“నిత్య నిబంధన,” లియహోనా2022 అక్టోబరు
లియహోనా నెలవారీ సందేశము, 2022 అక్టోబరు
నిత్య నిబంధన
దేవునితో నిబంధన చేసుకున్న వారందరికీ ప్రత్యేకమైన ప్రేమ మరియు కరుణ లభిస్తాయి.
ప్రభువైన యేసు క్రీస్తు, డెల్ పార్సన్ చేత
యుద్ధాలు మరియు యుద్ధాల పుకార్లతో నలిగిపోతున్న ఈ ప్రపంచంలో సత్యం, వెలుగు మరియు యేసుక్రీస్తు యొక్క స్వచ్ఛమైన ప్రేమ అవసరత గతంలో కంటే ఎక్కువగా ఉంది. క్రీస్తు యొక్క సువార్త మహిమాన్వితమైనది, దానిని అధ్యయనం చేయడం మరియు ఆజ్ఞల ప్రకారం జీవించడం మనకు ఆశీర్వాదకరము. మనం ఎక్కడ ఉన్నా, దాని సత్యాలను గురించి సాక్ష్యమివ్వడానికి—దానిని పంచుకోవడానికి మనకున్న అవకాశాలను బట్టి మనము మిక్కిలి సంతోషిస్తాము.
అబ్రాహాము యొక్క నిబంధన, మరియు ఇశ్రాయేలీయులను సమకూర్చడం యొక్క ప్రాముఖ్యత గురించి నేను తరచుగా మాట్లాడుతున్నాను. మనం సువార్తను స్వీకరించి, బాప్తిస్మము తీసుకున్నప్పుడు, మనం యేసు క్రీస్తు యొక్క పవిత్ర నామాన్ని మనపై తీసుకుంటాము. బాప్తిస్మము అనేది అబ్రాహాము, ఇస్సాకు, యాకోబు మరియు వారి సంతానం కోసం పూర్వకాలము నుండి పురాతనంగా ప్రభువు ఇచ్చిన వాగ్దానాలన్నింటికీ ఉమ్మడి వారసులు కావడానికి దారితీసే మార్గము. 1
“నూతన మరియు శాశ్వతమైన నిబంధన” 2 (సిద్ధాంతము మరియు నిబంధనలు 132:6) మరియు అబ్రాహాము యొక్క నిబంధన తప్పనిసరిగా ఒకే విధంగా ఉంటుంది—దేవుడు వేర్వేరు సమయాల్లో మర్త్య పురుషులు మరియు స్త్రీలతో చేసిన నిబంధనలను రెండు రకాలుగా చెప్పవచ్చు.
నిత్యం అనే విశేషణం ప్రపంచ పునాదికి ముందే ఈ నిబంధన ఉనికిలో ఉందని సూచిస్తుంది! పరలోకంలోని మహాసభలో రూపొందించబడిన ప్రణాళికలో మనమందరం దేవుని సన్నిధి నుండి కొట్టివేయబడతామనే గంభీరమైన అవగాహనను కలిగి ఉంది. అయితే, పతనం యొక్క పరిణామాలను అధిగమించే రక్షకుడిని మనకు అందిస్తానని దేవుడు వాగ్దానం చేసాడు. బాప్తిస్మము తర్వాత దేవుడు ఆదాము‌తో ఇలా చెప్పాడు:
“దినములకు ఆరంభమైనను, సంవత్సరాలకు అంతమైనను లేదా నిత్యత్వము నుండి నిత్యత్వము వరకు ఉన్నవాని క్రమము చొప్పున నీవున్నావు.
“ఇదిగో నా వలె నీవును దేవుని కుమారుడవైయున్నావు, కాబట్టి అందరు నా కుమారులైయుందురు.” (మోషే 6:67–68)
ఆదాము మరియు హవ్వ బాప్తిస్మము యొక్క విధిని అంగీకరించారు మరియు దేవునితో ఒకటిగా ఉండే ప్రక్రియను ప్రారంభించారు. వారు నిబంధన మార్గము లోనికి ప్రవేశించారు.
నేను మరియు మీరు కూడా ఆ నిబంధన మార్గము లోనికి ప్రవేశించినప్పుడు, మనకు క్రొత్త జీవన విధానం ఉంటుంది. తద్వారా మనము దేవునితో సంబంధాన్ని ఏర్పరచుకుంటాము, అది ఆయన మనలను ఆశీర్వదించడానికి మరియు మార్చడానికి అనుమతిస్తుంది. నిబంధన మార్గము మనలను తిరిగి ఆయన వద్దకు నడిపిస్తుంది. మన జీవితాలలో దేవునికి ప్రాధాన్యత ఉంచినట్లయితే, ఆ నిబంధన మనలను ఆయనకు చాలా దగ్గరగా నడిపిస్తుంది. అన్ని నిబంధనలు కట్టుబడి ఉండేందుకు ఉద్దేశించబడ్డాయి. అవి శాశ్వతమైన సబంధాలతో బంధాన్ని ఏర్పరుస్తారు.
