Mga Bendisyon sang Priesthood

Litrato

Si Cristo nga nagaordin sang Dose ka Apostoles

Si Cristo nga Nagaordin sang Dose ka Apostoles, ni Harry Anderson

Ang bugay sang priesthood ginahatag paagi sa inspirasyon sang nagakapot sang Melchizedek Priesthood. Ang mga bugay sang priesthood nagapatigayon nga mabaton sang tanan nga mga anak sang Dios ang Iya gahum, pagpang-ayo, pagpasulhay, kag giya.

Ang Priesthood

Ang priesthood amo ang gahum kag awtoridad sang Dios. Ang nagakaangay nga mga lalaki nga nagakapot sang Melchizedek Priesthood nagaakto sa ngalan ni Jesucristo kon maghatag sila sang mga bendisyon sang priesthood. Samtang ginahatag nila ining mga bendisyon, ginasunod nila ang ehemplo sang Manluluwas sang pagbendisyon sa iban.

Litrato

mga kamot nga nagatakdong sa ulo

Litrato ni David Winters

Paano Ginahatag ang mga Bendisyon

Ang mga bendisyon sang priesthood ginahatag paagi sa pagtakdong sang mga kamot. Ang nagakapot sang Melchizedek Priesthood nagatungtong sang iya mga kamot sa ulo sang tawo nga nagabaton sang bendisyon. Dayon nagahatag sia sang bendisyon sa giya sang Espiritu. Ang mga nagahatag sang bendisyon kag ang mga nagabaton sini nagapakita sang pagtuo sa Dios kag nagasalig sa Iya pagbuot kag tiyempo.

Pagngalan kag Pagbendisyon sang Kabataan

Pagkatapos nga matawo ang bata, ang isa ka nagakapot sang priesthood nagahatag sa iya sang ngalan kag bendisyon (tan-awa sa Doktrina kag mga Kasugtanan 20:70). Masami nagakatabo ini sa miting sang puasa kag testimonya. Ginahatagan anay ang bata sang ngalan. Dayon ginahatagan sang nagakapot sang priesthood ang bata sang bendisyon.

Litrato

nagamasakit nga bata nga lalaki nga nagabaton sang bendisyon sang priesthood

Litrato ni Welden C. Andersen

Mga Bendisyon para sa Nagamasakit

Ang mga nagakapot sang priesthood pwede maghatag sang mga bendisyon sa mga tawo nga nagamasakit. Ini nga klase sang bendisyon may duha ka bahin: paghaplas sang lana (anointing) kag pagselyo sang ginbutang nga lana. Una, ginapatuloan sang nagakapot sang priesthood sang olive oil nga ginkonsagrar, ukon ginbendisyunan, ang ulo sang tawo kag nagahatag sang malip-ot nga pangamuyo. Dayon isa pa ka nagakapot sang priesthood ang nagaselyo sang ginbutang nga lana kag ginahatagan ang tawo sang bendisyon sa giya sang Balaan nga Espiritu.

Mga Bendisyon sang Pagpasulhay kag Laygay

Ang mga nagakapot sang priesthood pwede maghatag sang mga bendisyon sang pagpasulhay kag laygay sa mga miyembro sang pamilya kag sa iban nga nagapangayo sini. Ang tatay nga nagakapot sang Melchizedek Priesthood pwede maghatag sang mga bendisyon sang amay sa iya kabataan. Mahimo nga makabulig gid ini kon ang mga kabataan nagapangatubang sang espesyal nga mga hangkat.

Pagset-apart sang mga Miyembro nga Magserbisyo sa mga Calling

Kon ang mga miyembro sang Simbahan nagabaton sang mga calling, ginahatagan sila sang bendisyon kon ginaset-apart sila nga magserbisyo. Ginabendisyunan sila sang lider sang priesthood sang awtoridad sa pag-akto sa sina nga calling. Ginahatagan man sila sang lider sang priesthood sang bendisyon para buligan sila sa ila pagserbisyo.

Litrato

babayi nga nagabasa sang iya bendisyon sang patriarka

Litrato ni Shauna Stephenson

Mga Bendisyon sang Patriarka

Ang kada nagakaangay nga miyembro sang Simbahan pwede magbaton sang bendisyon sang patriarka. Ining bendisyon nagahatag sang personal nga laygay halin sa Ginuo. Mahimo man ini maghatag sang giya kag pagpaumpaw sa bilog nga kabuhi sang tawo. Nagahambal man ini sang kaliwatan sang isa ka tawo sa panimalay sang Israel. Ang naordin lamang nga patriarka ang makahatag sining klase sang bendisyon.

© 2023 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, March 2023. Language. 18905 861