“Kinahanglan bala naton nga Mangin Perpekto Subong?” Para sa Kusog sang mga Lamharon, Peb. 2023
Bulanan nga Mensahe sa Para sa Kusog sang mga Lamharon, Pebrero 2023
Kinahanglan bala Naton nga Mangin Perpekto Subong?
Mga drowing ni Emily E. Jones
Ang balaan nga mga kasulatan ginsulat para bugayan kag paisugon kita, kag sigurado gid amo ina ang ila ginahimo. Pero nakatalupangod ka bala nga sa panalagsa may dinalan nga magapakita nga nagapadumdom sa aton nga kita ginakulabos kon kaisa? Halimbawa, “Gani magmangin himpit kamo, kaangay sang inyo Amay … sa langit nga himpit” (Mateo 5:48). Sa sina nga kasugoan, daw gusto naton nga magbalik sa hiligdaan kag magpangarumbot. Ang ina nga selestiyal nga lalab-uton daw tam-an gid kalayo para sa aton. Pero sigurado nga ang Ginuo indi maghatag sa aton sang kasugoan nga nahibal-an Niya indi naton mahimo.
“Huo, magkari kay Cristo, kag magmangin himpit sa iya,” pangabay ni Moroni. “Palanggaon ang Dios sa inyo bug-os nga ikasarang, kaisipan, kag kusog, nian … sa iya grasya mahimo kamo nga mahimpit kay Cristo” (Moroni 10:32; emphasis gindugang). Ang aton solo nga paglaum para sa tunay nga pagkaperpekto ara sa pagbaton sini bilang regalo halin sa langit—indi naton ini pwede “obrahan”.
Magluwas kay Jesus, wala sang nangin perpekto nga pangginawi sa sining dutan-on nga pagpanglakaton naton, gani mientras nga ari kita sa duta tinguhaan naton ang sige-sige nga pag-uswag kag likawan ang tama ka taas nga talaksan para sa aton mga kaugalingon kag sa iban.
Kon magpursige kita, sa isa ka bahin sang wala katubtuban ang pagpapino sa aton matapos gid kag mangin kompleto—nga amo ang buot silingon sang kahimpit sa Bag-ong Katipan.
© 2023 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, February 2023. Language. 18910 861