ఒక ప్రత్యేకమైన ప్రేమ మరియు కరుణ
ఒక్కసారి దేవునితో నిబంధన చేసుకున్న తర్వాత, మనము తటస్థంగా ఉన్న నేలను శాశ్వతంగా వదిలివేస్తాము. తనతో అలాంటి బంధాన్ని ఏర్పరచుకున్న వారితో దేవుడు తన సంబంధాన్ని విడిచిపెట్టడు. నిజానికి, దేవునితో నిబంధన చేసుకున్న వారందరికీ ప్రత్యేకమైన ప్రేమ మరియు కరుణ లభిస్తాయి. హెబ్రీ భాషలో, ఆ నిబంధన ప్రేమను హెసెడ్ అంటారు (חֶסֶד).3
హెసెడ్ పదమునకు తగిన ఆంగ్ల సమానత లేదు. కింగ్ జేమ్స్ వెర్షన్ బైబిలు యొక్క అనువాదకులు కూడా ఆంగ్లంలో హెసెడ్ పదమును ఎలా అందించాలనే విషయంలో చాలా కష్టపడి ఉండాలి. వారు తరచుగా “ప్రేమపూర్వకమైనకరుణను” ఎంచుకున్నారు. ఇది చాలా వరకు సంగ్రహిస్తుంది కానీ హెసెడ్ కు సంపూర్ణ అర్థం మాత్రము కాదు. “కరుణ” మరియు “మంచితనం” వంటి ఇతర అనువాదాలు కూడా అన్వయించబడ్డాయి. హెసెడ్ అనేది నిబంధన సంబంధాన్ని వివరించే ఒక ప్రత్యేకమైన పదం, ఇందులో ఇరువురు ఒకరికొకరు విధేయులుగా మరియు విశ్వాసపాత్రంగా ఉండాలి.
సిలెస్టియల్ వివాహం కూడా అటువంటి నిబంధనా పరమైన సంబంధం. భార్యాభర్తలు ఒకరికొకరు విధేయులుగా మరియు విశ్వాసపాత్రంగా ఉండేందుకు దేవునితో మరియు ఒకరితో ఒకరు నిబంధన చేసుకుంటారు.
హెసెడ్ అనేది ఒక ప్రత్యేక రకమైన ప్రేమ మరియు కరుణ, ఇది దేవుడు తనలో మరియు తనతో నిబంధన చేసుకున్న వారిపట్ల కలిగే అనుభూతి. మరియు మనము అతని కోసం హెసెడ్ తో పరస్పరము ప్రవర్తిస్తాము.
మీరు మరియు నేను దేవునితో నిబంధన చేసుకున్న తర్వాత, మన నిబంధన కంటే ఆయనతో మన సంబంధం చాలా దగ్గరగా ఉంటుంది. ఇప్పుడు మనము కలిసి బంధించబడ్డాము.
జెర్రీ ఎల్. గార్న్స్ చే ఛాయాచిత్రం
దేవునికి తనతో నిబంధన చేసుకున్న వారి పట్ల హెసెడ్ వున్నది కాబట్టి, ఆయన వారిని ప్రేమిస్తాడు. ఆయన వారితో కలిసి పని చేస్తూనే ఉంటాడు, మరియు వారికి మారడానికి అవకాశాలను అందిస్తాడు. వారు పశ్చాత్తాపపడినప్పుడు ఆయన వారిని క్షమిస్తాడు. మరియు వారు దారితప్పినట్లయితే, తిరిగి తమ మార్గాన్ని కనుగొనడంలో వారికి ఆయన సహాయం చేస్తాడు.
మీరు మరియు నేను దేవునితో నిబంధన చేసుకున్న తర్వాత, మన నిబంధన కంటే ఆయనతో మన సంబంధం చాలా దగ్గరగా ఉంటుంది. ఇప్పుడు మనము కలిసి బంధించబడ్డాము. దేవునితో మన నిబంధన కారణంగా, మనకు సహాయం చేయడానికి ఆయన చేసే ప్రయత్నాలలో ఆయన ఎప్పటికీ అలసిపోడు, మరియు మనపై ఆయన కరుణతో కూడిన సహనాన్ని మనం ఎప్పటికీ కోల్పోము. మనలో ప్రతి ఒక్కరికి దేవుని హృదయంలో ప్రత్యేక స్థానం ఉంది. ఆయనకు మనపై చాలా ఆశలు వున్నాయి.
