“Priesthood Blessings,” Liahona, Mar. 2023.
ຂ່າວສານປະຈຳເດືອນ Liahona, ເດືອນມີນາ 2023
ພອນຂອງຖານະປະໂລຫິດ
Christ Ordaining the Twelve Apostles [ພຣະຄຣິດກຳລັງແຕ່ງຕັ້ງອັກຄະສາວົກສິບສອງ], ໂດຍ ແຮຣີ ແອນເດີສັນ
ພອນຂອງຖານະປະໂລຫິດຖືກມອບໃຫ້ຜ່ານທາງການດົນໃຈໂດຍຜູ້ດຳລົງຖານະປະໂລຫິດແຫ່ງເມນຄີເສເດັກ. ພອນຂອງຖານະປະໂລຫິດເຮັດໃຫ້ເປັນໄປໄດ້ສຳລັບລູກໆທຸກຄົນຂອງພຣະເຈົ້າທີ່ຈະໄດ້ຮັບອຳນາດ, ການປິ່ນປົວ, ການປອບໂຍນ, ແລະ ການນຳພາຈາກພຣະອົງ.
ຖານະປະໂລຫິດ
ຖານະປະໂລຫິດຄື ອຳນາດ ແລະ ສິດອຳນາດຂອງພຣະເຈົ້າ. ຜູ້ຊາຍທີ່ມີຄ່າຄວນຜູ້ດຳລົງຖານະປະໂລຫິດແຫ່ງເມນຄີເສເດັກກະທຳໃນພຣະນາມຂອງພຣະເຢຊູຄຣິດ ເມື່ອເຂົາເຈົ້າໃຫ້ພອນຂອງຖານະປະໂລຫິດ. ຂະນະທີ່ເຂົາເຈົ້າໃຫ້ພອນເຫລົ່ານີ້, ເຂົາເຈົ້າເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດໃນການໃຫ້ພອນຄົນອື່ນໆ.
ຮູບຖ່າຍໂດຍ ເດວິດ ວິນເຕີ
ວິທີການໃຫ້ພອນ
ພອນຂອງຖານະປະໂລຫິດຖືກມອບໃຫ້ໂດຍການວາງມືໃສ່ເທິງຫົວ. ຜູ້ດຳລົງຖານະປະໂລຫິດແຫ່ງເມນຄີເສເດັກວາງມືໃສ່ເທິງຫົວຂອງບຸກຄົນທີ່ກຳລັງຮັບເອົາພອນ. ແລ້ວເພິ່ນກໍໃຫ້ພອນຕາມພຣະວິນຍານຊົງນຳ. ຜູ້ທີ່ໃຫ້ພອນ ແລະ ຜູ້ທີ່ຮັບເອົາພອນນັ້ນໄດ້ສະແດງສັດທາຂອງເຂົາເຈົ້າໃນພຣະເຈົ້າ ແລະ ໄວ້ວາງໃຈໃນພຣະປະສົງ ແລະ ເວລາຂອງພຣະອົງ.
ການຕັ້ງຊື່ ແລະ ການໃຫ້ພອນເດັກ
ຫລັງຈາກທີ່ເດັກນ້ອຍໄດ້ເກີດມາ, ຜູ້ດຳລົງຖານະປະໂລຫິດຈະຕັ້ງຊື່ ແລະ ໃຫ້ພອນແກ່ເດັກຄົນນັ້ນ (ເບິ່ງ ຄຳສອນ ແລະ ພັນທະສັນຍາ 20:70). ສິ່ງນີ້ມັກຈະເກີດຂຶ້ນໃນ ກອງປະຊຸມຖືສິນອົດເຂົ້າ ແລະ ສະແດງປະຈັກພະຍານ. ທຳອິດເດັກຄົນນັ້ນຈະຖືກຕັ້ງຊື່. ແລ້ວຜູ້ດຳລົງຖານະປະໂລຫິດຈະໃຫ້ພອນແກ່ເດັກຄົນນັ້ນ.
