iTukutuku Vakavula ni Liaona, Tiseba 2022

Na Vuna Eda Saumi iKatini Kina

O ira Na Lotu i Jisu Karisito ni Yalododonu Edaidai era solia e dua na ikatini ni kedra isau ki na Lotu. Qo e vakatokai na ikatini. E vakayagataki na ilavo me vakayacori kina na cakacaka ni Lotu e vuravura raraba.

Na Cava na iKatini?

E dua na ivakaro ni Kalou sai koya me da sauma na ikatini, ka dua na ikatini ni keda isau, ki na Nona Lotu. Ni da sauma na ikatini, eda vakaraitaka na noda vakavinavinaka vua na Kalou me baleta na noda veivakalougatataki. Eda vakaraitaka ni da nuitaka na Turaga ka sa lomada meda talairawarawa Vua ena ka kecega.

Melikiseteki—iVakatawa ni Lololo, mai vei Clark Kelley Price

iVakavuvuli Eso ni Veiyalayalati Makawa

Era sa saumi ikatini tu na tamata ni Kalou mai na gauna ni Veiyalayalati Makawa. Me kena ivakaraitaki, a sauma o Eparama na ikatini (raica Nai Vakatekivu 14:18–20). Na lawa ni ikatini era a vakatavulica talega na parofita ni gauna makawa, oka kina o Mosese kei Malakai (raica na Vunau ni Soro 27:30–34; Niemaia 10:35–37; Malakai 3:10).

Vakalesui Mai ni Lawa ni iKatini

Ena 1838, a taroga o Josefa Simici na Parofita vua na Turaga na sala me ra sauma kina na ikatini na lewe ni Lotu. Na kena isau mai vua na Turaga e volai tu ena Vunau kei na Veiyalayalati 119, ka kaya ni dodonu vei ira na lewenilotu me ra solia e dua na ikatini ni ka era rawata ki na Lotu (raica na tikina e 4). Era sa vakatavulica na iliuliu ni Lotu ni ibalebale ni ka era “rawata” oya na ilavo.

iTaba mai vei Jamie Dale Johnson

Na iVakarau ni Saumi iKatini

E rawa ni da saumi ikatini ena noda vakalewena na fomu ni cau ena initaneti donations.ChurchofJesusChrist.org. Se rawa ni da vakalewena e dua na fomu pepa ka solia na ilavo vua e dua na lewe ni matabisopi se mataveiliutaki ni tabana. Na ilavo kece e vakau ki na itikotiko liu ni Lotu, ka ra na vakatulewa kina ena masumasu na iliuliu ni Lotu (na Mataveiliutaki Taumada, Kuoramu ni iApositolo Le Tinikarua, kei na Matabisopi Vakatulewa) na ivakarau me vakayagataki kina.

Veivakalougatataki

Sa yalataka na Turaga ni o ira era saumi ikatini era na vakalougatataki vakayago ka vakayalo. Na ikatini e vakalougatataki ira talega na luvena kece na Kalou ena madigi me ra vuli mai Vua ka tubu ena kosipeli.

Na iVakarau e Vakayagataki Kina na iLavo ni iKatini

E dau vakayagataki na ikatini me tarai cake kina na Lotu ni Turaga e vuravura raraba. Oqo e oka kina na tara ni valetabu kei na veivale tale eso ni Lotu, tabaki ni ivolanikalou kei na ivola tale eso, vakailavotaki ni koronivuli ni Lotu, kei na veivuke ena cakacaka ni tuva kawa kei na kaulotu.

Veivakadeitaki ni iKatini

Ni oti e dua na yabaki, era dau sota na lewe ni Lotu kei na nodra bisopi (se peresitedi ni tabana) me ra tukuna vua kevaka era sa saumi ikatini vakataucoko tiko.

Mai na iVolanikalou

Eratou navuca ena masumasu na Mataveiliutaki Taumada, Kuoramu ni iApositolo Le Tinikarua, kei na Matabisopi Vakatulewa na sala e vakayagataki kina na ilavo ni ikatini (raica na Vunau kei na Veiyalayalati 120).

Sa yalataka tu na Turaga ni na dolava “na katuba ni lomalagi” ni da sauma na noda ikatini (raica na Malakai 3:10).

Eda na vakabulai ena iKarua ni Lako Mai ni iVakabula kevaka eda sauma na ikatini (raica na Vunau kei na Veiyalayalati 64:23).

Na Veika e Saumi Kina na iKatini

iTaba ni Valetabu e Oakland California mai vei Longin Lonczyna Jr.

Vakaraica e Vuqa Tale

Kevaka e tiko na nomu vakatataro me baleta na ikatini, e rawa ni o veitalanoa kei ira na turaga se marama dauveiqaravi, o ira na nomu iliuliu ni tabanalevu se tabana, se o ira na daukaulotu.

© 2022 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. iVakadewa ni Monthly Liahona Message, December 2022. Fijian. 18318 858