ప్రవక్త జోసెఫ్ స్మిత్‌కు ప్రభువు ఇచ్చిన చారిత్రాత్మక ప్రకటన గురించి మీకు తెలుసు. ఇది బయల్పాటు ద్వారా వచ్చింది. ప్రభువు యోసేపుతో ఇలా అన్నాడు. “ఈ వాగ్దానము మీకు కూడా చెందును, ఎందుకనగా మీరు అబ్రాహాము సంతానము, అబ్రాహామునకు ఈ వాగ్దానము చేయబడెను” (సిద్ధాంతము మరియు నిబంధనలు 132:31).
తద్వారా, ఈ నిత్య నిబంధన దాని సంపూర్ణతతో సువార్త యొక్క గొప్ప పునఃస్థాపనలో భాగంగా పునఃస్థాపించబడింది. దాని గురించి ఆలోచించండి! దేవాలయములో చేసిన వివాహ నిబంధన, నేరుగా అబ్రాహాము యొక్క నిబంధనతో ముడిపడియున్నది. దేవాలయములో అబ్రాహాము, ఇస్సాకు మరియు యాకోబుల నమ్మకమైన వారసుల కోసం దాచిపెట్టబడిన అన్ని ఆశీర్వాదాలకు ఒక జంట పరిచయం చేయబడింది.
ఆదాము చేసినట్లుగా, మీరు మరియు నేను వ్యక్తిగతంగా బాప్తిస్మము సమయంలో నిబంధన మార్గంలోకి ప్రవేశించాము. అప్పుడు మనం పూర్తిగా దేవాలయములోకి ప్రవేశిస్తాము. అబ్రాహాము నిబంధన యొక్క ఆశీర్వాదాలు పవిత్ర దేవాలయాలలో అనుగ్రహించబడతాయి. ఈ ఆశీర్వాదాలు, పునరుత్థానం చేయబడిన తర్వాత, “సింహాసనములను, రాజ్యములను, ప్రధానులను, అధికారములను, ఏలుబాటులను, అన్ని విషయములందు తమ ఉన్నతస్థితిని, మరియు మహిమను పొందుట కొరకు [సిద్ధాంతము మరియు నిబంధనలు 132:19].” 4
పాత నిబంధన ముగింపు వచనంలో, ఏలీయా “ తండ్రుల హృదయములను పిల్లలతట్టును పిల్లల హృదయములను తండ్రులతట్టును త్రిప్పును” అని మలాకీ వాగ్దానం గురించి మనం చదువుతాము(మలాకీ 4:6). ప్రాచీన ఇశ్రాయేలులో, తండ్రుల గురించిన అలాంటి సూచనలో పితరులైన అబ్రాహాము, ఇస్సాకు, మరియు యాకోబు ఉన్నారు. ప్రవక్త జోసెఫ్ స్మిత్‌కు మొరోనై ఉదహరించిన ఈ వాక్యము యొక్క విభిన్న సంస్కరణను మనం చదివినప్పుడు ఈ వాగ్దానం స్పష్టమవుతుంది: “అతడు[ఏలీయా]తండ్రులకు చేయబడిన వాగ్దానములను పిల్లల హృదయాలలో నాటును, అప్పుడు పిల్లల హృదయాలు తండ్రుల తట్టు తిరుగును” (జోసెఫ్ స్మిత్-చరిత్ర 1:39). ఆ తండ్రులలో ఖచ్చితంగా అబ్రాహాము, ఇస్సాకు మరియు యాకోబులు ఉన్నారు. (సిద్ధాంతము మరియు నిబంధనలు 27:9-10 చూడండి.)
పవిత్రమైన నిబంధనలను చేసి, వాటిని పాటించే వారికి నిత్యజీవం మరియు ఉన్నతస్థితి వాగ్దానం చేయబడింది. ఆ నిబంధనలకు యేసు క్రీస్తు హామీదారు.
హెన్రిచ్ హాఫ్మాన్ వ్రాసిన క్రైస్ట్ అండ్ ది రిచ్ యంగ్ రూలర్ [క్రీస్తు మరియు ధనవంతుడైన యౌవన అధికారి] నుండి వివరణ.