ຮູບຖ່າຍໂດຍ ແວວເດັນ ຊີ ແອນເດີເຊັນ
ການໃຫ້ພອນແກ່ຄົນເຈັບປ່ວຍ
ຜູ້ດຳລົງຖານະປະໂລຫິດແຫ່ງເມນຄີເສເດັກສາມາດໃຫ້ພອນແກ່ຜູ້ຄົນທີ່ເຈັບປ່ວຍໄດ້. ການໃຫ້ພອນນີ້ມີຢູ່ສອງພາກສ່ວນ: ການເຈີມ ດ້ວຍນ້ຳມັນ ແລະ ການຜະນຶກການເຈີມ. ທຳອິດ, ຜູ້ດຳລົງຖານະປະໂລຫິດຈະຢອດນ້ຳມັນໝາກກອກທີ່ໄດ້ຖືກອຸທິດໃຫ້ສັກສິດແລ້ວ, ຫລື ຖືກໃຫ້ພອນ, ລົງເທິງຫົວຂອງຜູ້ປ່ວຍ ແລະ ກ່າວຄຳອະທິຖານສັ້ນໆ. ແລ້ວຜູ້ດຳລົງຖານະປະໂລຫິດອີກຄົນໜຶ່ງຈະຜະນຶກການເຈີມນັ້ນ ແລະ ໃຫ້ພອນແກ່ຄົນເຈັບປ່ວຍຕາມການນຳພາຈາກພຣະວິນຍານບໍລິສຸດ.
ພອນແຫ່ງການປອບໂຍນ ແລະ ການແນະນຳ
ຜູ້ດຳລົງຖານະປະໂລຫິດແຫ່ງເມນຄີເສເດັກສາມາດໃຫ້ພອນແຫ່ງການປອບໂຍນ ແລະ ການແນະນຳແກ່ສະມາຊິກໃນຄອບຄົວ ແລະ ຄົນອື່ນໆທີ່ຮຽກຮ້ອງມາ. ພໍ່ຜູ້ດຳລົງຖານະປະໂລຫິດແຫ່ງເມນຄີເສເດັກສາມາດໃຫ້ພອນຂອງພໍ່ແກ່ລູກໆຂອງຕົນໄດ້. ສິ່ງເຫລົ່ານີ້ອາດຈະເປັນປະໂຫຍດຫລາຍໂດຍສະເພາະເວລາທີ່ລູກປະເຊີນໜ້າກັບການທ້າທາຍພິເສດ.
ການແຕ່ງຕັ້ງສະມາຊິກເປັນທາງການເພື່ອການຮັບໃຊ້ໃນການເອີ້ນ
ເມື່ອສະມາຊິກຂອງສາດສະໜາຈັກໄດ້ຮັບການເອີ້ນ, ເຂົາເຈົ້າຈະໄດ້ຮັບພອນໃນເວລາທີ່ເຂົາເຈົ້າຮັບການແຕ່ງຕັ້ງເປັນທາງການເພື່ອຮັບໃຊ້. ຜູ້ນຳຖານະປະໂລຫິດໃຫ້ພອນເຂົາເຈົ້າດ້ວຍສິດອຳນາດໃນການປະຕິບັດໜ້າທີ່ໃນການເອີ້ນ. ຜູ້ນຳຖານະປະໂລຫິດຍັງໃຫ້ພອນແກ່ເຂົາເຈົ້າເພື່ອຊ່ວຍເຫລືອເຂົາເຈົ້າໃນການຮັບໃຊ້ຂອງເຂົາເຈົ້າເຊັ່ນກັນ.
ຮູບຖ່າຍໂດຍ ຊອນນາ ສະຕີບເວັນສັນ
ປິຕຸພອນ
ສະມາຊິກຂອງສາດສະໜາຈັກທີ່ມີຄ່າຄວນທຸກຄົນສາມາດຮັບເອົາປິຕຸພອນ. ພອນນີ້ແມ່ນໃຫ້ຄຳແນະນຳສ່ວນຕົວຈາກພຣະຜູ້ເປັນເຈົ້າ. ປິຕຸພອນສາມາດໃຫ້ການນຳພາ ແລະ ການປອບໂຍນຕະຫລອດຊີວິດຂອງບຸກຄົນໄດ້. ມັນກໍຍັງສາມາດບອກເຖິງເຊື້ອສາຍຂອງບຸກຄົນຢູ່ໃນເຊື້ອສາຍອິດສະຣາເອນນຳອີກ. ມີພຽງແຕ່ຜູ້ໄດ້ຖືກແຕ່ງຕັ້ງໃຫ້ເປັນ ປິຕຸ ເທົ່ານັ້ນ ທີ່ສາມາດໃຫ້ພອນນີ້ໄດ້.
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, March 2023. Language. 18905 331