Bulanan nga Mensahe sa Liahona, Pebrero 2023

Mga Bulig para sa mga Lamharon kag Kabataan

Ang mga ginikanan may mayor nga responsibilidad nga tudloan ang ila kabataan parte kay Jesucristo kag sa Iya ebanghelyo. Ang Simbahan ni Jesucristo sang mga Santos sa Ulihing mga Adlaw may mga organisasyon, mga programa, kag iban pa nga mga bulig para buligan ang mga ginikanan sa ila mga pagpaninguha. Sing ululupod, ang mga ginikanan, mga lider sang Simbahan, kag mga abyan pwede magbulig sa tanan nga kabataan kag mga tin-edyer nga magpalapit kay Cristo.

Litrato iya ni Ben Johnson

Primary

Ang Primary amo ang organisasyon sang Simbahan para sa kabataan nga nagaedad 18 ka bulan tubtob 11 anyos. Sa Primary, ang kabataan nagatuon parte kay Jesucristo kag sa Iya ebanghelyo paagi sa mga leksyon, musika, kag mga aktibidades. Ang Primary makabulig sa kabataan nga mabatyagan ang pagpalangga sang Dios para sa ila.

Mga Korum sang Aaronic Priesthood kag mga Klase sa Young Women

Kada Enero sang tuig nga magaedad ang kabataan sang 12 anyos, nagasaylo sila halin sa Primary pakadto sa mga korum sang Aaronic Priesthood (para sa mga lalaki) ukon sa mga klase sang Young Women (para sa mga babayi). Sa ila mga korum kag mga klase, ang mga lamharon nagapadayon sa pagpabakod sang ila mga testimonya kag sa pagserbisyo sa iban.

Programa nga Mga Kabataan kag Mga Lamharon

Sang bata pa lang, si Jesucristo nagdugang “sa kaalam kag kataason, kag nahamut-an sang Dios kag tawo” (Lucas 2:52). Ang Mga Kabataan kag Mga Lamharon nga programa nagabulig sa lamharon nga mga miyembro sang Simbahan nga magsunod sa ehemplo ni Cristo. Nagatuon sila kag nagatubo sa tanan nga bahin sang ila kabuhi—sa espiritwal, sosyal, pisikal, kag sa kinaalam.

Mga Magasin sang Simbahan

Ang magasin sang Simbahan para sa kabataan amo ang Abyan nga magasin. Ang Para sa Kusog sang mga Lamharon amo ang magasin para sa mga lamharon. Ining mga magasin nagaunod sang mga istorya, mga pinanudlo, kag aktibidades nga ginsulat para gid sa mga kabataan kag mga tin-edyer.

Para sa Kusog sang mga Lamharon nga Giya nga Libro

Ang Para sa Kusog sang mga Lamharon: Giya sa Paghimo sang mga Pagpili nagatudlo sa mga lamharon sang mga kamatuoran sang ebanghelyo. Nagatudlo ini sa ila kon paano maghimo sang mga desisyon nga makabulig sa ila nga sundon si Jesucristo. Nagalakip man ini sang mga sabat sa mga pamangkot sang mga lamharon parte sa kon paano ipangabuhi ang ebanghelyo.

Librarya sang Ebanghelyo

Ang Librarya sang Ebanghelyo may madamo nga digital nga mga bulig, lakip na ang mga video, musika, mga sugilanon sa balaan nga mga kasulatan, kag mga aktibidades. Nagalakip man ini sang mga balasahon para buligan ang mga ginikanan kag mga lider sa pagtudlo sang mga prinsipyo sang ebanghelyo. Ining mga bulig makita sa Librarya sang Ebanghelyo sa ChurchofJesusChrist.org kag sa Librarya sang Ebanghelyo nga app.

FSY nga mga Komperensya

Sugod sa tuig nga magaedad sila sang 14 anyos, ang mga lamharon ginaagda nga magtambong sang Para sa Kusog sang mga Lamharon (FSY) nga mga komperensya. Ining mga kahiwatan nagalakip sang aktibidades kag mga klase nga nagabulig sa pagpabakod sang pagtuo kay Jesucristo kag nagabulig sa mga lamharon nga magtubo sa espiritwal, sosyal, pisikal, kag sa kinaalam.

Halin sa Balaan nga mga Kasulatan

Ang mga kabataan makabatyag sang kalinong samtang ginatudloan naton sila parte sa Dios (tan-awa sa Isaias 54:13; 3 Nefi 22:13).

Ang mga ginikanan responsable sa pagtudlo sang ila kabataan nga makaintiendi sang ebanghelyo (tan-awa sa Doktrina kag mga Kasugtanan 68:25).

Ang mga ginikanan ginsugo nga padakuon ang ila kabataan “sa kasanag kag kamatuoran” (Doktrina kag mga Kasugtanan 93:40).

Digital nga mga Bulig para sa Kabataan

Mga sugilanon sa balaan nga kasulatan (scripturestories.ChurchofJesusChrist.org): Magpangita sang mga ginakoloran nga pahina, mga video, kag mga istorya sa balaan nga kasulatan nga nasulat para sa bata nga mga manugbasa.

Mga video (ChurchofJesusChrist.org/children/videos): Magtan-aw sang mga video para sa kag parte sa kabataan.

Koleksyon para sa kabataan sa Librarya sang Ebanghelyo: Sa app kag sa ChurchofJesusChrist.org, ang koleksyon sa Librarya sang Ebanghelyo sa idalom sang “Kabataan” nagaunod sang musika, mga video, mga sugilanon, kag iban pa nga aktibidades.

Hibaloa sing Dugang

Kon may mga pamangkot kamo parte sa mga bulig sang Simbahan para sa kabataan kag mga lamharon, pwede mo istoryahon ang imo mga ministering brother ukon sister, ang mga lider sang inyo ward ukon branch, ukon ang mga misyonero. Makakita ka man sang madamo nga bulig sa ChurchofJesusChrist.org.

© 2023 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, February 2023. Language. 18910 861