యేసు క్రీస్తు: నిబంధనలకు కేంద్రం
రక్షకుని ప్రాయశ్చిత్త త్యాగం, తండ్రి తన పిల్లలకు చేసిన వాగ్దానాలను నెరవేర్చేలా చేసింది. యేసు క్రీస్తు “మార్గము, సత్యము మరియు జీవము” అయినందున, “[ఆయన] ద్వారా తప్ప మనుష్యుడు తండ్రియొద్దకు రాడు” అని అది అనుసరిస్తుంది” (యోహాను 14:6). మన రక్షకుడు, ప్రభువైన యేసు క్రీస్తు యొక్క ప్రాయశ్చిత్తం కారణంగా అబ్రాహాము నిబంధన నెరవేర్పు సాధ్యమవుతుంది. యేసు క్రీస్తు, అబ్రాహాము నిబంధన యొక్క కేంద్రం
పాత నిబంధన లేఖనముల గ్రంథం మాత్రమే కాదు; అది ఒక చరిత్ర గ్రంథం కూడా. శారయి మరియు అబ్రాముల వివాహం గురించి మీరు చదివినట్లు గుర్తుతెచ్చుకోండి. వారికి సంతానం లేని కారణంగా, ప్రభువు నిర్దేశానికి అనుగుణంగా శారయి తన దాసి అయిన హాగరును కూడా అబ్రాముకు భార్యగా ఇచ్చింది. హాగరు ఇష్మాయేలుకు జన్మనిచ్చింది 5 అబ్రాము ఇష్మాయేలును ప్రేమించాడు, కానీ అతడు నిబంధనను ఆమోదించే బిడ్డ కాదు. (ఆదికాండము 11:29-30; 16:1, 3:11; సిద్ధాంతము మరియు నిబంధనలు 132:34 చూడండి.)
దేవుని నుండి వచ్చిన ఆశీర్వాదంగా, మరియు శారయి విశ్వాసానికి ప్రతిస్పందనగా,6 ఆమె తన వృద్ధాప్యంలో గర్భం దాల్చింది, తద్వారా ఆమె కుమారుడైన ఇస్సాకు ద్వారా నిబంధన వెళ్ళింది. ఆదికాండము 17:19 చూడండి). ఆయన నిబంధనలో జన్మించాడు.
దేవుడు శారయి మరియు అబ్రాములకు కొత్త పేర్లు పెట్టాడు- శారా మరియు అబ్రాహాము (ఆదికాండము 17:5, 15 చూడండి). ఆ కొత్త పేర్ల ప్రదానం ఈ కుటుంబానికి కొత్త జీవితానికి మరియు కొత్త విధికి నాంది పలికింది.
అబ్రాహాము ఇష్మాయేలు మరియు ఇస్సాకు ఇద్దరినీ ప్రేమించాడు. దేవుడు అబ్రాహాముతో, ఇష్మాయేలు విస్తరింపబడతాడని మరియు గొప్ప జనాంగం అవుతాడని చెప్పాడు (ఆదికాండము 17:20 చూడండి). అదే సమయంలో, ఇస్సాకు ద్వారా శాశ్వతమైన నిబంధన స్థాపించబడుతుందని దేవుడు స్పష్టం చేసాడు. (ఆదికాండము 17:19 చూడండి).
సువార్తను అంగీకరించే వారందరూ అబ్రాహాము వంశంలో భాగమవుతారు. గలతీయులకు వ్రాసిన పత్రికలో మనం ఇలా చదువుతాము:
“క్రీస్తులోనికి బాప్తిస్మముపొందిన మీరందరు క్రీస్తును ధరించుకొనియున్నారు.
“… యేసు క్రీస్తునందు మీరందరును ఏకముగా ఉన్నారు.
“మీరు క్రీస్తు సంబంధులైతే ఆ పక్షమందు అబ్రాహాము యొక్క సంతానమైయుండి వాగ్దాన ప్రకారము వారసులైయున్నారు” (గలతీయులకు 3:27-29 చూడండి).
కాబట్టి, మనం పుట్టుక ద్వారా లేదా దత్తత తీసుకోవడం ద్వారా నిబంధనకు వారసులుగా మారవచ్చు.
ఒక్కసారి దేవునితో నిబంధన చేసుకున్న తర్వాత, మనము తటస్థంగా ఉన్న నేలను శాశ్వతంగా వదిలివేస్తాము. తనతో అలాంటి బంధాన్ని ఏర్పరచుకున్న వారితో దేవుడు తన సంబంధాన్ని విడిచిపెట్టడు.
ఇస్సాకు మరియు రిబ్కా కుమారుడు యాకోబు నిబంధనలో జన్మించాడు. అదనంగా, అతడు తన స్వంత ఒప్పందంలో ప్రవేశించడానికి ఎంచుకున్నాడు. మీకు తెలిసినట్లుగా, యాకోబు పేరు ఇశ్రాయేలు గా మార్చబడింది (ఆదికాండము 32:28 చూడండి), అంటే “దేవుడిని జయించనివ్వండి” లేదా “దేవునితో జయించేవాడు.” 7
నిర్గమకాండములో “దేవుడు అబ్రాహాముతో, ఇస్సాకుతో, యాకోబుతో చేసిన నిబంధనను జ్ఞాపకము చేసికొనెను” అని చదువుతాము.(నిర్గమకాండము 2:24). దేవుడు ఇశ్రాయేలీయుల సంతతితో ఇలా చెప్పాడు, “కాగా మీరు నా మాట శ్రద్ధగా విని నా నిబంధన ననుసరించి నడిచినయెడల మీరు సమస్తదేశ జనులలో నాకు స్వకీయ సంపాద్యమగుదురు” (నిర్గమకాండము 19:5).
