Molaetsa wa Liahona wa Kgwedi le kgwedi, Tlhakole 2023

Didirisiwa tsa Banana le Bana

batsadi ba bala dikwalo tse di boitshepo le morwa

Batsadi ba na le boikarabelo jwa konokono go ruta bana ba bone ka ga Jeso Keresete le efangele ya Gagwe. Kereke ya ga Jeso Keresete ya Baitshepi ba Malatsi a Bofelo e na le maphata, mananeo, le didirisiwa tse dingwe go thusa batsadi mo maitekong a bone. Batsadi ga mmogo le baeteledipele ba Kereke, le ditsala ba ka thusa bana botlhe le banana go tla mo go Keresete.

Bana ba poraemari

Setshwantsho ka Ben Johnson

Poraemari

Poraemari ke lephata la Kereke la bana ba dingwaga go tswa mo dikgweding di le 18 go ya mo dingwageng di le 11. Mo Poraemari, bana ba ithuta ka ga Jeso Keresete le enfangele ya Gagwe ka dithuto, kopelo le ditiro. Poraemari e ka thusa bana go utlwa lorato lwa Modimo.

Dikhoramo tsa Boperesiti jwa ga Arone le Ditlelase tsa Makgarejwana.

Ka Ferikgong wa ngwaga yo bana ba nna dingwaga tse 12, ba tswa mo Poraemari go ya ko dikhoramong tsa Boperesiti jwa ga Arone kgotsa (ya basimane) kgotsa ditlelase tsa Makgarejwana (ya basetsana). Mo dikhoramong le ditlelase tsa bone, banana ba tswelela go nonotsha bopaki jwa bone le go direla ba bangwe.

diatla di tshwantsha setshwantsho

Lenaneo la Bana le Banana

Mo bonaneng jwa Gagwe, Jeso Keresete a gola “mo botlhaleng le mo mmeleng, le mo go ratweng ke Modimo le batho”(Luke 2:52). Lenaneo la Bana le Banana le thusa maloko a mannye a Kereke go sala morago dikai tsa ga Keresete. Ba ithuta le go gola mo dikarolong tsa botshelo jwa bone—semowa, tirisano le ba bangwe, mmele le tlhaloganyo.

Dimakasine tsa Kereke

Makasine ya Kereke ya bana ke Friend makasine. Ya Nonofo ya Banana ke makasine ya banana. Dimakasine tse di akaretsa dipolelo, dithuto le ditiro tse di kwaletsweng fela bana le banana.

dipati tsa buka ya kaelo ya Spanish

Go Nonofo ya Banana Buka ya Kaelo

Go Nonofo ya Banana: Tshupegetso ya go dira Maitshenkelo e ruta banana ka ga boammaruri jwa efangele. E ba ruta ka fa ba ka dirang ditshwetso tse di tlaa ba thusang go sala Jeso Keresete morago. E akaretsa le gone dikarabo tsa dipotso tse banana ba ka nnang le tsone gore ba ka tshela efangele jang.

Motlobo wa Efangele

Motlobo wa Efangele o na le didirisiwa tse dintsi tsa maranyane, go akaretsa ditshwantsho tsa motshikinyego, kopelo, dipolelo tsa dikwalo tse di boitshepo, le ditiro. E akaretsa le gone didirisiwa go thusa batsadi le baeteledipele go ruta melawana ya efangele. Didirisiwa tse di bonwa mo Motlobong wa Efangele ko ChurchofJesusChrist.org le mo Gospel Library app.

Dikhonferense tsa FSY

Go simolola ka ngwaga e ba nnang 14, banana ba lalediwa go tsenelela khonferense ya For the Strength of Youth (FSY). Ditiragalo tse di akaretsa ditiro le ditlelase tse di thusang go nonotsha tumelo mo go Jeso Keresete le go thusa banana go gola semowa, tirisano le ba bangwe, kgolo ya mmele le tlhaloganyo.

Go tswa mo Dikwalong tse di boitshepo

Bana ba tla utlwa kagiso fa re ba ruta ka Modimo (bona Isaia 54:13; 3 Nefi 22:13

Batsadi ba na le boikarabelo jwa go ruta bana ba bone go tlhaloganya efangele (bona Dithuto le Dikgolagano 68:25).

Batsadi ba laotswe go godisetsa bana ba bone “mo leseding le boammaruri” (Dithuto le Dikgolagano 93:40).

Didirisiwa tsa Maranyane tsa Bana

Dipolelo tsa Dikwalo tse di boitshepo (scripturestories.ChurchofJesusChrist.org): Batla ditsebe tsa go taka, ditshwantsho tsa motshikinyego, dipolelo tsa dibuka tse di boitshepo di kwaletswe babadi ba bannye.

Ditshwantsho tsa motshikinyego (ChurchofJesusChrist.org/children/videos): Leba ditshwantsho tsa motshikinyego tsa le ka ga bana.

Kgobokanyo ya bana mo Motlobong wa Efangele: mo epong le mo ChurchofJesusChrist.org, kgobokanyo ya Motlobo wa Efangele ka fa tlase ga “Bana” e na le kopelo, ditshwantsho tsa motshikinyego, dipolelo le ditiragalo tse dingwe.

Batla Mo Gontsi

Fa o na le dipotso ka ga didirisiwa tsa Kereke tsa bana le banana, o ka bua le bakaulengwe kgotsa bokgaitsadi ba ba go direlang, baeteledipele ba gago ba wate kgotsa lekala, kgotsa baanamisa efangele. O ka bona gape didirisiwa tse dintsi mo ChurchofJesusChrist.org.

© 2023 ka Intellectual Reserve, Inc. All rights reserved. Printed in USA. Tetla ya Sekgoa: 6/19. Tetla ya thanolo: 6/19. Thanolo ya Molaetsa wa Liahona wa Kgwedi le kgwedi, Tlhakole 2023 Language. 18910 763