Ohiyac 4 Ma Jisus El Ahkweye Kom

Sin Prestuhnsi Luhlahp luhn Muhtwacn Fuhsr ac Mukul Fuhsr

Nga kuh in oruh ma nuhkwewa kacl Kraist.
Philippi 4:13

Fin facluh nohfohn, Mwet Kristin engankihn ma suhmuhslah se inge: “Oasr ku luk in oru ma nukwewa ke ku su Christ el ase nu sik” (Philippi 4:13).

Ke mwet lohng ma inge, kuhtuh sahp ac nuhnkuh ma kalmac tuh elos kuh in pass test nuhkwewa, itto ke sritacl nuhkwewa, ac eis finsrak nuhkwewa lalos. Tuh tiac ma ma suhmuhslah se inge luti.

Ma inge sihmlac sel Mwet Sap Paul ke el oasr kaclpous. Ke el mwet kaclpous, oasr puhkantwen ma Paul el tiac kuh in oruh, tuh el tuh tuh Jisus Kraist El kuh in ahkweyacl in oruh ma yohk srihpac emet.

Ma se inge el pwacye pac nuh sum!

1 Kraist Ahkweye Kom in Etuh

Jisus Kraist El usot nuh sum ohiyac pucs tuh kom in etwaclah ma pwacye. El tuh luti kuht in pruhe pacl nuhkwewa (liye 3 Nephi 18:18) ac siyuck in etuh ma pwacye (liye Moroni 10:4–5). Kom kuh in konwacack ac etuh ma pwacye nuh ke lutlut ke ma suhmuhslah.

Pruhe ac lutlut ke ma suhmuhslah fah use Nguhn nuh ke moul lom. Nguhn ac sramsram nuh “nuhnak lom ac … insiom” (liye Doctrine and Covenants 8:2), “nwacklah nguhnum ke engan,” ac “ahkkahlwemye nuhnak lom” (liye Doctrine and Covenants 11:13).

Ke ohiyac inge, kom kuh in “Porongel”—lohng kahs luhn Mwet Lahngo ac ukwe ma El fahk. Prestuhn Russell M. Nelson el luti tuh ma inge pa “pactuhn in kuhtanglah, engan, ac kaksak ke moul se inge.”¹

2 Kraist Ahkweye Kom in Oruh

Ahkkweyeyuck tuhkuh nuh sum ke kom srihke in ahkos masap ac oraclah sulaclah wo ma kol nuh ke mihslac ac engan. Jisus Kraist El ahkweye kom in oruh finne kain sulaclah inge upac. Kuhtuh pacl kom ac tahfonglac ke sulaclah lom. Tarilacna, Iwaclah luhn Mwet Lahngo oruh auliyak kuh in sikyak. Ke srihpacn Jisus Kraist, kom kuh in nwacsnwacslah ac konwacack mihslac. El kuh in ahkweye kom in “oruh wo liki met ac eklac nuh wo liki met”² kais sie lwen.

3 Kraist Ahkweye Kom in Kuhtanglah

Ke el oasr kaclpous, Paul el sihm: “nga lotela tari in sifacna falkin ma su oasr yuruk.

“Nga lotela ouiya lukma se inge, tuh in acn nukewa ac ke pacl nukewa, nga inse misla nga finne kihp ku masrinsral, ku fin ma su oasr yuruk srikla ku yohkla.” (Philippians 4:11–12).

Ke kahs sahyac, Paul el etwaclah, nuh ke Kraist, el kuh in kuhtanglah ac etwaclah sin ma upac ac suhpwacr lal. Jisus Kraist El kuh in ahkweye kom in oruh oacpacna.

Mwet Lahngo El kweokkihn “ngal ac ma upac ac mwe sruhf ke kain nuh kwewa.” El fah eis nuh Facl mas lalos tuh “Elan kuh in etuh … ac kahsruh fuhkah mwet Lal fal nuh ke mas lalos” (Alma 7:11–12). Oacna sie ma upac ma kom ac sun, Jisus Kraist El kuh in ahkweye kom in fahsr nuh met ac oraclah ma kom ac tiac kuh in oruh sifacna.

4 Kraist Ahkweye Kom in Eklac

Jisus Kraist El oruh tuh sifil moulyak uh kuh in sikyak nuh sesr nuh kwewa, ac El sang moul ma pahtpaht nuh selos suc auliyak, eis akwuck enenweyuck, ac oraclah ac karihngihn olwelah ma wi akwuck inge. Fin wacngihn Kraist, kuht ac tiac kuh in ahkfalye ma Pahpah Inkuhsrao El luhngse emet—kuht in eklac in oacna El ac Wen Nahtuhl, Jisus Kraist, ac moul Yohrohlos ne tohk ma pahtpaht.

Kom kuh in eklac oacna Jisus Kraist ke kom etwaclah Sel, luhlahlfongi ac fungyang nuh Sel, ac ukwe srihkasrak Lal. Ma inge ac kol kom in moul ke luhlahlfongi, finsrak, luhngse pwacye, muhtweng, inse puhsisacl, nwacsnwacs, ac ahkostwen yohk. Ma nuhkwewa inge pa ohiyac luhn Mwet Lahngo.

Ke kom srihke in ukwe Jisus Kraist, El ac oacna finsrak lom ac kahlwem lom ma ac kol kom in eklac nuh ma nuhkwewa El etuh kom kuh in eis. Ac, wi Paul, kom ac kuh in fahk, “Oasr ku luk in oru ma nukwewa ke ku su Christ el ase nu sik.”

© 2023 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Monthly For the Strength of Youth Message, January 2023. Language. 18904 868