“Vim Li Cas Peb Them Ib Feem Kaum,” Liyahaunas, Kaum Ob Hlis Ntuj 2022.
Zaj Lus hauv Liyahaunas Txhua Hli, Kaum Ob Hlis Ntuj 2022
Vim Li Cas Peb Them Ib Feem Kaum
Cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muab ib feem kaum ntawm lawv cov nyiaj tau los rau lub Koom Txoos. Qhov no hu ua them ib feem kaum. Lub Koom Txoos siv cov nyiaj ua lawv tej hauj lwm thoob plaws ntiaj teb.
Kev Them Ib Feem Kaum Yog Dab Tsi?
Ib qho ntawm Vajtswv cov lus txib yog them ib feem kaum, uas yog ib feem kaum ntawm peb cov nyiaj tau los, rau Nws lub Koom Txoos. Thaum peb them ib feem kaum, peb qhia Vajtswv tias peb ua Nws tsaug rau peb tej koob hmoov. Peb qhia tias peb tso siab rau tus Tswv thiab peb kam ua raws li Nws tej lus txib rau txhua yam.
Mekhixedes—Tus Saib Xyuas lub Tsev Rau Khoom, los ntawm Clark Kelley Price
Kev Qhia hauv Phau Qub
Vajtswv cov neeg tau them ib feem kaum txij thaum lub caij nyoog ntawm Phau Qub. Piv txwv hais tias, Anplaham them ib feem kaum (saib Chiv Keeb 14:18–20). Cov yaj saub qub tau qhia txoj kev cai them ib feem kaum, suav nrog Mauxes thiab Malakis (saib Levis Kev Cai 27:30–34; Nehemis 10:35–37; Malakis 3:10).
Kev Muab Kev Cai txog Ib Feem Kaum Txum Tim Rov Qab Los
Nyob rau xyoo 1838, tus Yaj Saub Joseph Smith nug tus Tswv seb cov mej zeej ntawm lub Koom Txoos yuav tsum them ib feem kaum li cas. Tau muab tus Tswv tej lus teb kaw nyob rau hauv phau Lus Qhuab Qhia thiab Kev Khi Lus 119, thiab hais tias cov mej zeej yuav tsum muab ib feem kaum ntawm lawv cov paj laum rau lub Koom Txoos (saib nqe 4). Cov thawj coj ntawm lub Koom Txoos tau qhia tias “paj laum” txhais tau tias nyiaj tau los.
Daim duab los ntawm Jamie Dale Johnson
Them Ib Feem Kaum Li Cas
Peb them tau ib feem kaum los ntawm kev sau daim ntawv ntawm donations.ChurchofJesusChrist.org. Los sis peb sau tau ib daim ntawv thiab muab cov nyiaj rau ib tug ntawm pawg npisov los sis ceg ntseeg tus thawj tswj hwm. Lawv xa tag nrho cov nyiaj mus rau lub hauv paus ntawm lub Koom Txoos, ces cov thawj coj ntawm lub Koom Txoos (Thawj Pawg Thawj Tswj Hwm, Pawg Kaum Ob tug Thwj Tim, thiab Thawj Pawg Npisov) thov Vajtswv kom txiav txim siab seb siv cov nyiaj li cas.
Koob Hmoov
Tus Tswv tau cog lus tias cov uas them ib feem kaum yuav txais koob hmoov ntawm sab ntsuj plig. Them ib feem kaum foom koob hmoov rau tag nrho Vajtswv cov me nyuam kom lawv muaj cib fim kawm txog Nws thiab to taub Nws txoj moo zoo ntxiv.
Siv Nyiaj Ib Feem Kaum Li Cas
Cov nyiaj ib feem kaum yog siv kom txhim tsa tus Tswv lub Koom Txoos thoob plaws lub ntiaj teb. Lawv siv li no xws li txhim tsa tuam tsev thiab lwm cov tsev ntawm lub Koom Txoos, luam ntawv vaj lug kub thiab lwm yam ntaub ntawv, pub nyiaj rau lub Koom Txoos cov tsev kawm ntawv, thiab pab nrog tsev neeg zaj keeb kwm thiab cov tub txib txoj hauj lwm.
Qhia txog Kev Them Ib Feem Kaum
Cov mej zeej sib ntsib nrog lawv tus npisov (los sis ceg ntseeg tus thawj tswj hwm) ib xyoos ib zaug kom qhia nws seb lawv puas them ib feem kaum tag nrho.
Ib Feem Kaum Them Rau Dab Tsi
Daim duab ntawm lub Tuam Tsev Oakland California los ntawm Login Lonczyna Jr.
© 2022 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, December 2022. Hmong. 18318 295