Binulan a Mensahe ti Liahona , Nobiembre 2022
Tawid ti Pammaregta
Dagiti naadaw a sao
Kas imbaga ni nanangko idi nagreklamoak no kasano karigat ti maysa a banag, “O, Hal, siempre narigat. Kasta kano dayta. Ti biag ket maysa a pannubok.”
Maibagana dayta a sitatalna, uray nakaisem, ta ammona ti dua a banag. Ania man ti panagkarigatan, ti kapatgan ket ti isasangpetna iti pagtaengan tapno makadenna ti Nailangitan nga Amana. Ket ammona a maaramidna daytoy babaen ti pammati iti Mangisalakanna. …
Ti tawid ti pammaregta nga imbatina kadatayo ket kasayaatan a mailadawan iti Moroni 7, a pangparegtaan ni Mormon iti anakna a ni Moroni ken dagiti taona. …
Ipangrunana nga umuna ni Jesucristo, kas met laeng kadagiti amin nga agballigi a mangted iti pammaregta kadagidiay mangikarkarigatan nga agpangato iti dana nga agturong iti nailangitan a pagtaenganda. …
Nakita ni Mormon ti kinaemma kas pammaneknek iti pigsa ti pammatida. …
Kalpasanna, paregtaen ida ni Mormon babaen ti panangpaneknekna nga addada iti dalan nga umawat iti sagut ti pusoda a mapno iti natarnaw nga ayat ni Cristo. …
No taliawek ti napalabas, makitak itan no kasano a dayta a sagut ti kinamanangngaasi—ti nadalus nga ayat ni Cristo—ti nangpapigsa, nangiturong, nangsustener, ken nangbalbaliw ken ni nanangko iti panagkarigatanna iti dalanna nga agawid. …
… Detaliado nga ammo ti Mangisalakan dagiti panagkarigatanyo. Ammona ti dakkel a potensialyo a dumur-as iti pammati, namnama, ken panangngaasi.
Dagiti bilin ken katulagan nga idiayana kadakayo ket saan a pannubok a mangpengdan kadakayo. Sagut dagitoy a mangitag-ay kadakayo nga agturong iti panangawat kadagiti amin a sagut ti Dios ken panagawid iti Nailangitan nga Amayo ken iti Apo, nga agayat kadakayo.