Ujumbe wa kila mwezi wa gazeti la Liahona, Februari 2023

Nyenzo kwa ajili ya Vijana na Watoto

Wazazi wana jukumu la msingi la kuwafundisha watoto wao kuhusu Yesu Kristo na injili Yake. Kanisa la Yesu Kristo la Watakatifu wa Siku za Mwisho lina taasisi, programu na nyezo nyinginezo ili kuwasaidia wazazi katika juhudi zao. Kwa pamoja, wazazi, viongozi wa Kanisa na marafiki wanaweza kuwasaidia watoto wote na vijana kuja kwa Kristo.

Picha na Ben Johnson

Msingi

Msingi ni kikundi cha Kanisa kwa ajili ya watoto wa umri wa miezi 18 hadi miaka 11. Katika Msingi, watoto wanajifunza kuhusu Yesu Kristo na injili Yake kupitia masomo, muziki na shughuli mbalimbali. Msingi inaweza kuwasaidia watoto kuhisi upendo wa Mungu kwao.

Akidi za Ukuhani wa Haruni na Madarasa ya Wasichana

Katika mwezi wa Januari ya mwaka ambao watoto wanafikisha miaka 12, wanahama kutoka Msingi kwenda ama kuingia katika akidi za Ukuhani wa Haruni (kwa wavulana) au madarasa ya Wasichana (kwa wasichana). Katika akidi zao na madarasa, vijana wanaendelea kuimarisha shuhuda zao na kuwatumikia wengine.

Programu ya Watoto na Vijana

Katika ujana Wake, Yesu Kristo alizidi kukua “katika hekima na kimo, akimpendeza Mungu na wanadamu” (Luka 2:52). Programu ya Watoto na Vijana huwasaidia waumini wachanga wa Kanisa kufuata mfano wa Yesu Kristo. Wanajifunza na kukua katika nyanja zote za maisha yao—kiroho, kijamii, kimwili na kiakil.

Magazeti ya Kanisa

Gazeti la Kanisa kwa ajili ya watoto ni gazeti la Rafiki. Kwa Ajili ya Nguvu kwa Vijana ni gazeti mahsusi kwa vijana. Magazeti haya yanajumuisha hadithi, mafundisho na shughuli zilizoandikwa mahsusi kwa ajili ya watoto na vijana wadogo.

Kitabu cha Mwongozo cha Kwa Ajili ya Nguvu kwa Vijana

Kwa Ajili ya Nguvu kwa Vijana: Mwongozo wa Kufanya Chaguzi kinawafundisha vijana kuhusu kweli za injili. Kinawafundisha jinsi ya kufanya maamuzi ambayo yatawasaidia wao kumfuata Yesu Kristo. Pia kinajumuisha majibu kwa maswali ambayo vijana wanaweza kuwa nayo kuhusu jinsi ya kuishi injili.

Maktaba ya Injili

Maktaba ya Injili inazo nyenzo za kidijitali nyingi, ikijumuisha video, muziki, hadithi za maandiko matakatifu na shughuli. Pia inajumuisha nyenzo za kuwasaidia wazazi na viongozi kufundisha kanuni za injili. Nyenzo hizi zinapatikana katika Maktaba ya Injili kwenye ChurchofJesusChrist.org na katika aplikesheni ya Gospel Library.

Mikutano ya KNV

Mwanzoni mwa mwaka wanaofikisha umri wa miaka 14, vijana wanaalikwa kuhudhuria makongamano ya Kwa Ajili ya Nguvu kwa Vijana (KNV). Matukio haya yanajumuisha shughuli na madarasa ambayo yanasaidia kuimarisha imani katika Yesu Kristo na kuwasaidia vijana kukua kiroho, kijamii, kimwili na kiakili.

Kutoka kwenye Maandiko

Watoto watahisi amani tunapowafundisha kuhusu Mungu (ona Isaya 54:13; 3 Nefi 22:13).

Wazazi wanawajibika kuwafundisha watoto wao kuelewa injili (ona Mafundisho na Maagano 68:25).

Wazazi wameamriwa kuwakuza watoto wao “katika nuru na kweli” (Mafundisho na Maagano 93:40).

Nyenzo za Kidijitali kwa ajili ya Watoto

Hadithi za maandiko (scripturestories.ChurchofJesusChrist.org): Tafuta kurasa za kupaka rangi, video na hadithi za maandiko zilizoandikwa kwa ajili ya wasomaji wadogo.

Video (ChurchofJesusChrist.org/children/videos): Kuangalia video za na kuhusu watoto.

Mkusanyiko wa watoto kwenye Maktaba ya Injili: Katika aplikesheni na kwenye ChurchofJesusChrist.org, mkusanyiko wa nyenzo katika Maktaba ya Injili kipengele cha “Watoto” kinajumuisha muziki, video, hadithi na shughuli nyinginezo.

Gundua Zaidi

Ikiwa una maswali kuhusu nyenzo za Kanisa kwa ajili ya watoto na vijana, unaweza kuzungumza na kaka au dada zako wahudumu, viongozi wa kata au tawi lako au wamisionari. Unaweza pia kupata nyenzo nyingi kwenye ChurchofJesusChrist.org.

© 2023 na Intellectual Reserve, Inc. Haki zote zimehifadhiwa. Limepigwa chapa Marekani. Idhini ya Kiingereza: 6/19. Idhini ya kutafsiri: 6/19. Tafsiri ya Monthly Liahona Message, February 2023. Language. © 18910, 743