“స్వకీయ సంపాద్యమ” అనే పదం హెబ్రీ భాష సెగుల్లా నుండి అనువదించబడింది, దీని అర్థం అత్యంత విలువైన స్వాధీనం-ఒక “నిధి”. 8
ద్వితీయోపదేశకాండము నిబంధన యొక్క ప్రాముఖ్యతను వివరిస్తుంది. క్రొత్త నిబంధన యొక్క అపొస్తలులకు ఈ నిబంధన గురించి తెలుసు. పేతురు దేవాలయము మెట్లపై ఉన్న కుంటి వ్యక్తిని స్వస్థపరిచిన తర్వాత, యేసు గురించి చూపరులకు బోధించాడు. పేతురు ఇలా అన్నాడు: “అబ్రాహాము, ఇస్సాకు, యాకోబుల దేవుడు, మన పూర్వీకుల దేవుడు, తన కుమారుడైన యేసును మహిమపరిచాడు” (అపొస్తలుల కార్యములు 3:13).
“ఆ ప్రవక్తలకును, దేవుడు అబ్రాహాముతో–నీ సంతానమందు భూలోక వంశములన్నియు ఆశీర్వదింపబడునని చెప్పి మీపితరులతో చేసిన నిబంధనకును, మీరు వారసులై యున్నారు” అని పేతురు తన ప్రేక్షకులకు చెప్పడం ద్వారా తన సందేశాన్ని ముగించాడు.(అపొస్తలుల కార్యములు 3:25). దేవుని నిబంధనను నెరవేర్చడమే క్రీస్తు నియమితకార్యములో భాగమని పేతురు వారికి స్పష్టం చేసాడు.
ప్రాచీన అమెరికా ప్రజలకు ప్రభువు ఇదే విధమైన ప్రసంగం చేసారు. అక్కడ, పునరుత్థానమైన క్రీస్తు వారు నిజంగా ఎవరో ప్రజలకు చెప్పారు. ఆయన చెప్పెను:
“ఇదిగో, మీరు ప్రవక్తల యొక్క పిల్లలైయున్నారు; మీరు ఇశ్రాయేలు వంశస్థులైయున్నారు; మరియు దేవుడు అబ్రాహాముతో—నీ సంతానమందు భూలోక వంశములన్నియు ఆశీర్వదింపబడునని చెప్పి మీ పితరులతో చేసిన నిబంధనకు మీరు వారసులైయున్నారు.
“తండ్రి మొదట నన్ను మీ కొరకు పుట్టించి, మీలో ప్రతివానిని వాని దుష్టత్వమునుండి మళ్ళించుటవలన మిమ్మునాశీర్వదించుటకు నన్ను మొదట మీయొద్దకు పంపెను; ఇది, మీరు నిబంధన యొక్క సంతానమగుటను బట్టియే” (3 నీఫై 20:25–26).
దీని ప్రాముఖ్యత మీకు కనిపిస్తోందా? దేవునితో తమ నిబంధనలను నిలబెట్టుకునే వారు పాపనిరోధక ఆత్మల జాతి అవుతారు! తమ నిబంధనలను నిలబెట్టుకునే వారికి ప్రపంచం యొక్క స్థిరమైన ప్రభావాన్ని ఎదిరించే శక్తి ఉంటుంది.
దేవునితో తమ నిబంధనలను నిలబెట్టుకునే వారు పాపనిరోధక ఆత్మల జాతి అవుతారు! తమ నిబంధనలను నిలబెట్టుకునే వారికి ప్రపంచం యొక్క స్థిరమైన ప్రభావాన్ని ఎదిరించే శక్తి ఉంటుంది.
సువార్త పరిచర్య: నిబంధనలను పంచుకోవడం
మనం సువార్తను వ్యాప్తి చేసి నిబంధనలను పంచుకోవాలని ప్రభువు ఆజ్ఞాపించాడు. అందుకే మనకు సువార్తికులు ఉన్నారు. రక్షకుని సువార్తను ఎంచుకునే, మరియు నిబంధన మార్గాన్ని ప్రారంభించే అవకాశం తన పిల్లలలో ప్రతి ఒక్కరికీ ఉండాలని ఆయన కోరుకుంటున్నారు. దేవుడు అబ్రాహాముతో ప్రాచీనకాలంలో చేసిననిబంధనకు ప్రజలందరినీ అనుసంధానించాలని కోరుకుంటున్నాడు.
