Bosoom bosoom Liahona Amandzɛɛbɔ, Sanda 2023

Ebusua Ebusua Wɔ Hɔ Afebɔɔ

ebusua a wɔayerɛw hɔn ano

Ebusua no nye ɔman na Asɔr no hɔn fapem tɔw no. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrmba gye dzi dɛ ebusua ebusua botum ayɛ onnyiewiei. Yɛyɛ edwuma dze hyɛ hɛn ebusua ebusua dzen wɔ asaase do. Yɛsan so wɔ gyedzi dɛ yebotum enya onnyiewiei ebusua nhyira no.

Nyankopɔn N’Ebusua

Nyimpa nyina yɛ sor awofo hɔn sunsum mu mbabanyin anaa mbabaa. Hɛn nyina yɛkã Nyankopɔn n’ebusua ho. Hɛn nyina yɛwɔ awosu krɔnkrɔn na hyɛbea. Sɛ yɛbɔ bra tsenenee a, yebotum asan yɛnye hɛn Ɔsor Egya akɛtsena dɛ yɛkã N’ebusua ho afebɔɔ.

awarfo afoforfo a wɔwɔ temple abowano

Ayefor mfonyin a Joseph Kaluba twae.

Onnyiewiei Ebusua Ebusua

Sɛ ɔbarimba na ɔbaa war wɔ temple na wosie hɔn ahyɛmudzi horow a, hɔn awar no bɛyɛ mfesantsen dze. Wɔfrɛ temple ayɛdze yi nsɔwano. Mba a wɔwo hɔn wɔ hɔn awofo nsɔwano ekyir no wɔwo hɔn wɔ dɛm ahyɛmudzi no mu. Mba a wɔwo hɔn ansaana wɔasɔw hɔn awofo ano no wobotum asɔw hɔn akã hɔnho wɔ temple ama woetum abɛyɛ ebusua a ɔwɔ hɔ afebɔɔ. Asɔrmba yɛ ebusua abakɔsɛm na temple edwuma ama woeetum aasɔw hɔn ebusua ebusua ano abɔ mu ama mbasantsen nyina. Osian Jesus Christ na No Werdambɔ no ntsi onnyiewiei ebusua ne nhyira botun ayɛ hɔ.

Awar

Nyankopɔn hyehyɛɛ ɔbarimba na ɔbaa ntamu awar. Jesus Christ n’asɛmpa no kyerɛkyerɛ dɛ nkunom na nyernom ndzi nokwar mma hɔnho nkorkor na wɔnyɛ anokwafo wɔ hɔn awar ahyɛmudzi horow mu. Ɔwɔ dɛ wodzi nokwar wɔ adwendwen, kasa, na nyɛe mu. Awar yɛ etsipɛnfo dwuma, na ɔwɔ dɛ awarfo hyɛ hɔnho nkuran, wɔma awerɛkyekyer, na wɔboa hɔnho.

awofo a wɔnye abɔdomaba

Awofo na Mba

Nyankopɔn hyɛɛ Adam na Eve dɛ wɔnwo. Asɔr baanodzifo akyerɛkyerɛ dɛ dɛm mbrasɛm yi da ho yɛ edwuma. Enãnom na egyanom bɔ mu yɛ edwuma dze tsetse hɔn mba wɔ ɔdɔ na tseneneeyɛ mu (hwɛ Nkyerɛkyerɛ na Ahyɛmudzi 68:25–28). Wɔkyerɛkyerɛ mbofra dɛ wondzi hɔn awofo nyi na wɔnyɛ setsie mma hɔn (hwɛ Exodus 20:12).

Erekyerɛkyerɛ na Irusũa Adze

Awofo kyerɛkyerɛ hɔn mba dɛ wɔndɔ Nyankopɔn na wɔnyɛ setsie mma Ne mbrasɛm. Ebusua abrabɔ ma hɛn akwanhorow ma yenya enyigye na yesũa abotar na ahofama. Su yinom boa hɛn ma yɛbɛyɛ tse dɛ Nyankopɔn yie na osiesie hɛn ma yɛatsena enyigye mu dɛ ebusua ebusua a wɔwɔ hɔ afebɔɔ.

Yɛrehyɛ Ebusua Ebusua Dzen

Ɔgye edwumayɛ, etu ho akyɛ, na abotar ma yɛdze akyekyer ebusua papa bi. Asɛmpa fapem horow tse dɛ gyedzi, mpaabɔ, bɔnfakyɛ, ɔdɔ, edwumayɛ, na agordzi a odzi mu botum aboa hɛn ma yeenya ebusua abrabɔ mu dɛwdzi. Yebotum so asan enya ankorankor nyikyerɛ dze ehu mbrɛ yebesi bɛhyɛ hɛn ebusua ebusua dzen.

Jesus Christ nsaano mfonyin

Christ ne Mfonyin, a Heinrich Hofmann yɛɛ nsaano mfonyin no

Nhyira Wɔhɔ Ma Obiara

Nnyɛ obiara na onya kwan kã ebusua a ɔfata ho wɔ asaase do ha. Naaso Nyankopɔn abɔ anohoba dɛ obiara a obesie Ne mbrasɛm no benya onnyiewiei ebusua no ho nhyira nyinara. Yebotum enya awerɛhyɛmu wɔ No mu na yeenya gyedzi wɔ Ne mber mu.

Fi Kyerɛwsɛm no mu

Awofo kyerɛkyerɛ hɔn mba dɛ wɔndodɔ hɔnho nkorkor, na wɔnsom hɔnho nkorkor (hwɛ Mosiah 4:14–15).

Mpaabɔ bɛhyɛ ebusua ebusua dzen (hwɛ 3 Nephi 18:21).

Hɔn a wɔasɔw hɔn ano wɔ temple no benya onnyiewiei nhyira (hwɛ Nkyerɛkyerɛ na Ahyɛmudzi 132:19).

Nsɛmfua a ɔwɔ dɛ Yɛkaa

Awosu krɔnkrɔn: Su horow a yenyae fi Nyankopɔn hɔ dɛ No sunsum mba.

Ahyɛmudzi horow: Anohoba horow a yɛnye Nyankopɔn dzi. Ɔdze nhyira bɔ hɛn anohoba.

Hyɛɛ: mado sihɔ anaa hyehyɛ. “Hyɛ’’ botum asan so akyerɛ dɛ erema nyia a okitsa asɔfodzi, tumdzi wɔ asɔfodzi ɔfese mu, tse dɛ deacon anaa elder.

Nyikyerɛ: Nkenyan fi Nyankopɔn hɔ dze ma Ne mba wɔ asaase do.

Hwehwɛ Dza Ɔfa Ho Bio

Ama eesũa dza nda a odzi ekyir nkɔnhyɛfo akyerɛkyerɛ fa ebusua ebusua ho no, ibotum akenkan “Ebusua No: Dawurbɔ ma Wiadze’’ wɔ ChurchofJesusChrist.org anaa wɔ Asɛmpa Nwoma Korabea app no do. Ward na nkorbata horow wɔ Primary, Young Men, na Young Women ekuwekuw ma mbofra na mbasirmba. Ibotum nye baanodzifo no na wo nuambanyin anaa nkyerɛbaa asomfo edzi nkɔmbɔ wɔ mbrɛ wobesi botum bɔboa wo ma ahyɛ wo mbofra dzen ho.

© 2023 Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, Sanda 2023 ne Nkyerɛasee. Language. 18904 502