Porous ren Liahona Iteiten maram, January 2023

Famini Feinfeino Chok

Ewe famini ina ewe auchean kinikinin ewe neni me ewe Mwichefen. Chon Ewe Mwichefenin Jises Kraist ren Aramas mi Pin non Fansoun Soponon ra nuku ekkewe soufosun nom me soufosun ikenai. Sia angang ach sipwe apochokuna ach kewe famini won fonufan. A pwan wor ach nuku pwe sia tongeni angei ewe feiochun ew famini feinfeino.

Ewe Famini an Kot

Meinisin aramas ir noun ekkewe sam me in non nang non pekin ngun. Kich meinisin kinikinin ewe famini an Kot. A wor rech meinisin ew mettoch forien Kot me kokotun fetanin manauach. Ika sia manau non pung, sia tongeni nom ren Samach won nang ussun kinikinin An famini fochofoch.

sasingin apupunu seni Joseph Kaluba

Famini Fochofoch

Nupwen emon mwan me emon fefin ra apupunu non ewe tempel me aponueta ar kewe pwon, ar ewe pupunu epwe pupunu fochofoch. Ei angangepinin non tempel a iteni ewe riri Semirit ra uputiw mwirin an iner me semer kewe ra riri fengen ra uputiw non ena pwon. Semirit ra uputiw me mwen an semer me iner kewe riri fengen ra tongeni riri ngenir non ewe tempel pwe repwe tongeni famini fochofoch. Chon ewe Mwichefen ra fori uruon famini me angangen non tempel pwe repwe tongeni ri fengeni ar kewe famini seni meinisin tappin aramas. Ewe feiochun ew famini fochofoch a tufich pokiten Jises Kraist me An Achasefan.

Pupunu

Pupunu nefinen emon mwan me emon fefin aepinipinino meren Kot. Ewe kapas allimen Jises Kraist a aiti ekkewe mwan mi pupunu me fefin mi pupunu ar repwe wenechar fengen me nukuchar non ar ponen apupunu. Repwe ennet non ekiek, kapas, me fofor. Pupunu ew chiechi mi chok nonno, me pupunu repwe pesei, ekinamwei, me aninis fengen.

Sam me In me Semirit

Kot a annuk ngeni Atam me If repwe nounou semirit. Sou emwenin Mwichefen ra osukuna pwe ei annuk mi chok chiwen wor pochokunan. In me sam repwe angang fengen ne amarieta nour kewe semirit non tong me wenechar(nengeni Doctrine and Covenants 68:25–28). Semirit ra kaeo ar repwe asamonu me anneasosichi semer me iner kewe (nengeniExodus 20:12).

Osukun me Kaeo

Sam me in ra osukuna nour kewe semirit ar repwe tongei Kot me anneasosich An kewe annuk. Manauen famini a ngenikich ewe tufich ach sipwe mefi pwapwa me kaeo nikitu me eteneki osupwwangen ekkoch nap seni pusin en. Ekkei sokkun napanap ra anisikich ach sipwe winiti ussun Kot me amonakicheta ach sipwe nom non pwapwa ussun famini fochofoch.

Apochokuna Famini

A auchea epwe wor angang, fangetani, me nikitu ne forata ew famini mi fetanoch. Ekkewe nongonongun kapas allim ussun nuku, iotek, omusano, tong, angang, me pochokun non unusen inis a tongeni anisi kich ach sipwe kuna pwapwa non manauen famini. Sia pwan tongeni angei ach pusin pwarata ach sipwe sinei ifa ussun ach sipwe apochokuna ach kewe famini.

Sasingin Kraist, seni Heinrich Hofmann

A wor feioch ngeni kich meinisin

Esap meinisin a wor ren ewe tufich an epwe kinikinin ew famini mi unusoch ikei won fonufan. Nge Kot a pwon pwe meinisin ion mi aponueta An kewe annuk repwe angei meinisin ekkewe feiochun ew famini fochofoch. Sia tongeni nukunuk non I me awora nuku non An fansoun.

Seni ekkewe Pukefel

Sam me in repwe aiti nour kewe semirit ar repwe tong me angang fengen nefiner (nengeni Mosaia 4:14–15).

Iotek epwe apochokuna ekkewe famini (nengeni 3 Nifai18:21).

Ekkana ra riri non ewe tempel repwe angei ekkewe feioch fochofoch (nengeniDoctrine and Covenants 132:19).

Kapas kopwe Chechemeni

Mettoch mi for seni Kot: Ekkewe mettoch mi auchea sia fen angei seni Kot ussun Noun semirit non ngun.

Pwon: Pwon sia fori fengeni me Kot. I a pwon ngeni kich ekkewe feioch.

Epinano: Forata, foruta ika tetenoch. “Epinano” a pwan tongeni wewen awora emon mi wor an mumutan pristut non ew wiisen pristut, ussun tiken ika elter.

Pwarata: Pochokunen memef seni Kot ngeni Noun semirit won fonufan.

Kutta Pwan Ekkoch

Sipwe kaeo met ekkewe soufos non fansoun soponon ra fen osukuna ussun famini, sia tongeni anneani “Ewe Famini: Ew Esinesin ngeni ewe Fonufan” won ChurchofJesusChrist.org non ewe Gospel Library app. Ekkewe wart me pranch mi wor ar mwichen Kinter, Mwichen, Anuon me Mwichen Fopun ren semirit me sarafo. Oua tongeni kapas ngeni noumi kana sou emwen me ngeni noumi brothers chon iamwiri ika sisters chon iamwir ifa ussun repwe tongeni anisi pochokunen noumi kewe semirit.

© 2018 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porouse ren Liahona Iteiten Maram, January 2023. Language. 18904 901.