కాబట్టి, ఇశ్రాయేలీయుల యొక్క గొప్ప సమకూర్పులో సువార్త పరిచర్య ఒక ముఖ్యమైన భాగం. ఆ సమకూర్పు నేడు భూమిపై జరుగుతున్న అతి ముఖ్యమైన పని. పరిమాణంలో మరేదీ పోల్చలేదు. ఇంకేమీ ప్రాముఖ్యతతో పోల్చలేదు. ప్రభువు యొక్క సువార్తికులు—ఆయన శిష్యులు—ఈ రోజు భూమిపై గొప్ప సవాలు, గొప్ప కారణం, గొప్ప పనిలో నిమగ్నమై ఉన్నారు.
కానీ ఇంకా ఎక్కువ ఉంది— చాలా ఎక్కువ. తెరకు అవతలి వైపు ప్రజలకు సువార్తను వ్యాప్తి చేయవలసిన అవసరం చాలా ఉంది. తెరకు ఇరువైపులా ఉన్న ప్రతి ఒక్కరూ తన నిబంధన యొక్క ఆశీర్వాదాలను ఆస్వాదించాలని దేవుడు కోరుకుంటున్నాడు. నిబంధన మార్గం అందరికీ తెరిచి ఉంది. ఆ బాటలో అందరూ మాతో కలసి నడవాలని మనవి చేస్తున్నాం. మరే ఇతర పని అంత విశ్వవ్యాప్తం కాదు. “ఆ విధముగా యథార్థ హృదయముతో ఆయన పరిశుద్ధ నామమున ప్రార్థన చేయు వారందరిపట్ల ప్రభువు కనికరము కలిగియున్నాడు”.(హీలమన్ 3:27).
మెల్కీసెదెకు యాజకత్వము పునఃస్థాపించబడింది గనుక,నిబంధనను పాటించే స్త్రీలు మరియు పురుషులు సువార్త యొక్క “అన్ని ఆత్మీయ దీవెనలను” పొందగలరు (సిద్ధాంతము మరియు నిబంధనలు 107:18; ఉద్ఘాటన జోడించబడింది).
1836లో కర్ట్‌లాండ్ దేవాలయం యొక్క ప్రతిష్ఠాపనలో, ప్రభువు ఆధ్వర్యంలో, ఏలీయా కనిపించాడు. అతని ఉద్దేశ్యం? “ పిల్లల హృదయాలను తండ్రుల తట్టుకు త్రిప్పుట” (సిద్ధాంతము మరియు నిబంధనలు 110:15). ఏలియాసు కూడా కనిపించాడు. అతని ఉద్దేశ్యం? జోసెఫ్ స్మిత్ మరియు ఆలీవర్ కౌడరీలకు కట్టుబడి “అబ్రాహాము సువార్త యొక్క యుగమును ఇచ్చి, మాయందు మా సంతానమునందు మా తరువాతి సమస్త తరములు దీవించబడునని చెప్పెను” (సిద్ధాంతము మరియు నిబంధనలు 110:12). అందువలన, బోధకుడు జోసెఫ్ స్మిత్ మరియు ఆలీవర్ కౌడరీలకు యాజకత్వ అధికారాన్ని మరియు అబ్రాహాము నిబంధన యొక్క ప్రత్యేకమైన ఆశీర్వాదాలను ఇతరులకు తెలియజేసే హక్కును అనుగ్రహించెను. 9
సంఘములో, మనము వ్యక్తిగతంగా మరియు సమిష్టిగా నిబంధన మార్గంలో ప్రయాణిస్తాము. వివాహాలు మరియు కుటుంబాలు ప్రేమను సృష్టించే ప్రత్యేకమైన పార్శ్వ బంధాన్ని పంచుకున్నట్లే, మన దేవునికి నిలువుగా నిబంధన ద్వారా మనల్ని మనం బంధించినప్పుడు కొత్త సంబంధం ఏర్పడుతుంది!
దేవుడని చెప్పినప్పుడు నీఫై ఉద్దేశ్యం ఇదే కావచ్చు “ఆయనను తమ దేవునిగా అంగీకరించు వారిని ఆయన ప్రేమించును.” (1 నీఫై 17:40). అందుకే, నిబంధనలో భాగంగా, ప్రత్యేక దయ మరియు ప్రేమ—లేదా హెసెడ్ “వెయ్యి తరాల వరకు” కూడా దేవునితో ఈ బంధం మరియు సన్నిహిత సంబంధంలోకి ప్రవేశించే వారందరికీ అందుబాటులో ఉంటుంది. (ద్వితీయోపదేశకాండము 7:9).
దేవునితో నిబంధన చేసుకోవడం ఆయనతో మన సంబంధాన్ని శాశ్వతంగా మారుస్తుంది. ఇది మనలను అదనపు ప్రేమ మరియు కరుణతో ఆశీర్వదిస్తుంది. 10 ఇది మనం ఎవరో, మరియు మనం ఎలా మారగలమో, దేవుడు ఎలా సహాయం చేస్తాడో ప్రభావితం చేస్తుంది. మనం కూడా ఆయనకు “విశేషమైన నిధి” గా ఉండగలమని మనకు వాగ్దానం చేయబడింది (కీర్తనలు 135:4).
