ຍັງມີສາດສະດາໃນບັນດາຜູ້ຄົນຂອງພຣະຄຳພີມໍມອນອີກດ້ວຍ. ສາດສະດາເຫລົ່ານີ້ແມ່ນລວມທັງ ລີໄຮ, ໂມໄຊຢາ, ແອວມາ, ແລະ ໂມໂຣໄນ. ເຮົາສາມາດຮຽນຮູ້ເຖິງສິ່ງທີ່ພວກເພິ່ນສິດສອນໄດ້ ໂດຍການອ່ານພຣະຄຳພີ.
ສາດສະດາສະໄໝໃໝ່
ໂຈເຊັບ ສະມິດ ຄືສາດສະດາຄົນທຳອິດໃນຍຸກສະໄໝໃໝ່. ເພິ່ນໄດ້ຟື້ນຟູສາດສະໜາຈັກຂອງພຣະເຢຊູຄຣິດຄືນມາສູ່ໂລກ. ຣະໂຊ ເອັມ ແນວສັນ ເປັນສາດສະດາ ແລະ ປະທານຂອງສາດສະໜາຈັກໃນທຸກວັນນີ້. ທີ່ປຶກສາຂອງເພິ່ນໃນຝ່າຍປະທານສູງສຸດ ແລະ ອັກຄະສາວົກສິບສອງກໍເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍ ເຊັ່ນກັນ.
ການຟັງສາດສະດາ
ສາດສະດາກ່າວກັບເຮົາໃນລະຫວ່າງກອງປະຊຸມໃຫຍ່ສາມັນ ແລະ ເວລາອື່ນໆ. ເພິ່ນສິດສອນເຮົາເຖິງສິ່ງທີ່ພຣະເຈົ້າຢາກໃຫ້ເຮົາຮູ້ ແລະ ວິທີທີ່ຈະຕິດຕາມພຣະເຢຊູຄຣິດໃນທຸກວັນນີ້. ເຮົາສາມາດຊອກຫາການສິດສອນຂອງເພິ່ນໄດ້ໃນ Liahona ແລະ ທີ່ ChurchofJesusChrist.org.
ພອນຂອງການເຮັດຕາມສາດສະດາ
ເຮົາຈະໄດ້ຮັບພອນຖ້າເຮົາເຮັດຕາມຄຳສອນຂອງສາດສະດາ. ເມື່ອເຮົາເຮັດຕາມສາດສະດາ, ເຮົາສາມາດຮູ້ໄດ້ວ່າ ເຮົາກຳລັງເຮັດໃນສິ່ງທີ່ພຣະເຈົ້າຢາກໃຫ້ເຮົາເຮັດ. ເຮົາສາມາດຮູ້ສຶກເຖິງສັນຕິສຸກໃນຊີວິດຂອງເຮົາ ແລະ ເຂົ້າໃກ້ພຣະເຢຊູຄຣິດຫລາຍຂຶ້ນ.
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, September 2022. Laotian. 18299 331