“Akwan horow 4 a Jesus Christ Hyɛ Wo Dzen,’’ Ma Mbabun Enya Ahoɔdzen, Sanda 2023.
Bosoom bosoom For the Strength of Youth Amandzɛɛbɔ, Sanda 2023
Akwan horow 4 a Jesus Christ Hyɛ Wo Dzen
Mutum adze nyina yɛ wɔ Christ a ɔhyɛ me dzen no mu.
Philippifo 4:13
Wiadze nyina mu no, Christianfo dzi dɛw wɔ kyerɛwsɛm yi mu: “Mutum adze nyina yɛ wɔ [Christ] nyia a ɔhyɛ me dzen no mu.” (Philippifo 4:13).
Sɛ nkorɔfo tse iyi a, binom botum adwen dɛ n’asekyerɛ nye wobotum edzi nsɔhwɛ biara do konyim, wobedzi nyim wɔ agor biara mu, na hɔn pɛ biara aba mu. Mbom ɔnnyɛ dɛm na kyerɛwsɛm yi kyerɛkyerɛ.
Ɔsomafo Paul na ɔkyerɛwee ber a nna ɔda efiadze. Ɔyɛ daduanyi no, nna ndzɛmba pii wɔ hɔ a nna Paul nntum nnyɛ, naaso nna onyim dɛ Jesus Christ botum ahyɛ no dzen ma ɔayɛ dza ohia dodoodow no.
Ɔyɛ nokwar dɛmara ma wo!
1 Christ Hyɛ Wo Dzen ma Ihu
Jesus Christ ama wo akwan a ohia beberee a ibotum ehu dza ɔyɛ nokwar. Ɔakyerɛkyerɛ hɛn dɛ aber nyina yɛmbɔ mpaa (hwɛ 3 Nephi 18:18) na yembisa nhu dza a ɔyɛ nokwar (hwɛ Moroni 10:4–5). Ibotum so edua wo kyerɛwsɛm adzesũa do ahwehwɛ na ehu dza ɔyɛ nokwar.
Mpaabɔ na kyerɛwsɛm no nsũae dze Sunsum no ba w’abrabɔ mu. Sunsum no botum akã akyerɛ wo wɔ “w’adwen na … w’akoma mu’’ (Nkyerɛkyerɛ na Ahyɛmudzi 8:2), “dze dɛw bɛhyɛ wo kra mã,’’ na “obobue w’adwen mu’’ (Nkyerɛkyerɛ na Ahyɛmudzi 11:13).
Akwan yinom mu no, ibotum “etsie No’’—atse Agyenkwa ne nsɛm na ayɛ dza Ɔase no. President Russell M. Nelson akyerɛkyerɛ dɛ iyi nye “konyimdzi, enyigye, na dɛwdzi wɔ abrabɔ yi mu no nhwɛdo.’’1
2 Christ Hyɛ Wo Dzen ma Ayɛ
Ahoɔdzen ba wo hɔ ber a eper dɛ ibesie mbrasɛm no na ayɛ nsanmuyi apapa a wogya kɔ asomdwee na enyigye mu. Jesus Christ hyɛ wo dzen ma eyɛ iyi mpo ber a nsanmuyi horow no yɛ dzen dɛ ebɛyɛ. Ɔtɔfabi a ebɛyɛ nsanmuyi bɔn. Ndaase mu ara, Agyenkwa No Werdambɔ no ma nnuho ba mu. Osian Jesus Christ ntsi, hɛnho botum atsew na yeenya enyigye. Obotum ahyɛ wo dzen ma “ayɛ yie na abɛyɛ yie”2 da biara.
3 Christ Hyɛ Wo Dzen ma Edzi Konyim
Ber a ɔda efiadze no, Paul kyerɛɛw dɛ: “Mesũa dɛ, asetsena biara a mowɔ mu no, mema ɔdɔɔ me sõ.
“Minyim mbrɛadze asetsena mu tsena, na minyim ahonya mu tsena so: nye adze nyina ho endwuw’’ (Philippifo 4:11–12).
Yɛkã no bio a, Paul sũae dɛ, ɔnam Christ do, obotum edzi no nsɔhwɛ na ɔhaw do konyim na oesũa efi mu. Jesus Christ botum ahyɛ wo dzen ma ayɛ dɛmara.
Agyenkwa no tsee “yaw na oehu amandze na obenya nsɔhwɛ ahorow biara bi.’’ Ɔfaa hɛn mberɛwyɛ too no do “ama oehu … mbrɛ obesi aboa [n’asekyerɛ nye boa] no nkorɔfo dɛ mbrɛ hɔn mberɛwyɛ tse no” (Alma 7:11–12). Dza ehyia biara no, Jesus Christ botum ahyɛ wo dzen ma asɔw ma ayɛ ndzɛmba a nkyɛ ɔwoara ankasa nnkotum ayɛ no ewie.
4 Christ Hyɛ Wo Dzen ma Abɛyɛ
Jesus Christ ayɛ wusoɛr nokwar ankasa ama hɛn nyina, na Ɔma onnyiewiei nkwa yɛ hɔ ma hɔn a wonu hɔnho, wɔgye ayɛdze etsitsir horow, na wodzi na wosie hɔn ahyɛmu horow a ɔkã ho no. Christ nnkã ho a, nkyɛ yennkotum ahyɛ dza Ɔsor Egya pɛ no dodow no mã—ma yɛabɛyɛ tse dɛ Ɔno na Ne Ba, Jesus Christ yie, na yɛnye Hɔn atsena afebɔɔ.
Ibotum abɛyɛ tse dɛ Jesus Christ yie ber a esũa No ho asɛm, edan no na enya awerɛhyɛmu wɔ No mu, na idzi Ne fasusu do. Iyi begya wo ma edze gyedzi, enyidado, ayamuyie, abotar, ahobrɛadze, ahotsew, na setsie mapã abɔ bra. Iyinom nyina yɛ Agyenkwa no su.
Sɛ eper kã Jesus Christ do a, Ɔbɛyɛ wo enyidado na kan a ɔbɔweɔn wo ma abɛyɛ dza Onyim nyina dɛ ibotum abɛyɛ. Na, enye Paul no, ibotum akã dɛ, “Mutum adze nyina yɛ wɔ [Christ] nyia a ɔhyɛ me dzen no mu.
© 2023 Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Bosoom bosoom For the Strength of YouthAmandzɛɛbɔ, Sanda 2023 ne nkyerɛasee. Language. 18904 502