వాగ్దానాలు మరియు విశేషాధికారాలు
పవిత్రమైన నిబంధనలను చేసి, వాటిని పాటించే వారికి నిత్యజీవం మరియు ఉన్నతస్థితి, “దేవుని బహుమానాలలోకెల్లా గొప్పది” వాగ్దానం చేయబడ్డారు. (సిద్ధాంతము మరియు నిబంధనలు 14:7). ఆ నిబంధనలకు యేసు క్రీస్తు హామీదారు ( హెబ్రీయులకు 7:22; 8:6 చూడండి). దేవుడిని ప్రేమించి, తమ జీవితాల్లోని అన్ని ఇతర విషయాలపై ఆయనను ప్రబలంగా అనుమతించే నిబంధనలు పాటించేవారు ఆయనను తమ జీవితాల్లో అత్యంత శక్తివంతమైన ప్రభావితుడుగా చూపుతారు.
మన రోజుల్లో గోత్రజనక దీవెనలు పొందడం, మరియు ప్రాచీన గోత్రజనకులతో మనకున్న సంబంధాన్ని తెలుసుకోవడం మనకు విశేషాధికారం. ఆ ఆశీర్వాదాలు రాబోయే వాటి గురించి కూడా ఒక స్వల్పకాల దృష్టిని అందిస్తాయి.
దేవునితో మన నిబంధన కారణంగా, మనకు సహాయం చేయడానికి ఆయన చేసే ప్రయత్నాలలో ఆయన ఎప్పటికీ అలసిపోడు, మరియు మనపై ఆయన కరుణతో కూడిన సహనాన్ని మనం ఎప్పటికీ కోల్పోము.
వీరికంటే నీవు నన్ను ఎక్కువగా ప్రేమించుచున్నావా?” డేవిడ్ లిండ్స్లీ చే
నిబంధన కలిగిన ఇశ్రాయేలు‌గా మన పిలుపు, సంఘములోని ప్రతి సభ్యుడు దేవునితో నిబంధనలను చేయడంలో ఉన్న ఆనందం మరియు విశేషాధికారాలను గుర్తించేలా చూసుకోవాలి. నిబంధనను పాటించే ప్రతి పురుషుడు మరియు స్త్రీ, బాలుడు మరియు బాలిక, వారి ప్రభావం పరిధిలోకి వచ్చే వారితో సువార్తను పంచుకొనేలా ప్రోత్సహించడానికి ఇది ఒక పిలుపు. ఇశ్రాయేలీయులను సమకూర్చడానికి, బాప్తిస్మము మరియు సహాయం కోసం సూచనలతో పంపబడిన మన సువార్తికులకు మద్దతు ఇవ్వడానికి, మరియు ప్రోత్సహించడానికి ఇది ఒక పిలుపు, తద్వారా మనం కలిసి దేవుని ప్రజలుగా ఉండవచ్చు మరియు ఆయన మనకు దేవుడు అవుతారు.(సిద్ధాంతము మరియు నిబంధనలు 42:9 చూడండి).
యాజకత్వ విధులలో పాల్గొని, దేవునితో నిబంధనలను చేసి, పాటించే ప్రతి పురుషుడు మరియు ప్రతి స్త్రీ దేవుని శక్తిని ప్రత్యక్షంగా పొందగలరు. మనం వ్యక్తిగతంగా ప్రభువు నామాన్ని మనపైకి తీసుకుంటాము. ప్రజలుగా మనం ఆయన పేరును మనపైకి తీసుకుంటాము. యేసు క్రీస్తు యొక్క కడవరి దిన పరిశుద్ధుల సంఘము యొక్క సరైన పేరును ఉపయోగించడం పట్ల మక్కువ చూపడం, ప్రజలుగా మనం ఆయన పేరును మనపైకి తీసుకునే ఒక ముఖ్యమైన మార్గం. నిజంగా, యేసు క్రీస్తు యొక్క కడవరి దిన పరిశుద్ధుల సంఘము మరియు దాని సభ్యులు చేయు ప్రతి దయగల చర్య దేవుని యొక్క హెసెడ్.
ఇశ్రాయేలీయులు ఎందుకు చెల్లాచెదురయ్యారు? ఎందుకంటే ప్రజలు ఆజ్ఞలను ఉల్లంఘించి ప్రవక్తలను రాళ్ళతో కొట్టారు ప్రేమగలవాడైనాగానీ దుఃఖంతో ఉన్న తండ్రి ఇశ్రాయేలీయులను చాలా దూరం చెదరగొట్టడం ద్వారా ప్రతిస్పందించాడు. 11
అయినప్పటికీ, ఒకరోజు ఇశ్రాయేలీయులు మళ్ళీ తన మందలోకి చేర్చబడతారనే వాగ్దానంతో ఆయన వారిని చెదరగొట్టాడు.
ప్రభువు యొక్క మొదటి రాకడ కోసం ప్రపంచాన్ని సిద్ధం చేసే బాధ్యత యూదా గోత్రముకు ఇవ్వబడింది. ఆ గోత్రము నుండి, మరియ దేవుని కుమారుని తల్లిగా పిలువబడింది.
యోసేపు గోత్రము అతని మరియు ఆసెనతు కుమారులైన ఎఫ్రాయిము, మనష్షేల (ఆదికాండము 41:50–52; 46:20 చూడండి) ద్వారా ఇశ్రాయేలు సమూహానికి నాయకత్వం వహించడానికి, ప్రభువు రెండవ రాకడ కోసం ప్రపంచాన్ని సిద్ధం చేయడానికి వారికి బాధ్యత ఇవ్వబడింది.
అలాంటి కాలాతీతమైన హెసెడ్ సంబంధంలో, దేవుడు ఇశ్రాయేలీయులను సమకూర్చాలని కోరుకోవడం సహజం. ఆయన మన పరలోకపు తండ్రి! తన పిల్లలలో ప్రతి ఒక్కరు—తెరకు ఇరువైపులా—యేసు క్రీస్తు యొక్క పునఃస్థాపించబడిన సువార్త సందేశాన్ని వినాలని ఆయన కోరుకుంటున్నారు.
ఒక ప్రేమ మార్గం
నిబంధన మార్గం ప్రేమ మార్గం—అది అపురూపమైన హెసెడ్, అది కరుణతో ఒకరినొకరు చూసుకోవడం మరియు చేరుకోవడం. ఆ ప్రేమను అనుభవిచెందటం ఒక విమోచన మరియు స్పూర్తి. మీరు దేవుని పట్ల మరియు ఆయన పిల్లలందరి పట్ల ప్రేమతో సేవించినప్పుడు మీరు అనుభవించే గొప్ప ఆనందం.
దేవుడిని అన్నిటికంటే ఎక్కువగా ప్రేమించడం నిజమైన శాంతి, ఓదార్పు, విశ్వాసం మరియు ఆనందాన్ని తెచ్చే పరిస్థితి.
నిబంధన మార్గం అనేది దేవునితో మన బంధానికి సంబంధించినది-మనది ఆయనతో హెసెడ్ సంబంధం. మనం దేవునితో నిబంధనలోకి ప్రవేశించినప్పుడు, తన మాటను ఎల్లప్పుడూ నిలబెట్టుకునే ఆయనతో మనము నిబంధన చేసుకున్నాము. మన ప్రాతినిధ్యమును ఉల్లంఘించకుండా, మనలను రక్షించి మనకు సహాయం చేయడానికి, ఆయన చేయగలిగినదంతా చేస్తాడు.
ఈ నిత్య నిబంధనను సూచిస్తూ మోర్మన్ గ్రంథము ప్రారంభమవుతుంది మరియు ముగుస్తుంది. శీర్షిక పేజీ నుండి మోర్మన్ మరియు మొరోనై యొక్క ముగింపు సాక్ష్యాలు వరకు, మోర్మన్ గ్రంథము నిబంధనను సూచిస్తుంది (మోర్మన్ 5:209:37 చూడండి) “మోర్మన్ గ్రంథము యొక్క రాకడ అనేది, ఇశ్రాయేలీయులను సమకూర్చడాన్ని, మరియు అబ్రాహాము, ఇస్సాకు, యాకోబులతో చేసిన నిబంధనలను నేరవేర్చడాన్ని ప్రభువు ప్రారంభించాడని ప్రపంచానికి తెలిపే సూచన.” 12
నా ప్రియమైన సహోదర సహోదరీలారా, నిత్య నిబంధన యొక్క అందం మరియు శక్తి గురించి ప్రపంచానికి బోధించడానికి భూమి యొక్క చరిత్రలో ఈ కీలక సమయంలో మనం పిలువబడ్డాము. ఈ గొప్ప పని చేయడానికి మన పరలోకపు తండ్రి మనల్ని పూర్తిగా విశ్వసిస్తున్నాడు.
ఈ సందేశం 2022 మార్చి 31న జరిగిన సర్వ సభ్య నాయకత్వ సమావేశంలో కూడా అందించబడింది.
© 2022 by Intellectual Reserve, Inc. All rights reserved. USAలో ముద్రించబడినది. ఆంగ్ల ఆమోదము: 6/19. అనువాద ఆమోదము: 6/19. Monthly Liahona Message, 2022 October యొక్క అనువాదము. Telugu. 18317 421